失戀200天後,我遇上的女孩們: 第九話

Jungle Bell~Jungle Bell~
好煩膠兼洗腦既音樂,一到十二月各大商場就一定播依啲音樂,其實聖誕節唔一定要播Jungle Bell,播Lonely Christmas唔得咩?再唔係今年沒聖誕囉!
我係十二月第二件煩既就係聖誕節。單身果時,為左唔好晒左啲假期,就要安排啲節目俾自己,但當出到街見到啲眼怨既情侶...到有拖拍嘞,又要為另一半安排節目同佢過,又怕佢唔滿意又驚唔合佢心意,都係一個字:煩!
「喂!你試埋依件睇下...咦!依件睇落唔錯,試埋佢啦!」
「試咁多?我得一個身咋,邊著得晒?」我特登細聲咁同Tracy講:「你睇下個sale好似啤緊我地,唔係幫襯就唔好試喇!」
「你放心,我講過送野俾你既,睇下你件褸!咁污糟都唔買件新?快啲去試啦!」
話說Tracy今晚約我出來話慶祝佢搵到份工,於是約左係銅鑼灣食飯,點知佢又話要買衫俾我,原本我以為係去啲平民化連鎖服裝店,點知係去間高級外國品牌服裝店,依度一件衫都成幾百蚊,俾我真係唔捨得。基本上,我啲衫未到爛我都唔會買新,加上我孤寒既性格,叫我買衫仲難過叫我買保險。
「得未呀?出來睇下!」
「嗱!依件唔啱呀...」我將最貴果件俾左佢,話唔要(其實我幾鍾意)...
「咁咪幾好睇,唔使換啦,咁著住走!」




「哦...多謝...」照鏡睇返自己,真係同出面啲男模服裝廣告一樣(唔睇樣既話)。
為左多謝佢同令自己個心舒服啲,我埋晚飯果餐單,而依餐係我有生以來最貴既一餐,食左差唔多千幾蚊。雖然肉赤但見到佢開心都值得既。
食完飯就送佢返屋企...
「多謝你啊!」正當我想講個新笑話時,就被佢搶窒左...
「唔多謝!今晚係出來慶祝你搵到工嘛,點知變左你送野俾我,應該我多謝你就真!」
「我唔係講依樣...」
「吓?咁講邊樣?」依個時候扮傻係我自己認為最正確既決定...
「我想多謝你肯出來陪我...其實我係個唔識處理感情既人,以為對人好人地一定會對你好,原來...只係我自己太天真...」
我見到佢眼角開始泛起微微淚光,於是我同佢係附近搵個公園坐低傾...
「我好細個果時,親生媽咪就已經過身,由於果時爸爸信個風水師講,話我個名格剋屋企人,所以細個我就交俾工人湊大,而佢就好少見我...」




「所以我好少信啲爛鬼風水佬!」我希望俾到少少鼓勵佢...
「都唔係既,聽講爸爸既生意自從疏遠我之後就越搞越大。咁到我大約五六歲時,爸爸就娶左auntie做後母,但佢唔同電視啲後母咁差,雖然初初有少少睇佢唔順眼...」
「係十四歲生日果日,阿Sam出現,佢係auntie果邊既親戚,無記錯佢大約十八歲左右,而果時佢係在場唯一既男性。係吹完蠟燭,佢錫左我一啖,由於我讀女校,依一吻算係第一次同男仔身體接觸...」
「咁你之後都無識過其他男仔?」依一刻我其實心裡有啲出奇既感覺,始終我地都係由性關係開始先...
「唔係,係外國留學果時都有識過男友,但阿Sam果一吻太深刻,令我投入唔到,所以畢業後我決定返來,禁啱佢又請助手,於是...」
佢抬高個頭望住個天,想將就流出既淚水倒灌返落眼度,可惜失敗左...
「上次你咪問我失蹤果個禮拜做咩既,其實我同佢攤牌。始終明白到幻想同現實係好大分別,期望越大,失望越大,或者佢根本就唔係我既王子,而我只係佢其中一個啫...」佢擰埋一面,唔想被我睇到佢喊個樣,而我就坐埋啲同攬住佢。
「都阻左你好耐,係時候走...我無事,返到屋企洗完面...訓個覺就無...」
一個人越話自己無事其實係最出事,尤其係女人。佢將個頭挨左我胸口度,我感到件衫漸漸濕透,但我無推開佢,反而更加抱實佢,咀哼住張國榮隻「風繼續吹」...
我勸妳早點歸去~妳說妳不想歸去~只叫我抱住妳~




悠悠海風輕輕吹~冷卻了野火堆~
我看見傷心的妳~妳叫我怎捨得去~哭態也絕美~
如何止哭~只得輕吻妳髮邊~
讓風繼續吹~不忍遠離~
心裡極渴望~希望留下伴著妳~