森林裏面遇見你: 一
嗰年，我喺金鐘道政府合署返工。我係一個二級法定語文主任，負責翻譯。
我所認識嘅金鐘，係中環邊緣嘅一個小小地方，有高貴嘅酒店同時尚嘅商廈，有令人目不暇給嘅商場同充滿鳥語花香嘅公園，仲有個得過設計大奬嘅政府總部。好似冇咩可以挑剔。
「喂！你收唔收到呀？」坐喺我隔籬嘅一級法定語文主任「襯色姐」問。
「收咩？」
「E-mail 呀！全座QGO要疏散！」
我打開內聯網，見到一封四點零三分發出嘅電郵，內容係因安全理由，全幢金鐘道政府合署嘅人都要立即撤走；萬一發生大型暴動，聽日就唔使返工。
佔領中環發起人喺前一日宣佈佔領行動正式開始，跟住就有好多人湧嚟金鐘。佢地同警察對峙，仲衝破咗警察嘅防線。
警察喺夜晚放催淚彈驅散人群，但之後啲人又返返嚟。雖然金鐘道唔喺佔領區核心，但都有唔少人聚集。
「CEO問過喇，係堅㗎！」有人大嗌。
我聽到熄電腦嘅聲同執嘢聲。同事們陸續離開。
身邊好多同我差唔多年紀或者再後生啲嘅人都支持以佔中爭取真譜選，相反，阿爸阿媽同其他長輩就係咁鬧啲佔中嘅人。
至於呢個辦公室嘅人點諗，我就只能夠憑年齡嚟推斷，因為大家都唔會輕率咁表明自己嘅立場，就算講，都係談論下事態發展、交通情況、有冇機會唔使返工等等。
我就一直都傾向民主派，以前都去過「七一大遊行」，但近年已經冇去。我對佔中冇咩睇法，亦冇諗過參加，但我嘅生命偏偏因為呢件事而起咗變化。
離開政府合署嘅時候，我見到街上面有好多人聚集，但氣氛平靜。我估部門係怕入夜之後越嚟越多人，會出現好似尋晚咁嘅場面，於是叫我地早啲離開。
我聽講金鐘站其中一啲入口封咗，但我用開嘅入口冇受影響。我搭咗一個站去尖沙咀，打算去一間以前成日去但好耐無去嘅機舖打機。
喺尖東站搵緊出口嘅時候，我撞返嘉欣。