女神話我考試排名高過佢 就滿足我一個願望: 第四十一章

去到二月嗰陣，方野吉仲住緊喺我屋企。

「方野吉，仲有兩個禮拜就放新年假啦，你呀嗎仲未返嚟咩？」我問。

「未呀......我都唔知佢幾時先會返......​」方野吉無奈地說。

「咁你快啲食完個早餐去啦，遲到啦！​」我說。

冇錯，今日係要返學，而方野吉又遲起身啦......





「得得得，即刻食即刻食！​」方野吉說。

有驚無險又趕到返學校。

「大佬呀......好心你啦......早啲起身係唔會死㗎......​」我無奈地說。

「知啦知啦，我地又冇遲過到......​」方野吉說。

「我地好彩咋......​」我說。





後日就情人節+拍拖紀念日啦，點同曉琳慶祝好呢？

雖然佢係咁話唔洗特別買禮物俾佢，但係佢真係咁諗咩？

唉有排煩呀！

結果成日都冇留心聽書，成個腦都喺到諗緊點慶祝。

一放學，方野吉又唔知走咗佢邊，唉唔等埋佢啦，自己返佢先。





一返到屋企，發現雪彤都唔喺屋企。

又會冇人都有嘅？明明呢個時候雪彤應該喺房睇緊動漫先啱㗎。

既然冇人咁我去瞓個教先啦。

醒返嗰陣，雪彤同埋方野吉都已經返到屋企。

「你地啱啱去咗邊呀？咁遲先返嘅？​」我問。

「冇野呀，周圍行下咋。​」佢地同時說。

「你地一齊行？​」我問。

「唔係呀。​」雪彤說。





唔知係咪我錯覺呢？我覺得雪彤眼神好似有啲閃縮。

我望一望個鐘，原來已經七點半。

「好肚餓呀，食得野未呀？​」方野吉問。

「得啦我宜家去煮。​」雪彤說。

「所以你啱啱去咗邊呀？​」雪彤入咗廚房之後，我問方野吉。

「冇呀，見悶咪周圍行下囉。​」方野吉說。

「哦......​」我說。





我同方野吉一直喺到講緊老師壞話，講到雪彤煮完餸先停。

「食飯啦。​」雪彤說。

呃......今晚餐飯......嘅味道好似有少少問題。

就同中二佢知道我考試高分過佢之後煮嗰餐飯一樣咁難食。

我同方野吉同時向對方打咗個眼色。

雪彤放咗學之後心情好差咁，係咪發生咗咩事呀？

等間食完飯之後問下佢啦。

呢一餐飯食得好辛苦呀......





食完之後，雪彤即刻衝咗入房鎖埋門。

「你知唔知佢咩事呀？​」我問。

「唔知呀，M到掛。​」方野吉說。

「我入去睇下佢先，你去打陣機先啦。​」我說。

「哦。​」方野吉說。

之後佢就入咗房啦。

我輕敲雪彤房門。





「雪彤，有咩事呀？講俾我聽呀。​」我溫柔地說。

「我冇野呀。​」雪彤把聲好似啱啱喊完嚟咁。

唉對唔住都要做一次。

我用鎖匙開咗道門。

雪彤驚訝地望住我，面上流住兩行清淚。

「你......做咩喊呀？​」我關好門問。

「​嗚......呀哥......」雪彤突然攬住我。

「做咩呀？​」我問。

「希晨佢......希晨佢話要同我分手呀！​」雪彤說。

「下？點解會咁㗎？你地唔係一直相處得好好㗎咩？​」我錯愕地問。

「我......我都唔知呀......係咪因為我太樣衰呀？​」雪彤喊得好淒涼。

「點會呀，覺得你樣衰嘅人都係盲㗎！​」我說。

「嗚嗚......​」雪彤喊到收唔到聲。

「唔好喊啦。​」我輕拍雪彤的背說。

雪彤一直喊一直喊，直到佢攰到瞓着之後先停。

我將雪彤抱上床。

我額頭青筯暴現。

呢個係我成世人，最嬲嘅一次。

岳希晨！你一定要俾個交待我！