女神話我考試排名高過佢 就滿足我一個願望: 第四十二章
第二日起身嗰陣，雪彤心情已經平復。
「冇事啦？」我問。
「冇乜啦。」雪彤平淡地說。
「不如我幫你鬧爆佢呀？」我說。
我唔會放過任何蝦我呀妹嘅人！
「唔洗啦......」雪彤說。
「點解呀？你唔嬲咩？」我問。
「要嬲嘅，琴晚就嬲哂啦。」雪彤苦笑。
「你真係咁快放得低？」我不放心地問。
「放低咗啦，你又唔係唔知我性格。」雪彤說。
「冇事就好啦。」我說。
就算雪彤唔打算報復，我都會幫佢。
結果岳希晨今日冇返到學校。
唔知佢係病咗返唔到學，定係冇面見雪彤而唔夠膽返學。
但係雪彤知道岳希晨冇返學之後，有少少失望。
都話咗你放唔低㗎啦......
不過放低都需要時間，就俾佢自己一個冷靜下先啦。
～幾日後～
今日係二月十四號，星期日，有成日時間同曉琳出街。
「叮咚」門鈴響起。
「嚟咗啦？」我開門。
「預早啲時間，等間可以再行耐啲。」曉琳說。
今日曉琳著住一套黑色連身裙，無名指戴住月之戒，頭髮放咗落嚟。
「今日大把時間啦！」我說。
「時間寶貴呀，宜家行啦。」曉琳說。
「咁急做乜？食咗早餐未呀？」我問。
「係喎，唔記得食添！」曉琳傻傻地說。
「雪彤有煮早餐呀，食完再出去啦。」我說。
「咁好啦。」曉琳摸一摸個肚說。
短短五分鐘，曉琳就食完早餐啦......
我好懷疑佢嘅胃係咩構造......
「係呢，雪彤呢？」曉琳問。
「唔知呀，佢好早就出咗佢啦，都唔知佢去咗邊。」我說。
「臨情人節先嚟分手，雪彤一定好傷心啦。」曉琳擔憂地問。
「唔緊要啦，雪彤一定可以好快好返。」我說、
「咁我地宜家行啦！」曉琳說。
「係係～」我說。
「我地第一站去邊呀？」曉琳問.
「去海洋公園好冇呀？」我攞出兩張門票。
「好呀！我冇去過海洋公園㗎！」曉琳說。
「咁我地快啲行啦，下晝好多人㗎！」我說。
我地搭地鐵搭咗大約一個鐘到，就到咗海洋公園。
「呼，終於到咗啦......」我說。
「快啲入去啦！」曉琳說。
職員好求其咁幫我地檢查咗門票之後，就放咗我地入去。
「嘩，朝早真係好少人呀。」曉琳說。
「成班懶鬼未起身嘛。」我說。
「咁又係......」曉琳說。
「咁第一個玩咩好呀？」我問。
「不如去睇企鵝先呀？」曉琳提議。
「朝早去睇企鵝咩？咁早佢地應該仲瞓緊教掛......」我說。
「又好似係喎，咁就刺激啲去玩三百六十度迴旋過山車啦！」曉琳說。
「呢個提議唔錯，但係你著裙唔驚咩？」我擔憂地問。
「唔驚啦，佢地咁都睇得到嘅話仲係人嚟嘅？」曉琳說。
「咁我地行啦！」我說。
「坐前面好冇呀？」我問。
「好呀！」曉琳說。
因為好少人嘅關係，架車好快就開出。
一開始車速好慢，曉琳仲同我講好悶。
有玩過海洋公園嘅三百六十度迴旋過山車嘅人都知道，上斜嗰陣係好慢好慢，但當落斜嗰陣係快到癡線嘅。
所以當落斜嗰陣，曉琳直接嗌出嚟。
「呀呀呀呀呀呀！救命呀！」曉琳大力握住我左手說。
痛痛痛，曉琳嘅手指甲插咗落我啲肉到。
結果，我跟住佢一齊嗌出嚟。
過咗大約分半鐘到，架車就到站。
「終......終於到站啦......」曉琳好似劫後餘生咁。
「係咪覺得好慢呢？」我說。
「超，你明明都有嗌！」曉琳不服氣地說。
「我嗌係因為你啲手指甲插到我啲肉呀。」我展示手上嘅傷口。
「對唔住呀，係咪好痛呀？」曉琳輕撫我嘅傷口。
「OK啦，唔係好痛。」我說。
「唔好扮野啦，都見血啦。」曉琳說。
之後佢喺袋到攞咗塊膠布出嚟。
「宜家啲人隨身帶膠布咩？」我說。
「以防不時之需嘛。」曉琳說。
之後我地就玩埋其他機動遊戲，不得不提，海洋公園同迪士尼嘅機動遊戲嘅級數真係差好遠。
食完午餐之後我地就去睇動物。
「隻企鵝好得意呀！」曉琳邊講邊學企鵝行路。
「同你一樣呀。」我捏一捏曉琳塊面。
曉琳即刻紅面。
我地去咗睇好多動物，企鵝啦北極熊啦熊貓啦......
