森林裏面遇見你: 二
嘉欣係我嘅中學同學，我地喺同一日出世，十八歲生日嗰日一齊去買六合彩，但我同佢唔算好熟。畢業之後我地好似冇見過，大大小小嘅聚會同婚宴都唔見佢嘅蹤影。
眼前嘅嘉欣比我記憶中嘅嘉欣仲要靚，但面上冇乜表情，感覺有啲冰冷。
嘉欣身上有一個與眾不同嘅地方──頭髮、眼珠，同皮膚嘅色素都比其他人淡，好似上帝造佢嘅時候唔小心加多咗水，望上去有一種透明感。
咁耐冇見，我地自然係講下大家嘅近況。佢而家係個鋼琴老師，啱啱喺通利教完琴，打算去尖東嗰邊逛下。
我唔係個多嘢講嘅人，但嘉欣比我更沈靜，所以講嘢嘅責任落咗喺我身上。我講咗一啲同學同老師嘅近況，佢就一路聽一路點頭或者微笑。我地並肩而行，有時有拖住篋嘅旅客喺我地中間穿過，有時迎面而來嘅蜂擁人羣逼使我地要一前一後咁行，所以我只能夠斷斷續續咁講。
突然之間，我發現我地上咗地面。
「做咩嚟咗呢度？」我問。
「唔知呀，我跟住你行㗎咋。」
我放棄咗去機舖嘅計劃。我地喺出口附近一間西餐廳坐低。
有關同學同老師嘅話題，我已經講得七七八八，而佢似乎對我嘅工作好好奇，於是我講關於我做嘅嘢。
「翻譯呢樣嘢最妙嘅地方，係做完之後事情嘅本質冇改變。我估呢個就係我仲未討厭呢份工嘅原因。當然啦，人工都係一個考慮，對我呢啲中文系畢業嘅人嚟講，算唔錯㗎喇。阿爸阿媽知道我考到呢份工之後，即刻開心晒。」
講咗幾句，我發覺我嘅工作本身冇乜有趣嘅嘢可以講，於是就講下我喺辦公室嘅所見所聞。
「我地翻譯組有好多怪人，其中一個就係翻譯組嘅主管。我地叫佢『玲玲姐』。入到佢間房，你會第一時間見到一棵人咁高嘅大葉植物，入到去之後就要拎轉身先見到佢，因為佢唔係好似一般人咁坐喺見到房門嘅位置，而係背靠住房門嗰邊嘅牆。房入面仲有好多銅錢呀，水晶呀，貔貅呀，葫蘆呀呢啲古靈精怪嘢。聽聞佢仲會算算下屬嘅生肖同出生日期同自己夾唔夾，如果夾，佢會對嗰個人好好，無論做錯啲咩都會包容；如果唔夾，佢就事事挑剔，逼到嗰個人自己要求調職。」
「咁佢對你好唔好？」
「我調咗嚟呢度幾個月，佢對我唔算好好又唔算好差，我諗我地嘅命格唔算好夾又唔算好唔夾啦。我又聽聞就算命格唔夾，仲可以用另一個方法喺度生存，就係參加啲所謂活動。話說佢老公係個村長，佢成日都會幫老公搵人參加活動，極參與嘅話呢，就會得到特別關照，仲會收到報酬。如果參加遊行呢類大型活動會有幾百蚊落袋，就算去小型啲嘅集會或者嘉年華都可以賺到一餐晏。」
「我地office嘅另一個亮點就係坐喺我隔籬嗰個中女。佢每日都有一個顏色，如果嗰日係黃色，就從頭到腳──由頭飾、耳環、上衫、裙、手袋、絲襪到鞋──都係黃色；如果嗰日係粉紅色，就從頭到腳都係粉紅色。所以啲同事就叫佢『襯色姐』。佢地話佢身上嘅都係名牌喎，但我就睇唔出囉。仲有幾個同事每日都會估下佢嗰日嘅顏色，估中嘅話食晏就唔使夾錢。」
「咁佢個粧係咪都會襯埋色㗎？」嘉欣問。
我對襯色姐化咩粧唔係特別在意，嘉欣問起，先喺記憶裏面搜索。佢面上有一層厚過灰水但完全遮唔住歲月痕跡嘅粉，上面嘅顏色，冇錯，同衣著嘅顏色配合。
「係，連個粧都襯埋，眼皮上面嘅顏色係完全一致，至於唇膏同胭脂，可以嘅話都會盡量襯返。我相信如果佢買到綠色同藍色嘅唇膏同胭脂，都一定會搽上面。」
嘉欣笑咗。我估唔到佢可以笑得咁甜，比我嘅感覺就好似寒冬之中嘅太陽，令人感動，但正沈醉喺當中嘅時候，又突然消失得無影無蹤。
侍應將我地叫嘅食物逐一放喺枱面。我地暫停傾偈，專心食嘢。
食食下，嘉欣突然問：「家俊，你估我可唔可以做你嗰啲工？」
「返寫字樓當然冇你教琴嗰個工作環境咁單純啦。」我答。「有時有啲好奇怪嘅人做啲好奇怪嘅事，好似我地玲玲姐咁，但又唔係個個都咁衰嘅，有時仲會見到好似襯色姐呢啲有趣嘅人。」
