女神話我考試排名高過佢 就滿足我一個願望: 第五十一章

新年假好快就完咗，又到咗返學嘅日子。

方野吉都仲係未有走嘅意思。

今朝曉琳冇嚟搵我。

平時佢都會嚟搵我，今次做咩唔嚟呢？打個電話俾佢先。

「喂？曉琳？」我說。





「雪雪？我發燒呀，你自己返學啦。」曉琳說。

「好啦咁，咁我放學之後再嚟探你啦。」我說。

之後我就收咗線。

又會無端端發燒都有嘅？

唉算叫埋方野吉起身之後就走啦。





「喂！方野吉！起身啦！」我輕拍佢塊面。

「得啦，又遲到啦嘛，即刻起。」方野吉說。

之後佢就彈咗起身。

今日因為方野吉嘅配合，我地慢慢行返學校都冇遲到。

訓導主任以一個驚奇嘅目光望住我地。







放咗學之後，我即刻去買粥之後去曉琳屋企。

「叮咚」我按響門鈴。

等咗三十秒，都係冇人出嚟開門。

「叮咚叮咚叮咚叮咚叮咚叮咚」我瘋狂按門鈴。

都係冇人出嚟。

我嘗試打俾曉琳。

「你打嘅電話暫時未能接通，請遲啲再打過啦。」冰冷嘅聲音。





第二次

「你打嘅電話暫時未能接通，請遲啲再打過啦。」冰冷嘅聲音。

第三次

「你打嘅電話暫時未能接通，請遲啲再打過啦。」仍然係冰冷嘅聲音。

曉琳去咗邊呀……

我就喺曉琳屋企門口呆坐，等陳桂方或者陳曉晴返嚟。

等到大約八點鐘嗰陣，都仲未有人返嚟。





呢個時候，有人打電話俾我，我即刻接聽。

「喂？」我急切地說。

「喂？呀哥？宜家八點啦，你喺邊呀？等你返嚟食飯呀！」雪彤說。

「我差唔多到屋企啦。」我說。

「咁快啲啦！」雪彤說。

食完飯之後先再嚟啦。

返到屋企用一個最快嘅速度食完野之後，我就準備出去。

行到門口嗰陣，雪彤叫停咗我。





「呀哥你去邊呀？」雪彤問。

「冇呀，出去行下啫。」我說。

「咁你記得帶鎖匙呀。」雪彤說。

我攞走條鎖匙之後就出咗去。

十五分鐘嘅路程好快，我又去到曉琳屋企門口。

「叮咚」我再次按響門鈴。

都仲係冇人出嚟。





十五分鐘後，陳曉晴終於返咗嚟。

「林浩雪？你坐喺到做咩呀？」曉晴錯愕地望住我。

「曉琳去咗邊？」我直接問。

「曉琳冇返嚟咩？」曉晴說。

「我知你講緊大話，曉琳究竟喺邊？」我說。

「佢出咗國。」曉晴說。

「出咗國？佢出國做咩呀？」我說。

「呢樣野……我唔講得。」曉晴說。

「點解？」我問。

「曉琳叫我唔好同你講。」曉晴說。

「點解……」我說。

「你問我都冇用，你返到屋企就會知啦。」曉晴面無表情地說。

「返屋企就會知？」我不解地問。

「唉你好煩呀，你返到去咪知囉。」曉晴不耐煩地說。

之後佢就趕咗我走。

返到屋企，我都唔明曉晴講嘅野係咩意思。

直至我入到房，見到檯面嘅一封信。