女神話我考試排名高過佢 就滿足我一個願望: 第五十二章

「我最愛嘅雪雪：

當你睇到呢封信嘅時候，我應該已經出咗國啦。

呢三年嘅時光好愉快，但係始終都會過去。

我諗我應該都返唔到嚟香港啦。

我喺半年前已經確診咗一種病，一種醫返好嘅幾率只有1%嘅病。





以你同我嘅智商都知到，1%究竟有幾低。

由嗰陣時我就喺到諗，我絕對唔可以同你講我有呢個病。

因為以你嘅性格，你應該會諗盡一切辦法，用盡所有金錢去幫我。

我更加唔想見到你傷心嘅樣。

你上次見到我喺日本，係因為呀爸同呀妹一直喺到搵緊辦法醫我，本身個醫生話有多少少幾率可以救返，但係邊個叫我遇到你呀，結果個醫生以我遲到為由而拒絕幫我。」





係因為我曉琳先會遲咗？

「事後呀爸一直喺到鬧我，但係我真係控制唔到自己，我真係想見多你幾面。

唔知你仲記唔記得，你細個嗰陣喺公園俾人蝦之後俾我幫咗你趕佢地走呀？

不過睇你個樣都知你唔記得啦。

嗰陣時覺得你好特別，點解你一開口就係話自己冇錢。





我開始一直留意你，每日都偷偷地跟住你。」

原來你就係琳琳……

「直到中二嗰陣時，呀爸唔知點解話要幫我轉校，咁啱就轉中你嗰間。

呢個就係點解我喺學校淨係同你親近。

見到你成績咁廢，就諗辦法幫你提高。

知你冇記性，就成日提你野。

同你講樣野，嗰次你同我平手，其實只係因為我讓你咋，我邊有咁易俾你追到呀？

但當你買咗雪、月之戒喺摩天輪到同我表白嗰陣，我真係好感動。





或者由我地第一次相遇嗰陣，我就已經對你有一定程度嘅好感。

所以我去到最後一刻，都係冇勇氣去同你講。

請原諒我，我愛你。
我無力地跪坐喺地下，淚水不自控地流下。

封信依稀可以望到乾咗嘅淚水，可以知道曉琳係喊住嚟寫呢封信。

如果嗰陣時我冇去叫停佢，如果嗰陣時佢冇跟我走，佢會唔會有多少少機會可以好返……

我成個人變得消沉，一直將自己困喺房入面。
------------------------------
聽日就係最後一章啦，




狗血結局即將上演啦。