女神話我考試排名高過佢 就滿足我一個願望: 第五十三章 （最終章）

「呀哥，起身啦，就嚟遲到啦！」雪彤說。

我坐喺櫈到打緊字。

「一早就已經起身啦。」我說。

今日係曉琳離開嘅第十年。

當初曉琳走咗之後，我成個人變得頹廢，係方野吉日日過嚟敲我房門，逼我參加陸運會我先慢慢走出呢個陰霾。





呢幾年嚟，除咗呀媽病死咗，雪彤同方野吉結婚之外，都冇乜大事發生。

順帶一提，我已經全面接管咗林氏企業。

咁多年嚟，有好多女仔同我表白，但係我始終冇應承。

除咗因為我睇得出佢地係為咗錢之外，仲有因為我一直放唔低佢。

我仲特登喺一個叫做紙言嘅網站連載我地嘅故事。





陳桂方擅自幫曉琳起咗個墳墓，我雖然唔認同，但係每逢特別日子，我都會買一束花俾曉琳。

每一次嘅花都唔同，但係佢地嘅花語都係愛或者思念。

今日都係其中一個要去買花嘅日子。

買完花之後，我同雪彤，方野吉就去咗曉琳嘅墳前。

「曉琳，我又嚟咗啦，今次買咗蝶戀花俾你呀，係咪好靚呀？」我說。





「你已經走咗十年啦，你係生係死我地都唔知，點解當初你要同我地斷絕聯絡呀？」雪彤歎氣。

對住曉琳個墳講咗十五分鐘之後，我就搭方野吉嘅順風車返咗公司。

方野吉宜家都嚟咗我地間公司做，佢同雪彤宜家日日喺公司放閃，就同以前喺學校一樣。

「老闆，今日有個新員工會嚟。」我秘書說。

「你去處理啦，我不嬲都唔理呢啲。」我說。

「係。」我秘書說。

不得不說，返工嘅生活真係好痛苦，仲慘過讀書。

當我做野做到中午嗰陣，我就諗住出去食午餐。





但當我開門行出去嗰陣，我唔小心同一個女仔相撞，我同佢一齊跌咗落地。

「對唔住呀對唔住呀！」個女仔說。

「唔緊要。」我說。

把聲……好似有少少熟……

個樣……好似有少少熟……

我扶佢起身。

「我地係咪喺邊到見過？你好似......有少少面善。」我說。





佢「噗嗤」一聲笑咗出嚟。

「雪雪，今時今日咁嘅識女仔方法唔得啦。」佢說。

雪雪？

唔係掛……

我呆望住佢。

「我叫陳曉琳，叫我曉琳得啦，請多多指教！」佢說。

《女神話我考試排名高過佢 就滿足我一個願望》完