大約六點到，我地已經行咗大部分嘅景點。
「今日玩得好開心呀！」曉琳說。
「開心咪好囉！」我摸一摸曉琳嘅頭。
「係咪走啦？」曉琳問。
「梗係未啦，我地仲有一個景點未去呀。」我說。
「下？係咩呀？」曉琳問。
「跟我行啦，行到去你咪知囉！」我拖住曉琳嘅手行。
行咗大約五分鐘，就去到今日喺海洋公園嘅最後一個設施。
「原來係呢到，你唔帶我嚟我都唔記得添。」曉琳甜笑。
「你真係冇記性呀，咁到可以唔記得。」我說。
「咩喎，呢到有唔係迪士尼！」曉琳狡辯。
「咪又係一樣？」我說。
「唔同㗎，呢到啲景靚啲㗎！」曉琳說。
「咁就要坐過先知啦！」我說。
冇錯，我地最後一個設施就係摩天輪。
上年我就係喺迪士尼嘅摩天輪到同曉琳表白啦。
今年就嚟海洋公園嘅摩天輪啦。
等咗大約十分鐘到，我地就得上得摩天輪。
上去之前我望咗一望個工作人員，
呃......點解又係佢？
喺我眼前嘅，係上年喺迪士尼嘅摩天輪做工作人員嘅人。
又會咁啱都有嘅？
佢都發現到我，向我地笑咗一笑。
出於禮貌，我都向佢點咗頭。
摩天輪緩緩咁轉，我坐喺曉琳隔離傾計。
「真係估唔到，話咁快就一年啦。」曉琳說。
「時間過得真係快。」我感歎。
「都話呢到啲景靚過迪士尼啦。」曉琳說。
我望一望出面，啲景的確靚過迪士尼。
呢個時候，我地坐緊嗰架車廂去到最高點。
「你望下我嗰邊，睇到咸蛋黃呀。」我說。
曉琳聽到之後轉咗個頭過嚟，我把握好時機錫咗落去。
「嗯！」曉琳反應唔嚟。
去到我地坐緊嗰架車廂落到地下嗰陣，我地嘅嘴唇先分開。
「落去啦。」我說。
「嗯。」曉琳塊面紅哂。
之後我地求其搵咗間餐廳食飯，之後就送咗曉琳返屋企。
「我今日玩得好開心呀！」曉琳說。
「我都係呀。」我說。
「咁我返去先啦。」曉琳說。
「嗯，拜拜。」我說。
「拜拜。」曉琳說。
曉琳將嘴唇輕輕印喺我嘴唇上，之後佢就入咗屋。
我亦都自己返咗屋企。
入到屋，我見到方野吉同埋雪彤坐坐喺飯檯到食甜品。
「嘩！你兩隻野食甜品唔預我？」我說。
「收皮啦你，情人節放閃小心俾人打呀！」方野吉說。
「話說你地今日去咗邊呀？晨早流流就出咗去嘅？」我問。
「冇呀，求其出去行下咋。」佢地異口同聲地說。
「你地唔會係一齊出去掛？」我狐疑地問。
「冇啲咁嘅事。」雪彤說。
「唉唔理你地啦，我沖完涼就瞓啦，」我說。
「BYE.」雪彤說。
我沖完涼之後，就攤咗喺張床到，沉沉地睡去。