[旅行鬼故事系列] [陳生返黎啦] 澳門旅遊之陰魂不散的傳教士: （二十七）
「喂！老豆，點呀？」天賜說。
「講咗樣重要嘢先！你同新抱仔點呀？」天命叔口中的重要事還是關於阿詩。
「我D嘢陣間先講啦！子鋒同阿奶係咪好大鑊呀？」天賜臉上紅了一紅，然後轉移話題。
「我唔理呀！你唔講你搞成點，我唔會幫個死仔包架！快D講啦，咁大個人怕咩羞呀！」天命叔一下看穿了天賜。
「唉，你……係啦係啦，搞掂啦，佢係你新抱啦！」天賜小聲地說，大慨是怕我偷聽吧！
「你講咩呀？講大聲D講清楚D啦！都唔知你講咩！」天命叔跟他開了個玩笑。
「我話我同阿詩求咗婚，佢應承咗，咁得未呀！」天賜幾乎用咆哮的聲音對著電話說話。
「得啦得啦，我錄低咗啦！果然係我個仔呀！我會幫你播俾D親戚聽架啦！」天命叔在電話裏高興的說。
「你……」天賜正想發作，但天命叔又豈會給他機會，忙打斷他的說話。
「好啦，新抱仔果邊等你返到嚟，我地再去見新抱仔屋企人啦！至於子鋒呢邊，我問你一個問題先，你覺唔覺佢有D咩奇怪？」天命叔轉回了認真模式，使天賜不便發作。
「呢層……啱啱我都發現，佢嘅靈力有D唔同咗！同埋，佢今日喺防空洞入面，俾隻魔鬼捉咗入夢度，雖然子鋒順利消滅咗佢，但佢竟然記唔起點消滅佢！而佢嘅力量，就喺之後變得……更加強大……我都唔知點形容好……」天賜也找不到合適的字眼去形容我的情況！
「佢靈力又增強咗？無可能……我一直都有控制佢增長嘅情況……你等一陣先！小詠，你試下將你同子鋒連接嘅通道打開，睇下成唔成功，成功嘅話幫我感受下，睇下同以前有無分別！」
「小詠佢嘅力量恢復得咁快咩？已經可以打返開同子鋒嘅連繫啦？」天賜略感驚訝。
「小詠嘅力量的確恢復得比想像中快！不過，因為咁我就更加擔心，好似係為咗迎接D事而加快咗成個進程！唉……」天命叔罕有地歎了口氣！
「老豆，係咪有咩事？」天賜當然感到有些不尋常。
「算啦，暫時都無事嘅！我會諗辨法架啦，總之等你地順利返到香港再算啦！好啦，衰仔，你聽住啦，雖然今次嘅卦象並唔係大凶，亦睇唔到有咩性命危險！不過，今次你地竟然叉咗隻腳落去班天使魔鬼嘅地盤度，咁就真係有D麻煩！」
「吓？唔係我地想踩佢地地盤架，係佢地搵上門架！」
「呢層我都知，不過……唔緊要啦！依家最重要係，點樣保住子鋒同佢女朋友者！衰仔，你聽住，雖然你靈力唔及子鋒，又因為追求果D乜鬼科學而好耐無跟我練功，但係你識嘅咒印應該唔會唔記得架啦！」
「應該記得嘅！」
「咁就得啦，我啱啱同果個死仔包講咗五雷咒嘅口訣，你幫我同佢練習下啦！另外，果條死仔包又偷咗我道九字護身符咒，陣間你叫佢將個符咒俾你啦，果道符係經過我作法，如果真係有D咩大鑊嘢，你用你嘅血去做導引，到時包你地見到勁過日出嘅光芒，淨化一切！」
「吓？點解唔俾子鋒用呀？」
「第一，佢學咗五雷咒嘅話，我估佢都只會用五雷咒去消滅D魔鬼，始終五雷咒係以殲滅為目的嘅咒法！九字護身法係以淨化為主嘅咒法！所以，以果班爛仔魔鬼做對手，五雷咒會有效D！第二，道符係用我嘅靈力同血液而製成嘅，你同我係父子，點都有效過子鋒去用！第三，始終小詠話感覺子鋒身邊嘅朋友有事，呢一刻都無辨法肯定果個係咪阿奶！萬一係其他人，你拎住道符，都叫有第二個保險！」
「好，咁我明啦，我會拎道符架啦！」
「而且，你道符分分鐘未必係對付魔鬼而用！」
