失戀200天後,我遇上的女孩們: 第二十五話

「其實你地後生既事我係唔應該插手,雖然佢唔係我親生,但我已經當佢親生女咁,我會盡力保護佢,唔俾佢受到任何傷害!」
中年女人既聲音不斷係我腦中迴響,就好似洗腦既流行曲咁,就算你唔記得歌名,都會記得啲歌詞同音樂。
「嘭」一聲,Mandy結結實實的一拳打中我塊面。
「嘩!咁都中既,你發緊夢呀!」教練阿皓係台邊揶揄我,「你新年食左成檐豬油呀?」
「Mandy俾左啲迷藥你食呀?」阿Mei加入戰團。
「我啲蘿蔔糕無加豬油嫁喎!」Mandy一個助攻...
「佢似食左過期春藥喎...」最後阿強執雞...
看來我係時候檢討下我啲人緣嘞...
「你近排發生咩事?成日神不守舍咁!」返屋企時,Mandy突然問我。
「吓?你講咩?」




「你又發呆喇!做咩事呀你?」
「無野啊,我無事...」
我腦不斷重複當日同Tracy auntie見面既情況...
時間係星期四Tracy搵我之後幾日,收到佢auntie電話,話想同我單獨會面,我一口答應,其實自從上次我唔覺意見到啲相後,我都有心理準備...
「嚟左喇,坐啊...」佢約左我係酒店咖啡廳見面,佢身穿一套米白色套裝,雖然化左淡妝,但仍不其麗質,可以想像到佢後生時應該係個大美人。
「Auntie約我出來係...」雖然心知肚明,但我都唔敢太過直接...
佢係公事包攞左個file出嚟打開佢,裡面有疊相,正係我見過既相...
「其實你地後生既事我係唔應該插手,雖然佢唔係我親生,但我已經當佢親生女咁,我會盡力保護佢,唔俾佢受到任何傷害!」佢飲左啖咖啡,繼續講:「本來件事就應該由Tracy處理,可惜佢心軟...」
「我...」秘密被揭發,任何人都無法逃避愧疚,此刻我就連呼吸都感到困難...
「我唔知你真心定假意,但個傻女對愛情都付出真心既。阿Sam果次已經令佢受傷,我自己亦責無旁貸,今次我唔會再令佢受同樣既傷害!」




「你既意思係...」我腦已經一片空白...
「我唔會強制要求你離開或者留低...如果你係真心既,我諗你應該知道點做...」
無可否認我係個猶豫不決既人,假如我決絕啲就唔會發生而家咁既情況。Mandy同Tracy,兩個只可以揀一個...
「喂!喂!你又係咁喇!」Mandy將我係回憶中拉返嚟現實...
「吓?」佢鼓起泡腮,奏起眉頭望住我。
「做咩呀你?眼紅紅咁既?」佢用手撫摸我塊面,手指更掃過我雙眼,好似我有眼淚就快流落嚟咁...
「無野...有沙入眼...」我...要放棄Mandy?
「有沙?」果晚一滴風都無...
「好簡單!兩把刀,一係佢地互片,一係就一齊片你!」我係唔係問錯人呢?
「唔好咁望住我,齊人之福你就享受過嘞,依啲野你應該一早預左!」其實阿明講得幾有道理...




「其實掩左你咪仲好,到時三個女人,大家都無咪損失,你仲多左兩個木瓜添...」不過思想變態左啲...咁我係唔係要買刀呢?
「你真奇怪,人地既野你就咁果斷,自己既野就婆婆媽媽...」係咩?唔係一般人都係咁既咩?你同我咪一樣係對感情猶豫不決。
唉...其實有時會諗,答案早已在心中,只係我思前想後,遲遲唔肯下定決心,我知道再咁拖落去最終都有人受到傷害,或者係時候硬起心腸...
時間係年十五元宵...
或者大家都知道發生咩事,無論食飯定睇戲,我同Tracy都無傾計,只係禮貌地回應大家。返到佢屋企,佢攞左疊相出來...
「我地...或者我解釋俾你聽...」我好不容易開口,聲音仲有啲沙啞...
「你仲有咩好解釋啊!」一疊相猛然地掟向我,我不閃不避,望住相片散落地上...
「我可以原諒你...」下一秒,佢出奇地非常平靜咁講出呢句。然而,佢咁平靜反而令我更擔心...
原諒?連我自己都唔肯原諒自己。
「你既愛太貴重,我付擔唔起...」我忍住心痛講出口。
我心裡對自己講:「分手就要硬起心腸!唔可以心軟!」
之後既事,我已經唔太記得清楚。佢無呼天搶地既叫喊,亦沒有跪地要求我唔好走,只係面上掛住兩行眼淚,雙眼目不轉睛望住我。果一刻,我係有衝動想去攬住佢,但我係心裡對自己講:「你配佢唔起,佢可以搵個更好既...」
最後佢講左句說話,但我已頭昏腦脹,聽唔到佢講咩。說話講完,我轉身就走。
為免自己心軟,搭車時我特登封鎖佢whatsapp,但當見到佢頭像時...
明明傷害人既係我,點解痛既又係我?




「未見過人喊得咁傷心咩?」我隱若聽到側邊啲人講。
果晚,我發覺差唔多成車人都望住我...