失戀200天後,我遇上的女孩們: 第十四話

「冬日美食節?」望住同一樣既飛,先醒起前日張飛仲係褸袋度。
「係呀,橫掂未去過咪行下囉,好似話好多野食...」Tracy攞住張飛好興奮咁同我講...
原來佢個做護士既朋友(亦係陪佢聖誕倒數果個)送左兩張飛俾佢,Tracy話本來佢朋友打算同男朋友一齊去既,點知個男朋友唔想去,差啲嗌埋交,所以俾左Tracy。咁又係,可以既話我都唔想去(仲要三日內去兩次)...
上次Mandy雖然帶左好多環保袋,但基本上無咩買過野,主要都係食。今次Tracy明顯買得多,好多都係紅酒朱古力果啲,佢話依啲唔飲唔食用來擺都好喎,我心諗你好晒啫...
「去邊度食飯呀?」我地出返來,一睇隻錶,已經八九點。
「今晚係屋企食,我煮,你洗碗。」
「吓?會唔會食死人嫁?」依兩個月來我未見過佢煮飯...
「喂!話晒我係外國留學都係自己煮嫁,我而家咪好好地!」
「所以你咁矮同咁瘦囉...」呢句我心講既,「咁今晚有咩食呀?」
「有意粉喇,腸仔喇...」




於是帶住興奮既心情既佢同帶住沉重戰利品既我一齊返屋企煮飯仔。
「你唔好喊喇...嗱!你咁切洋蔥就唔會菴眼喇!」
「你唔早講,嘩!唔掂,我抺眼淚先...」
「喂!我件衫來嫁...咦~核突佬!」
「我洗個面先,你繼續奮戰,加油!」
過左陣...
「食得喇!」
「試下先...唔...口感唔錯...茄汁有茄汁味,意粉係熟既,腸仔切得唔錯,仲加左辣椒提升左個味道同層次,well done!」
「你估你係Gordon Ramsay呀?」
食完飯洗完碗,我同佢就坐係梳化睇戲,睇既當然係愛情......片喇!




「係喎...果晚套戲好唔好睇?」
「吓...好...好睇...」差啲被佢殺過措手不及...
「其實果晚...」佢未講完,我已經錫左佢額頭一下...
「對唔住呀!下次我一定陪你倒數...」
「好,勾手指尾喇!」
「好!我地勾過手指尾,老鼠唔食豆沙包...」我亂噏一通...
「咩黎嫁?白痴!」
「嘻嘻...」
第二朝,為左報答佢尋晚餐飯,我就整左我最拿手既日本早餐--出前一丁加隻烚蛋。
「嘩!隻蛋未熟既!」




「咩未熟?依隻叫流心蛋,好難整嫁!好講時間控制嫁!好唔好味呀?」
「過得去喇...」咁點解你食得咁滋味既?
突然門鐘響...
「邊個?應該無人咁早搵我喎...」佢一面疑惑。
「會唔會係管理處呀?」
Tracy打開大門,一個外表高貴既女士企係屋外...
「Auntie?」
「可以請我入去嘛?你有朋友係度?」
「啊,入來丫...依個我男朋友阿Jack,依個...我auntie...」
「你好,auntie!」
「嗯!」根據佢依個高傲既回應,加上一身高級服裝同貴婦既外表,我肯定佢就係Tracy個後母。聽Tracy講,佢後母就馬來西亞拿督個女,當年Tracy爸爸去大馬做生意而識左auntie,最後當然結左婚仲生左兩個仔,而佢全家都係大馬住,淨返Tracy一個係香港。
「我想同Tracy單獨傾下,你可唔可以...」
我通氣地返入睡房順手閂埋門,猶疑左兩秒,我決定貼住門度偷聽。唔知係間屋隔音太好定佢地講得太細聲,我淨係隱若聽到「阿Sam」,「返去」,「真係咁」,「決定左」呢幾句...
過左兩三個字左右,我聽到開大門聲,我估auntie應該走左,但又驚Tracy知我偷聽,所以等佢開左房門我先問佢咩事。
「無...auntie話我無返大馬做節,所以叫我過幾日返去補返團年飯...」雖然Tracy咁講,但我總係覺得佢來唔止叫Tracy返去咁簡單...