[旅行鬼故事系列] [陳生返黎啦] 澳門旅遊之陰魂不散的傳教士: （二十六）
「喂，醒下呀！醒下呀衰仔！」我隱約聽到天賜的聲音在呼喚我。
「醒呀喂！再唔醒我就講晒你D衰嘢俾阿奶知架啦！」真的是天賜的聲音。
我張開雙眼，看見只有他一人在我身旁！
「其他人呢？我……我喺邊呀？」我有點神志不清。
「佢地喺防空洞出面！頭先見你仲未出嚟，咪入嚟搵你囉，點知就見你暈咗啦！」他把我扶了起來！
「咁我暈咗幾耐？」我稍為清醒了，想起了剛剛被那魔鬼捉了進夢中，最後……好像是我消滅他的，但我怎麼好像忘記了些東西？
「唔係好耐者，啱啱我地發現唔見咗你，到我入嚟搵返你，都係一分鐘左右！」天賜看了看手錶，再對我說。
「原來咁短時間……」人是清醒了，但硬是有點東西想不起來！
「點呀？頭先又發生咩事？」
「無，之前引咗我同阿奶去夢入面果隻魔鬼，啱啱俾我解決咗！我估已經無事啦！」我按著額頭回憶著，算了，想不起就算了！
「吓？嚟到呢度都搞你？但奇怪啦，你又話佢地目標係阿奶嘅？點解又會搞你？」天賜問。
「我都唔知！」對啊，真的是一言驚醒洛克人，我完全沒有想過！
「會唔會仲有其他魔鬼，會再襲擊阿奶架？」天賜分析。
「你……講得啱！我無諗過呢點……」這才想起，詹姆士曾說，他來找我是他的主意，想吸收我的力量，看來我的記憶真的有點混亂！
「唔緊要啦，我同你返出去先啦！廢事佢地擔心！你都唔好諗咁多住啦，頭先我都係做個假設者，都有可能唔啱嘅！行唔行到呀？」
「行到！唔駛扶，我唔想佢地擔心！」其實我真的不覺得有任何不適，反而感到身體很有力氣，而靈力好像被之前更強！
「咁得啦！我地依家快D返酒店，食完嘢就打俾我老豆，等佢幫你起支卦搞搞佢！」
我和天賜離開了防空洞，和他們會合後，便乘坐纜車離開了！
回到酒店，剛好六時三十分，可以開始享受我們的晚餐了！
「Yeah！正呀，有嘢食！我地出去拎嘢食啦，駛唔駛留個人喺度睇住呀？」阿奶問。
「我地貴重嘢跟身，都唔駛留個人睇住嘅！擺低D旅客地圖，等我地容易D認住張枱啦！」雷少提議。
我們把整個自助餐區域都走了一遍，年輕就是我們的本錢，基本上看到甚麼想吃的都毫不猶豫去拿！
回到我們的桌前，那種盛況真是……太嚇人了！
「我地會唔會太誇張啦？」冰冰回來時也嚇了一跳！
「唔……唔會嘅！」就連阿詩也比平時要選擇了較多的食物。
「咦，阿詩你有咗呀？好少見你食咁多嘢喎！」我可不會放過這種開玩笑的機會，只是今天受到的攻擊是以往的兩倍，天賜和阿奶的聯合攻擊可不是說笑的！
「呢度D海鮮好好食呀！」阿奶拿著整隻蟹腳，開心的說著。
「估唔到呢間連生蠔都有得食，真係正！」雷少也附和著。
「識食梗係食乳豬啦！嚟澳門唔食乳豬點得！」我說。
我們就這樣吵吵的用餐，過了一小時後，大家基本上都把想吃的東西吃過一遍了！
「冰冰、阿詩！不如……行啦？」阿奶用興奮的眼神看著她們。
「會唔會太快呀？」冰冰說。
「唔緊要，睇下有咩先囉！」阿詩看來也挺期待的。
然後三人一起離座了。
「佢地幾個搞咩呀？」我不解的問。
「食甜品啦！」雷少和天賜同時回應。
「唔係卦，食咗咁多嘢，咁快又食甜品？」我驚訝的道。
「你唔知咩？女人有兩個胃架嘛，一個裝甜品，一個裝其它嘢食！」雷少回應。
突然，一位侍應走到我們附近。
「請問係咪張天賜先生？」天賜點頭回應。
「想覆返你，已經搵到張天命先生，佢亦都留低咗聯絡方法！如果你地需要搵佢，可以隨時去接待處，我地會安排幫你地打返俾佢！」
說完後，他便離開了。
「點呀，今次又好大鑊呀？」雷少雖然跟我們在同一間房，但因為他不像天賜般有保護自己的能力，所以我沒有特意告訴他此次的情況。
「都唔係嘅！不過今次睇中咗果個唔係我，而係阿奶！所以成件事變得麻煩！沖住我而嚟都好D，但沖住阿奶，我就唔係咁放心，所以都係想搵下天命叔，睇下Check唔Check到啲咩咁囉！」我簡略地解釋了一下！
「不過唔駛擔心嘅，子鋒已經喺頭先消滅咗果隻魔鬼，應該唔會有事架啦！」天賜也不想讓雷少太過憂心。