「咩意思呀老豆？」天賜疑惑地說。
「我雖然提醒咗子鋒，要佢控制自己嘅力量！但係……我好驚佢會出現暴走嘅情況！如果真係咁樣，到時就靠你去抑制佢嘅力量！只要捱到返嚟香港，我就可以幫到佢！」
「我知架啦……」天賜看了我一眼，看來是在談論我呢！
「仲有，你同子鋒仲有其他人講，無論任何時候，心都要定！魔鬼同其他邪靈其實都一樣，會睇準中人軟弱嘅時候作出攻擊！大部份呢D嘢都唔會想喺人間度搞事，所以大部份時間都係喺夢入面搞你地！而夢入面，大部份都係意志力決勝嘅時間！所以，同你班朋友要好好交待，無論佢地信唔信都好，唔想有咩事就一定要記住兩個字，心要定！」
「我明啦老豆！但係……」
「但係咩呀？」
「你啱啱講果度係三個字喎！」
「明就得啦，正衰仔嚟嘅，你唔講啲人會當作者打錯字架啦無人會當你啞架！」
「得啦！咁我返去通知佢地啦！聽晚返嚟再同你傾啦！」天賜忍不住笑說。
「好！呀，仲有！你有無俾隻玉戒指新抱仔呀？」
「我未呀，同埋佢都未必會戴啦！」天賜尷尬的說。
「你陣間就好俾佢啦，玉戒指都有辟邪作用架！」
「好啦好啦！唔講啦，我同子鋒行開咗好耐，唔想其他人擔心！」
說罷，天賜便掛斷了電話，我則陰陰嘴在笑！
「笑咩呀死仔！」天賜一拳打在我的小腹上，幸好我訓練有素，把它擋下來了！
「你頭先駛唔駛咁大聲講你同阿詩求婚呀，搞到成間酒店都知啦！」
「最衰都係老豆！如果唔係我會咁，你即刻同我忘記頭先嘅嘢！」天賜一副要把煎皮拆骨的樣子。
「咁又唔得，忘記咗嘅話咁我就學唔識五雷咒，學唔識五雷咒阿奶就會有危險，阿奶有危險我去救佢又咩都唔識嘅話，咁就會到我有危險！我有危險嘅話……」天賜手刀劈向我的喉頭，幸好我低頭剛好閃過了！
「你有兩條路，一係忘記佢，一係依家死喺呢度！」天賜目露兇光的說。
「得！我投降！我咩都唔記得，我咩都唔同佢地講！咁得未？」我舉高雙手作投降狀。
「哼，咁就算你啦，講返正經啦，頭先……」天賜突然停止了說話，然後轉頭看著我，因為他知道我可不會輕易投降！
我露出了笑容：「我話唔會講者，無話唔會播俾佢地聽喎！我走先啦！」
天賜攔截了正想逃離的我：「你同我老豆果然係同一類人！唔俾D教訓你都係唔得！」
然後在酒店的走廊上，上演了一幕十八禁的血腥廝殺場面！
「好！好啦！我可以講返正經嘢啦！頭先老豆話，要你俾道九字護身符咒我，仲有就係要提大家心要堅定！因為其他人都有可能係目標嚟！聽唔聽到呀？」
我從血泊中站起來：「聽……聽到啦！道符我依家俾你啦，但你後面講果樣嘢，我諗阿奶未必會聽！」
「點解？」天賜接過符咒。
「因為佢就係因為有所懷疑，先會俾D魔鬼睇中！你講就照講啦，不過我估用處不大！但唔緊要，我一定會保護佢！」我信心堅定地說，體內的靈力仿佛在回應我的信心，不斷地快速流動著。
天賜憂心的看著我：「老豆叫你要控制住D力量，如果唔係會好麻煩！」
「我……我明架啦！如果對手係可以控制力量就對付到嘅話……」說實話，我也頗害怕自己的力量，當我回想起詹姆士在觸碰到我的力量時，那種可怕的死狀，我就有點不自在了！
「無事嘅！總之今次有我係你身邊，你盡力去控制就得架啦！我會幫你！」天賜拍了我的肩膊一下，便使我冷靜下來，不愧是我的好兄弟！
對，現在我的力量如此充沛！
再加上又有天賜這個好兄弟幫我，我又有何足懼！
今晚應該便是關鍵，看我把來犯者全部消滅吧！