失戀200天後,我遇上的女孩們: 第二十六話
「你依排唔夠訓呀?好大個黑眼圈啊!」Mandy差唔多面貼面對住我講。
「掛住你嘛...」我突然好討厭自己...
「係咪呀?」佢露出甜蜜既微笑,令我紊亂既思緒帶來清風...
人係犯濺既,果晚封鎖左Tracy whatsapp兩個鐘之後,我忍唔住解封,發現有一個三分鐘既語音訊息,我開左嚟聽,開頭個十秒係佢既啜泣聲,之後我已經唔敢聽熄左佢,而且怕自己心軟,再封鎖佢。成晚我腦海裡只有佢既啜泣聲,不停幻想佢喊既樣,又幻想喊完佢會點,但又唔敢打俾佢,內心不停掙扎...
今日已經係第四日,每晚我都會開返佢個whatsapp睇,發覺除左個留言之外,再無其他訊息,但我始終唔敢去聽。
「嗱!」Mandy俾左排朱古力我,「請你食嘞,食左甜野個人會開心啲嫁!」
「哦...」我食左一啖,除左甜之外,仲有啲苦...
「點呀?好唔好啲呀?」
「嗯...好啲喇...我無事...」
「嗯...咁笑下啦,唔好乸埋塊面喇!」
其實有時覺得Mandy好似睇穿我個心咁,或者佢可能已經知道所有野,只係在我面前扮唔知咁。
「係咩?你揀好左喇...」
今次係我年幾以來第一次主動約Belle出來食飯。而家既我最想搵人傾訴,我終於明白點解佢之前係咁搵我喇...
「其實都唔算話揀定,我個心仲好似有啲野咁,搞到我呢排訓唔到...」呢幾日我訓覺既時間加埋都唔夠十個鐘...
「咁同我分手果時...邊個嚴重啲?」佢個樣唔似講笑...
「差唔多...」氣氛一下子沉重來,我轉話題:「咁你點呀?」
佢低頭無語,氣氛更加沉重,我諗我問錯問題...
「佢前排搵過我,佢話做緊野,仲話借左我既錢會分期還返喎...」
「咁佢有野做,肯還錢咪好囉!」如果真係還既話...
「我而家都未野諗喇,最重要就係搵錢,以前晒左太多時間。以前就成日幻想好似我阿媽咁唔使做野有老公養,但而家邊有可能丫...」
「嗯...男人邊靠得住丫,最重要就儲錢,靠自己!不過都要顧住身體啊,唔係有幾多錢都無命洗。」
「假如...假如佢再搵返我,你認為我應唔應該接受返佢?」
「我覺得你唔好咁快接受返佢住,睇定啲,俾一兩個月時間佢...」其實我有私心,我唔希望佢地再係返一齊,唔止因為上次打佢件事...
「咁其實同分手無咩分別...」
「假如係真心既,幾耐都等喇,而且你係打算長久既,等一兩個月其實值得囉!」
「嘿...今晚本來係我嚟安慰你,點知而家調返轉你開解我...」
「都唔係既,同你傾完個心都舒服啲!」
「唉...以前我地都無好似而家咁好傾,唔通真係分開左先識了解大家?」
「人就係咁犯濺,失去左先識去珍惜!」
「或者我地做朋友好過做情侶...」
「可能我地第一步已經做錯...」雖然仍有失落感,但比以前減輕左唔少。
臨走前,佢同我講左一句:「你都唔好咁唔開心喇!你仲有人要你愛嘛!」
望住佢走遠,心情輕鬆左唔少,或者我已經完全將佢放低。原來要放低,要自己主動先得...
返到屋企,我始終都忍唔住打返開Tracy個whatsapp。經過一輪天人交戰後,我始終都唔夠膽打開個留言聽。第二朝七點左右我責醒左,醒起未閂whatsapp,而正當我想封鎖返佢時,卻收到佢既新訊息。
「...Jack,我好似第一次嗌你個名...以前我淨係識得嗌你做「喂」...仲記唔記得我地幾時識嫁?原來只係幾個月...但係就好似識左好耐咁。你以前咪講過關於睡公主原本既故事既?你話睡公主一醒就鍾意王子,其實我覺得自己好似睡公主咁,開頭我仲以為果個係阿Sam,跟住你出現,我就認為你先係真正既王子,但原來係我既魔咒仲未解開,仲係沉睡緊...其實同你一齊好開心,果時真係以為可以好似童話咁過著幸福快樂既生活,原來童話係咁短暫...呢幾日你無搵我,我唔知你收唔收到呢個訊息...我想講...聽朝十點機,我會離開香港返大馬,或者唔會再返嚟...係呀!我whatsapp個頭像係我地第一張同埋係唯一一張合照,果時我想影多幾張,但你話來日方長,仲話下一張可能係我地既結婚相...嗦...衰人...花心鬼...衰人...」
佢既語氣由平靜變做激動,每鬧我一次,我心就震撼一次...我望一望鐘,差唔多八點,我卻猶疑緊去唔去機場,即使去到機場我又未必搵到佢,而且就搵到又點?我唔係王子,我帶唔到幸福俾佢,我配唔起佢...
無謂再關心妳~我沒資格慰問妳~
無謂再騷擾妳~我沒這塊厚面皮~
「司機呀!可唔可以開快啲呀?我趕時間!」
而家架的士係公路度飛馳,而出面正落緊雨,此情此景,令我記起細個果時聽過一隻歌,歌名同歌詞都唔記得,記得既係歌中間有一段讀白,講男主角飛的去見女主角,點知遇著粗心大意既...公路?濕滑既司機?係唔係調轉左呢?是但喇!總之...
I have a bad feeling about this...
「先生...先生...到左醫院喇!」
「...醫院?...你車我嚟醫院...把托咩!...我要去...機場呀...有人等緊...我...」