[旅行鬼故事系列] [陳生返黎啦] 澳門旅遊之陰魂不散的傳教士: （二十八）
我和天賜回到自助餐區內，只見雷少捧著肚子，像快要撐死了似的！
「你地返嚟就好啦！我就嚟……就嚟要死啦！」雷少痛苦地說，到底他被逼吃了多少甜品？
「子鋒、天賜，你地返嚟啦！啱啱去咗邊呀？」阿奶熱情地說，有點不對勁！
「無呀，頭先D職員同我地講，因為我地係用優惠價入住呢度，所以要填返D資料！又廢事無晒人，咪我同子鋒去搞囉！你地做過D咩嚟，點解雷少好似好辛苦咁？」天賜扯開話題。
「無呀，頭先阿詩、阿奶同埋我出咗去拎甜品食，我地又想盡量試多D，咁咪拎返嚟Share囉！點知小雷好好咁幫我地食，所以佢依家咪咁飽囉！小雷你話係唔係呀！」冰冰看著雷少，雷少無奈地輕輕點頭！
「係啦，雷少真係好呀！不過我諗佢食得太多啦，俾佢抖下先啦！係喎，子鋒、天賜！你地都應該食架啊？我地仲有好多未試架！」阿奶挽著我的手臂說。
我俏俏的跟天賜打眼色，只見天賜無奈的搖了搖頭，眼神瞄了阿詩一眼！
原來阿詩臉露笑容，卻把目光移到一旁，避開天賜和我的求助，看來是跑不掉了……
「食，你拎咩返嚟我都食！不過依家先八點半，仲有個半鐘，我地慢慢食啦！」我知道跑不掉，唯有使出拖字訣，但阿奶也是省油的燈。
「梗係啦，我地拎埋剩低果D返嚟慢慢食！聽講晏D會有新甜品架，食完再拎新甜品就啱啱好啦！好，阿詩、冰冰！我地行啦！可以再食啦！」阿奶一招連消帶打，把我和天賜推到絕望的深淵裏！
女士們高興地走到甜品區去獲取她們的戰利品，只餘下我們三人在餐桌前等待著甜品的酷刑！
「點呀，天命叔有無講D咩呀？你兩個好似好多嘢煩咁！」雷少打開話題。
「等我講啦，雷少，陣間你同冰冰講返，要記住一個法則，就係心要堅定！」天賜接著便把剛剛得到的訊息和注意事項告訴雷少。
「原來係咁！不過就咁聽落，應該無咩問題呀！點都無上次黃大一單嘢咁大鑊啦！」雷少高興的說。
「梗係啦，唔會有事嘅！有咩事都好，有我喺度！無事嘅！」我雖然裝作有信心！但其實這句「無事嘅」，究竟是對雷少說，還是對我自己說的，我也弄不清楚！
「我就話唔係啦！你兩個肯定有事！」雷少突然嚴肅的說，我和天賜看著他，他是知道些甚麼嗎？還是突然覺醒了預知能力！
「你地望下果邊！」雷少向我們的後方指了一下！
只見三名女士，各自拿著一大盤的甜品回來，看她們高興的樣子，看來我和天賜是難逃一刧了！
「天賜，我突然醒起漏咗D嘢喺房，我上一上……」天賜瞬速抓著我的手臂！
「你以為我會俾你走甩咩！有難同當你應該聽過架啦，唔駛旨意走！」
算了，我看是逃不掉的了！
結果，這晚我把過去二十年都沒有吃到的甜品，進行了一次性的補償了！
我們六人，各自回到房中！
在這期間，天賜和雷少已分別跟冰冰和阿詩交待了大慨的情況！
而天賜不知道從哪裏變了一隻玉戒指出來，阿詩則臉紅紅的收下！
真不明白，都已經接受求婚了，不用這樣害羞吧！
回到房間中，已經是十時半了！
我們三人各自坐在椅子上，動也不想動！
「喂，你地去沖涼先啦！我要抖抖先！」我對他們說。
「我唔郁得啦！好鬼飽呀！」雷少說。
「我都係……坐多陣再算！」天賜也回應。
我們三人一片沉寂，氣氛有點怪異！
「你地覺唔覺呢，依家個情況同上次黃大一單嘢有啲似呀？果陣喺Irene（黃炎冰，真名只有子鋒和天賜知道）屋企，我地幾個就幫手睇下點搞！不過，今次Irene就唔喺度，而係變咗做阿奶！」雷少稍為回憶了一下過去，仿佛是昨天才發生的事！
「你咁講又有D似喎，不過今時唔同往日啦，子鋒都大個仔，有女朋友啦！我果陣見佢一直都無拖拍，幾驚以為佢係基架！」天賜笑說。
「基你個頭！我都不知幾直！」我隨手把床上的枕頭扔向天賜！
「我就肯定子鋒係直嘅，仲記得之前去佢屋企，佢個書櫃入面果幾本字典，收埋咗幾隻咸碟！」雷少笑著說，我把另一個枕頭也扔向他。
「睇下AV有咩問題？你地唔睇嘅？扮晒嘢！」
胡鬧了一會兒後，我便先去洗澡，雷少是最後一個洗澡的！
在雷少洗澡期間，天賜擔憂的看著我！
因為此刻的我，體內的靈力愈發澎脹，好像隨時也要破體而出似的！
「做咩望住我者，未見過靚仔咩？」反正再想也沒有幫助，倒不如笑著面對吧！
「呢個Gag用咗好多次，笑唔出啦！你肯定你無事？」