「咁就好啦！不過點解你無啦啦會消滅咗果隻嘢嘅？佢唔係想對付阿奶嘅咩？」雷少的頭腦比想像中要清晰！
「呢層……」我正想著應該怎麼回應，阿奶她們回來了。
「小雷，出面好多甜品呀！我想全部都試呀，你可唔可以幫我……」冰冰用懇求的眼神看著他。
「呀……得，你食唔晒俾我啦，我幫你食！」雷少無可奈可地說。
「太好啦，我地陣間可以再出去拎嘢食！」冰冰高興的看著阿奶和阿詩！
我和天賜對望了一眼，為了避免成為下一個犧牲者，我們隨便作了個理由，好讓我們消失一段時間！
既可以避過甜品地獄，也可以爭取時間找天命叔！
始終我也不認為事情這樣就能完結！
在去接待處的途中，天賜一直奇怪的看著我！
「做……做咩係咁望住我？未見過靚仔咩？」我有點不自在。
「靚你個死人頭！我只係覺得，點解你身上嘅靈力，好似有D……有D唔同！」天賜凝視著我。
「其實，我都覺得有D古怪！我喺防空洞出返嚟之後，就感覺到自己嘅力量好似......好充足咁！而且比起我之前，連靈力嘅容量都好似多咗咁！」我也感到奇怪！
「你喺防空洞入面有無咩特別事發生過？」
「其實我唔係好記得成件事係點！我好似有一部份嘅記憶無咗，以前從來無試過！」
「咁奇怪？算啦，暫時唔好諗啦，搞掂咗眼前呢單嘢先啦！係呢，你諗住問老豆D咩呀？」
「呢層……其實我應該可以保持心境平靜，唔受其他嘢干擾啦！所以我想知道，天命叔有無對抗過呢D所謂魔鬼！有無咩方法可以容易D對付佢地！如果唔係，下下都用晒我D靈力，我真係幾多條命都唔夠死！」
談話期間，我們已經來到接待處，交待了兩句後，工作人員便替我們致電給天命叔了！
我還真的有點好奇，為甚麼天賜能弄到這樣好的房間，而且連職員也對我們服務得這麼好！
「兩位，我已經搵到張天命啦，你地可以去同佢講架啦！咁我出返去先，你地講完就咁收線就得架啦！」工作人員交待好後，便離開房間了。
「喂！天命叔！」我拿起電話便說。
「都叫你唔好去澳門架啦，今次又點呀？」天命叔在電話另一頭，中氣十足的說。
我簡單地交待了事情後，便繼續詢問。
「好啦，事情就係咁啦！我仲有D嘢想問嘅！第一：我想問，你之前有無對付過所謂嘅魔鬼，佢地有無咩弱點之類，我次次對付佢地都就死就死咁！第二：有無咩咒印係可以穩定心神，降伏心魔指印已經唔係好有效！第三：之前你教過我嘅新咒印，你可唔可以講埋俾我知點用？」我把握時間問他。
「唉.…..算啦，今次嘅情況，我都有疏忽嘅地方！簡單答返你，其實一早都同你講過，無論係咩類形嘅非人之物，佢地都有力量嘅來源點，人嘅力量來源係心臟，鬼魂嘅力量來源喺思念體，係會移動嘅！魔鬼嘅力量來源係印記，佢地背叛咗神，被神施以印記，呢個種族嘅生物都會有印記喺身，只要你破壞佢，佢地就自然會死！感應嘅方法已經教過你，我唔多講啦！至於穩定心神，我都講過好多次！咒印只係一個輔助，最重要係自己嘅意志力！而最後，五雷咒嘅口訣係......」
聽完天命叔的說話後，我趕緊把口訣記下來，我一定要盡快掌握下來！
「好啦！我仲有嘢同你講！就係你女朋友，喺你離開咗道壇之後，小詠曾經講過，佢感應到你朋友會有問題！依家睇嚟，就係你女朋友出事啦！因為我無佢嘅時辰八字，我無辨法好好咁幫佢起卦！但既然小詠話喺你身上感覺到你朋友有事，所以我已經幫你卜咗支卦，睇下有無幫助！你可以放心，今次支卦並唔係大凶之象，只係，你要記住，關鍵喺你嘅力量身上！我唔知喺你身上發生咗咩事，但你一定要控制好自己，如果唔係成件事就會變得好麻煩！」
雖然我聽不太明白，但還是先答應好了！
「最後，你返嚟香港記得第一時間嚟搵我，我要再幫你起過一次命盤！」
「好，無問題！」
「好，咁你叫天賜嚟聽啦！我有嘢搵佢！」
我嚇了一跳，這維園大叔有透視眼嗎？
天賜完全沒有出聲，但他竟然知道他就在附近！
我示意讓天賜來接聽，我則在背頌著口訣，希望能盡快掌握新咒術！
當然，甚麼也不發生才是最好的！
但......我想這是一種奢侈吧！