失戀200天後,我遇上的女孩們: 第十三話
我既聖誕節係咁分配既,24,25我會陪Mandy,跟住26號呃佢有野做,其實同Tracy一齊,假如一切順利既話...
「冬日美食節?你想去搶一蚊野呀?」我揸住張飛疑惑地問Mandy。
「又唔一定買野既。」但佢將幾個環保袋俾左我叫我放落個斜孭袋度。
「不過而家先去,咩都被人搶晒喇!」現在時間係中午十二點,而我地仲係大埔火車站等緊火車...
「唔知邊個尋晚兩點仲同人傾Whatapp呢?」佢講既係佢自己,當然我唔止同佢傾...
「放假嘛!訓耐啲正常喎...」人係須要訓覺,唔係好易死嫁。
「無你咁好氣。」其實佢都未訓醒...
「上車嘞,小紅帽!」
仲有...果到係無一蚊野搶既...
其實所謂美食節都係啲公司將倉底貨而仲未過期既重新包裝再賣出去,基本上唔係佢有飛我都唔會去,記得上次去過一次,淨係食碗豆腐花都排左幾個字,仲要唔滑無豆味得個甜。不過,伴住佢排隊又係另一回事既...
「搭船返去囉!平啲...」同佢外表唔同,佢同我一樣都係有知慳識儉既美德...
「睇下你幾傻,哈哈...食到成嘴都係...哈哈...」我地睇返頭先影既相,不得不承認佢係幾上鏡,同埋有幾個角度係似除子珊。
「陣間順便行下海旁囉,順便睇下燈飾。」
「嗯...」
其實年年尖東啲燈飾都係差唔多,唔同既就係身邊果個...
「喂,企係度,唔好郁呀...好!影好喇!嗱,我係唔係好有攝影天份呢?」
「係喎!又影得幾型喎,又有藝術感...」點解out focus既?
「到我喇,記得影埋啲燈飾喎!」
「得喇!」
「睇過...點解影到我咁霸氣既?」邊個叫你插住袋影啫?
「我地一齊影...嗱,依張要放facebook呀!」吓?
「我睇落好麻甩喎,成個咸濕佬咁,影衰你呀!」
「你不嬲係嫁喇!咁咪襯得我靚囉!」
「唔係喎...你睇...多左隻手既?嘩!好邪呀,刪左先,快啲走,知係...」
可能你地覺得好謊謬,但佢怕鬼係鐵一般既事實,事源有次夜晚佢貪快打算行後巷,我驚佢有危險叫佢唔好行,佢話:「賊之嘛!洗咪驚!」
跟住我講:「前排好似有人係度撞左野...」
「吓...咁兜路啲囉...」自此我同佢無論日頭晚夜都無行過後巷...
「不如上我屋企囉,我屋企人返左大陸...」去到屋企樓下,我提議上我屋企...
「吓...哦...」佢猶疑左一下,但都跟我上屋企。
「你沖涼先,我攞毛巾俾你。」
十二點,手機震了一下,我無理會,因為現在我要俾Mandy一個驚喜...
「Happy Birthday to you~Happy Birthday to you~
Happy Birthday to Mandy~Happy Birthday to you~」
「咦?你點知嫁?」
「呢個世界有facebook嫁!不過我無諗過耶穌係女人啫...」
「許願喇!」
吹過蠟燭,食左蛋糕,佢就參觀我間房。我間房唔算大,一張上下格床,電腦檯,書櫃,衣櫃已經霸左間房八成空間,我同佢只可以坐係床度。
「嘩!你咁多模型同漫畫既,Monster?我都有睇...你好迷Beyond喎,蘇打綠你又有聽?」唔知係唔係我間房太多野,佢好似入左個寶藏咁周圍望周圍摷...
「咦?依本...校刊!嘩!二十幾年喎,睇下你個樣先!」
「收返個「幾」字丫,唔該!F.2C呀...搵唔搵到呀?」
「唔...你無點變既?」
「保養好囉!日日食防腐劑既。」
「唔...依個...」佢指住最前排笑得好甜既女班長,跟住望住我,「依個你初戀定暗戀?」
「吓...暗戀...你點知嫁?」
「嘻嘻...估嫁咋,俾返你,你中文名都幾英喎!」
「咁你中文名又叫咩呀?」
「第時先話你知...咦?依盒係...嘩!好靚呀隻錶!」
「係啊,買左好耐喇...」好彩事先收埋左我同Tracy隻情侶錶啫,唔係都唔知點解釋...
「唔怪得錶帶花晒...咦?」
「隻錶都唔夠依條頸鏈同個主人靚喇!」我從後幫佢戴上條頸鏈。鏈墜係金色圓形中間有個星形既裝飾,而圓圈上面刻左「You are the favorite of my life」,而我果條係同款黑色。
「好貴既?其實有你陪我咪夠,使咪...」佢一路低頭把玩條鏈,睇來佢好鍾意...
「唔係好貴咋,你睇下,J&M,即係Jack & Mandy...」佢突然錫左我一下,跟住講「多謝」。
Last Christmas~I give you my heart~
正所謂,錫嘴既野有來有往,更何況我地係張床度...唔知過左幾耐,我地訓左係床度,由於係單人床既關係,我地只可打側訓,而當我除左上身衫時,佢突然問我:「你會唔會因為一個人而顛左?」
「我而家咪因為你顛左囉...」我開玩笑講。
「我認真嫁...」
「唔...一個鐘打左五十幾次同一個電話算唔算?」
「我真係認真問嫁...」佢唔信我咁唔啋我。
跟住佢打側身背對住我訓,臨訓前同我講:「多謝你今日陪我,我玩得好開心呀!」
於是果晚乜都無發生過就訓左...
第二朝,我睇返whatapp,係Tracy send左兩個訊息,一個係「Merry Christmas!」,另一個係倒數時既相,下面寫住「多希望你在我身邊」...