「其實……我真係唔覺得有咩事喎！仲覺得好精神添！只係.…..體內嘅力量好似……好似隨時要破體而出咁！頭先喺防空洞入面，我用呢種力量將果隻魔鬼殺死咗，但佢果種死法......就好似呢種力量有生命咁，慢慢將佢殺死，乜嘢都無剩落嚟！」回憶起詹姆士的死法，我的雙手控制不了的在顫抖著！
「唔駛擔心喎！有我喺度，你想死都無咁易！仲有，你唔係要救阿奶嘅咩？嘴都未嘴過就死會唔會可惜D呀？」天賜笑說。
「點......點解你會知......」我紅著臉看著他，只見他已忍不住偷笑！
「我估下架Ja，點知你真係咁純情嘅者！」天賜捧腹大笑。
「你條仆街陰我！」我把手上的枕頭狠狠的扔向他，他敏捷的避開了！
然後雷少剛好洗好澡出來，硬食了本應扔向天賜的枕頭！
「你兩條友搞乜鬼呀！係咪痴咗線！」雷少憤怒了！
在經過了一輪追逐戰後，不知甚麼時候，我們都睡著了！
然後，我夢見了詹姆士！
在夢中，我就像觀眾一樣，以第三身的角度，看著這個夢境的進行。
「你唔好埋嚟呀！你究竟係咩嘢嚟！好可怕！好可怕！」詹姆士坐在地上，身體在顫抖著，他在害怕甚麼？
「邊個叫你對我出手？垃圾！你以為呢個世界所有人都可以成為你嘅食糧咩？睇嚟你搞唔清楚，邊個先係捕食者！」正在說話的，是我嗎？
這個身體，這個樣貌，對！真的是我！
可是此刻的我，由腳部開始直至頸部以下，都被一種黑色的煙霧籠罩著！
而臉上也有一半以上的臉容，被這種黑色煙霧籠罩著！
作為第三身的角度觀看，我能感到異常的恐懼和邪惡！
而詹姆士顯然也感受到這種不祥的力量，他現出了魔鬼的姿態，利用背上的黑色翅膀，把羽毛像利箭一樣寫向那個黑化了的我！
當羽毛觸碰到我身上的黑氣時，只見它被那黑氣纏上後，被徹底消化了！
詹姆士仿佛知道這不能對付我，他為的只是爭取時間，在那羽毛射出的同時，他早已逃到半空中。
「想走？當初你揀咗我做對手，就已經唔會再有機會走！」黑化的我，正在聚集黑氣在背上，然後，背上長了一對跟詹姆士一樣的翅膀！
然後，黑化的我以驚人的速度飛上半空中，數秒後便已經看見詹姆士的背影了！
詹姆士感到一股莫名的壓力緊隨其後，他回頭一看，才發現快要被黑化的我追上！
「無......無可能！黑色翅膀係魔鬼嘅象徵！你無可能會有，點解會咁？你究竟係咩嚟？」詹姆士大驚，知道不能靠速度擺脫黑化的我，只好回到地上，準備以全力迎戰！
就在詹姆士碰到地板之際，他感到有點不對勁，因為他的視線本應朝向下的，此刻卻是朝向上，並且看著黑化的我
「發......發生咩事，點解我個頭會......」
原來當詹姆士回到地上的那一瞬間，黑化的我已經伸出右手（我也不知道應否稱這黑色的霧為右手了），把他的頭瞬間割了下來，並把頭轉向黑化的我！
「哈哈哈哈！估唔到你會死兩次呢？」黑化的我大笑著，究竟在說甚麼啊？這不是我的夢嗎，為甚麼是死兩次？
接下來，只見黑化的我，身上的黑霧纏上了詹姆士的身體！
並且張大了口，把詹姆士的頭，一口又一口的咬破，並吞進肚內！
在徹底消滅了詹姆士後，黑化的我，身上的黑氣又再濃厚了一點，幾乎整張臉都給掩蓋了！
我呆呆的看著這一幕，完全不知應該作出甚麼反應才對！
「哼！陳子鋒，你又入嚟呢個空間做咩？」黑化的我轉過頭來，他......在看著甚麼？是看著......我嗎？
「哼！原來係殘餘係身上嘅力量令你入到嚟！咁算啦！你走啦！我地遲D再見面啦！」
我很想開聲問他，究竟他是甚麼人？
但在這個空間裏，我完全發不了聲，究竟在黑化的我眼中，現在的我是一個怎樣的存在？
「唔駛諗咁多啦！講俾你聽你醒返都唔會記得我！你只需要繼續成長就得啦！到時即管睇下你阻唔阻止到我啦！哈哈哈哈！快D返去救你果個爛鬼女朋友啦！」黑化的我右手一動，整個空間都變得昏暗起來！
「你究竟係邊個？」我終於能叫出聲了，原來我還在酒店裏！
咦？我到底在說些甚麼？剛才好像發夢了，但又好像沒有！
我看了看鐘，三時三十三分，算了，別想了，再睡吧！
但突然，我聽到一些聲音在窗外傳來，正確點說，這些應該是說話來的！
只是，我完全聽不到內容是甚麼！
「搞咩呀？夜媽媽仲有人諗經嘅咩？」但我突然想起，我們是在酒店裏，而且還住在樓高十數層的位置內，不可能會聽到有人在窗外說話的啊！
這聲音，應該是衝著我而來的吧！