失戀200天後,我遇上的女孩們: 第十五話

「無間道2」裡面,吳鎮宇曾經講過:「出得黎行,預左要還...」。今日,我信,我真心相信!經過左快活既聖誕節之後,我病了。
有人話,平時唔多病既,一病就好大劑,應驗左,我燒到差唔多40度,請左兩日病假,但重點係,31號我注定係張床倒數...
「仔呀,我落街買餸,你自己照顧自己喇!」於是屋企就淨返我一個...
「我病了....」百無聊賴,傳whatapp俾紅顏知己係其中一個解悶方法,但當你行衰運時,就連食豆腐都會哽親既...
阿明:「抵你死!」
Alan:「咪扮野呀,臨年尾先病,搵鬼信?」
Anson:「記得返來寫假紙...」
仆街,send錯左落同事group度,不過咁都可以反映到我既人緣既...
Coco:「保重身體!」
Coco?邊個加左Coco落去?於是我就同佢單獨whatapp...




我:「Coco,聖誕節過得好嗎?你同Jason點呀?」
Coco:「還好喇!咁你同Mandy點過?」
我:「又係咁過!順手慶祝埋佢生日囉。」
Coco:「哦,咁啱佢生日呀?咁咪好囉收兩份禮物咯...」
我:「佢好啫...咁你得米未呀?」
Coco:「得咩米?」
我:「Jason呀!你唔好以為我唔知嫁!人地唔主動就自己主動,幸福就咁得來!」
佢無覆我,跟住門鐘響,我拐下拐下去開門,我而家先知原來發燒係會令右腳舊患複發。
「又漏野呀?」開頭我仲以為阿媽帶漏野,點知一開門Mandy已舉高手上既保溫壺講:「俾你嫁!白粥黎嫁!」
「哦...你唔使返工咩?有無油炸鬼?」我病到瘟瘟地,開左保溫壺就直接喝,差啲淥親。




「慢慢啦你...仲食油炸鬼?你訓陣先嘞!腳浮浮咁!」
佢扶左我上床,仲幫我冚好張被...
「聽講呢...用女人個身體去取暖呢,啲病會快啲好嫁...」
「除埋衫仲好添,係唔係呀?訓啦!」佢錫左我額頭一啖,跟住我就好似中左魔法咁昏迷左...
醒返既時候,已經三點幾。望一望床邊,Mandy唔係度,唔通頭先發夢?由細到大都未試過有人探我病。讀中學果時,因為遵守左「中學生不應談戀愛」依條法則(其實係無女鍾意),所以從來無女同學黎過我屋企,更遑論探病。
我覺得自己好返啲,於是行出房睇下有無野食...
「衰仔,識左新女朋友都唔話俾我知!」我聽到阿媽把聲,擰轉頭已見到佢兩個坐係梳化度。
「吓?係啊,佢叫Tra...」我差啲講埋個「c」音出來,而Mandy已經企係我面前...
「吹咩野呀?」佢好似差佬審犯咁啤住我。
「吓?吹...我想吹...催你地煮野食,我肚餓...」




「哦!係咩,有粥啊,我整返熱佢啊!」
「唔該啊...」
佢入左廚房,同時阿媽企起身行到我身邊...
「衰仔,人地好女仔黎嫁,今次你真係要好好珍惜啊!Mandy呀,我來幫你啊!」
就係咁,第一次婆媳合作既白粥同炒麵就係我面前嘞!於是我又扮Gordon Ramsay咁,但係...病左食野係無味嫁...
Mandy係我屋企食埋晚飯先走,而係阿媽阿爸同家姐壓力下,令到我要送佢返屋企(但我係病人黎嫁喎...)。就係佢樓下,佢準備上去時,突然問我:「你有無野呃我?」
「無...梗係無喇!」打死我都話無嫁喇!
「嗯...我上去先喇,你早啲休息啦!拜拜!」
「拜拜!」
返到屋企,睇返電話,Coco仲未回覆我既提問,心諗可能涉及佢既秘密,都係唔好再追問。
當時分針踏入十二點時,facebook,whatsapp都傳來大量「Happy New Year」等訊息,有啲心思既就會影倒數既相,特別既好似阿明就同條女自拍,仲一齊舉起中指(頂佢丫)。然而,有一個無顯示名稱只有號碼既用戶傳來「Happy New Year」,我知道依個號碼既主人,係一個好耐無聯絡,仲以為以後都唔會再見既...
「Jack,等人收工呀?」高八度音波攻擊...
「係呀!不過聽講counter今日好多人,我諗應該有排等...」
「假期完左係咁,慢慢等,拜拜!」
「拜拜!」




同Coco講完拜拜,我繼續係公司樓下等Mandy。唔知點解,硬係覺得有人昅住我咁,或者係我神經過敏吧!