嘉欣冇反應。佢好似聽到我講，又好似聽唔到我講，然後又好似突然諗到啲嘢。
「對唔住呀！」佢話。
「咩事？」
「其實我唔係冇反應，但唔知點解，當我喺心裏面諗咗一啲嘢，我就覺得已經講咗出嚟。」
見佢一路講一路皺起眉頭，我就同佢講我唔介意。
「有一日，我突然發現自己原來一直以嚟都係咁，」佢繼續講，「跟住我就成日提自己唔可以咁樣，但有時又會唔記得。」
「慢慢嚟啦。」我安慰佢。「見多啲人，講多啲嘢就得㗎喇。」
佢諗咗一陣，然後問：
「我可唔可以再同你傾偈？」
「梗係可以啦！」我答。「但今日我係因為佔中先咁早收工，平時冇咁早。」
「你平時收幾點？」
「五點四十分。」
「我星期五嘅堂上到六點。」
「咁就下個星期五啦。」
「好呀！」
食完飯，我地一齊行返去地鐵站。行行下，嘉欣突然問：
「你仲有冇睇波？」
佢咁樣問，我先記得。我亦估唔到佢記得。
讀書嗰陣我地冇乜點傾過偈，唯一一次，就係講睇波。我地都有一個情「意」結。
嗰年係二零零零年。嗰年歐洲國家盃嘅決賽隊伍係意大利同法國。法國一開始就好進取，有幾次差啲入到，但反而係意大利喺下半場開始冇幾耐先入一球，法國到補時嗰陣都未能夠追和。睇到呢度，我同喺場邊準備衝出嚟慶祝嘅意大利後備球員一樣興奮，點知喺最後幾秒，韋托特踼咗個波入龍門。加時嗰陣，查斯古特再入一球，法國搶走冠軍。我心碎。
之後嗰日，我同嘉欣都要喺學校一個活動入面幫手，我地兩個都烏眉瞌睡，講起先知原來大家都有睇之前嗰晚嘅比賽。我估唔到一個咁文靜嘅女仔都會睇波，仲同我一樣因為意大利反勝為敗而感到非常沮喪。起初我以為佢係鍾意意大利啲靚仔球星，點知原來佢同我一樣，係因為睇過一九九四年嘅世界盃決賽而有情「意」結。
一九九四年，我地都讀緊小學，都係第一次睇世界盃。意大利喺決賽嘅對手係巴西。兩隊經過上、下半場同加時，超過一百二十分鐘嘅激戰，仲未分出勝負。烈日之下，球員大汗揼細汗，仲有幾個轆喺地上面痛苦咁舉住抽筋嘅腳。兩隊按球例用十二碼決勝負，射門嘅同守門嘅都緊張到氣都唔敢抖。喺關鍵一刻，巴治奧將波踢咗上半空，呢邊嘅巴西球員瘋狂歡呼，嗰邊嘅意大利球員抱頭痛哭。而喺地球嘅另一邊，有兩顆小心靈俾佢地嘅淚與汗牽動。
「我對上一次睇嘅，應該係一二年歐國盃決賽，但睇睇下瞓著咗。」我答。「今年世界盃我都冇睇。」
「咁零六年意大利攞冠軍嗰場你有冇睇。」
「冇呀，嗰時忙得滯錯過咗。」
落到地鐵站之後，我同嘉欣一齊行咗一段路。
「你住喺邊？」我問。
「大圍。你呢？」
「筲箕灣。」
佢行去往紅磡嘅月台，我行去往中環嘅月台。
想當年，我喺一間雜誌社做電子遊戲雜誌嘅編輯。呢份工對鍾意打機又喺中文系畢業嘅我嚟講係夢寐以求嘅工作，每朝起身，我都懷住興奮嘅心情返工。雖然人工好低，父母有啲微言，但我唔在乎，只係想發揮自己嘅才華，喺工作上得到滿足感。
嗰間雜誌社嘅規模好細，只有兩個編輯。我同拍檔合作無間，直至二零零六年頭，佢無端端俾老闆炒咗。
我一個人做晒兩個人嘅嘢，日以繼夜，夜以繼日，覺都冇得瞓，何況睇波？意大利攞世界盃冠軍，我都唔可以親眼見證。
撑咗一段日子之後，我開始覺得個腦處於飢荒狀態，只有消耗，冇營養補充。我成日同老闆講我就嚟撑唔住，叫佢盡快請返個人，佢每次都話已經請緊。我啲稿寫得越來越差，仲試過因為資料錯誤俾人投訴。
一年之後，老闆請咗個編輯返嚟，我終於守得雲開見月明。我好用心咁教新人做嘢，希望佢可以快啲上手，幫輕下我。
有一日，老闆叫咗我入房，佢話我嘅工作表現好唔理想。
我俾佢炒咗。
冇嘢做嘅日子，我每日都瞓到下晝先起身，好似要還返之前幾年欠落嘅睡眠。起身之後，就覺得個人輕飄飄，好似懸浮游喺空氣之中。
阿爸阿媽好擔心我。有一日，阿爸遞咗一張報紙畀我，上面有一個用紅筆畫嘅圈，圈住嘅係「二級法定語文主任」，就係我而家做緊呢份工。