失戀200天後,我遇上的女孩們: 第八話
「Jack,仲要搞幾耐嫁?」
「唔...大約搞到三點零左右...」
「好,咁我落去食啲野,你早左搞掂你打俾我上返來鎖門。使唔使買埋你果份?」
「唔使喇,唔該!」
去到十二月,有兩樣野對我來講係超煩既,第一件就係公司系統大維護。每年都要有依個動作,同樣麻煩,麻煩在於等,一等要等上大半日,問題在於電腦速度,假如你認為電腦公司用既一定最新最好,我話你知依個係外界對我地既誤解,最新既當然用來賣錢啦,點會俾我地用?而家都仲好,係星期六整同系統快左,我聽講以前要整到夜晚十點都未搞掂。
「Jack哥!」高八度聲音,係Coco...
「咦?兩點喎!仲未走?」
「好多野做呀,咪OT囉!」佢好大力將埋文件拍落張檯度,「咁你仲要搞幾耐?」
「我諗仲要整多個零鐘左右。你無人約咩?星期六喎!」
「邊有丫...」
「你個Kenny呢?」
「佢?普通同事來咋,咪亂講呀!」
「咁你又打上電台祝佢生日快樂?」
「咁...唉!好平常啫!咁佢對我又幾好咁,好似哥哥咁...」聽佢語氣,彷彿千言萬語都講唔清佢地既事,我都無追問費時佢尷尬。
「咁你呢?」佢岔開話題。
「我?我散左好耐啦,你知嫁!咪返屋企訓覺囉!」此時電話震,有Whatapp...
「邊個來呀?」
「朋友啊!諸事八掛!」
個Whatapp係Tracy,果晚之後,我地有保持聯絡,但佢話要俾啲時間佢,我知道當女仔話要俾時間佢時,可以話係拒絕你,回想以前曾追過個女仔,同樣叫我俾時間佢,結果兩年後佢嫁左人。
「喂,你識Counter個Mandy喎?講個秘密你聽...」佢好細聲咁講,但其實附近得我同佢,「Mandy無拖拍嫁!」
「你又知?」依個消息應該係唯一阿明唔知既。
「佢講既!上次同佢講護膚啲野佢自己爆既...」
有人話男人既共同語言除左足球就係女人,而女人既共同語言相信係護膚品同鞋...
「你咁爆俾我聽你都好缺德啫...」
「咁我見你同佢好似好熟咁,有時又一齊返工放工咁,我以為你知添...」
「女人野我點知啫!」
「咁我下個約左人打羽毛球,禁啱朋友個朋友突然有事,差個人,咁Mandy都會去既,咁使唔使預埋你?」
羽毛球對我來講真係好陌生,對上果次打應該係二十年前畢完業同同學打過一次咁大把,正常情況下我應該唔去,但當聽到Mandy會去,我梗係say yes喇!
「Jack,Mandy,依邊呀!同你介紹,依個Jason...」
「你地好啊!」Jason禮貌地打招呼。
眼前呢個Jason一身古桐色皮膚,身形屬鋼條型,同我差唔多高,睇佢一身骨格精奇,就知道佢係運動高手。佢談吐有禮,個樣唔差,我敢肯定佢係Coco既目標(甚至已定為真命天子)。
而Mandy今日就著左件有領運動衫,雖然唔貼身但都浮現出其嬌人身材。
我同Mandy一組,Coco同Jason一組。開頭當然熱下身先,雖然封拍近二十年,但搓左幾十板之後,手感漸漸返來,而對方亦開始上力。
面對運動健將,我自覺無可能有得打,只希望跟到佢節奏就好。當然對方亦有少少放水,但我發現兩位女將卻認真起來。追波,搶波打,煞波,佢地就好似打奧運咁,搞到Jason要同我打個眼息,表示我地都要認真打。
「其實大家玩下啫,何必認真傷感情丫...」依個可能只係我自己一個一廂情願既想法,而我漸漸都被佢地感染。講默契,我同Mandy出奇地好,好少出現拍碰拍既情況,相反Coco就經常搶波打,搞到Jason有時不知所措。
「喂,你地打住先,我同Mandy休息下...」
於是我就要直接面對依個運動健將...
當然頭三四回都係俾我地回氣同捉大家打法用。當佢眼神一變,擺左個反手開波姿勢,我知一場硬仗要上演。頭幾板我仲可以還,但當佢一加速,敗象已露,而我只求輸得好好睇睇...
「你都打得唔錯喎!」Jason同我係更衣室沖涼換衫,「你有打開嫁?」
「我有二十年無打喇!你係羽毛球教練?」
「唔係。不過我以前係校隊,而家都係教練,不過係社區會堂度教啲老人家做運動呀,做下甩手操果啲囉...」
「哦...你同Coco好friend呀?」
「其實我係佢學長,我高佢兩年級,咁啱我地返同一個教會先識既。」
我地換完衫,走出大堂,等左陣(其實都有半個鐘左右),兩個女人施施然,有講有笑咁行出來。
「喂!我有野問你...」Coco無啦啦問我,「點樣先可以去廁所去快啲呀?」
我見佢搓住個肚問,於是:「哦!你想去廁所去快啲呀!咁你咪著對跑鞋,咁你去廁所咪快啲囉!」
除左Coco,我地三個齊聲大笑...
「我係講去廁所呀!」Coco起勢咁打我,一面不憤咁。
「我咪講去廁所囉!」
「唔同你講喇,再見!」
同Coco佢地講完再見後,我同Mandy就搭巴士返大埔。我同佢坐埋一齊,開頭我打算唔訓,因為我驚佢訓著會挨埋我度,而我訓左既話就支撐唔到佢。但唔爭氣既我上車幾分鐘後已比佢訓著先。
「喂...喂...醒啦!」我感到有人篤我膊頭,我濛濃咁醒左,「醒啦!落車啦,仲有兩個站就到總站嫁喇!」
我望一望出面,果然已經過左我地原本要落果個站...
「哦!落車啦!」我見佢仲未郁,「做咩?」
「不如我地搭到總站囉...」
由總站行返去我地住果頭大約要半個鐘左右(以我自己一個人行計),而我手臂隱約感到有一陣餘溫...
願永不分散~期望幻想一天~我是你終站~你輕倚我臂彎~