[旅行鬼故事系列] [陳生返黎啦] 澳門旅遊之陰魂不散的傳教士: （十九）
「咩人？呀，唔係！係咩鬼先啱？」我對著空氣大喊。
「咩人？呢句應該係我問你，你點解會入到嚟？以往係一D有才華而又俾我睇中嘅人，先可以入嚟！頭先我留意咗你好耐，點睇你都係一個無文化修養嘅人嚟！」這次我終於知道這個男人是在哪兒了，原來他正站在一旁的屋頂上。
「做咩呀你，企喺屋頂好型呀？扮晒武俠小說咁，你估自己係西門吹雪呀！我都不知幾有文化呀，『老夫子』你睇過未呀？」我對他大喊，雖然我感覺不到他對我有敵意，但我仍然在警戒著。
「『老夫子』？呢個係邊位前輩嘅著作呀？我淨係讀過<<老子>>！」他總算從屋頂跳了下來，站在我面前。
「王澤呀，一個二個都唔識嘢嘅，都廢事同你地講！你究竟係咩人，逼我入嚟有咩目的？」我問。
「依家D後生仔一D禮貌都無，唉，不過算啦，我都見慣架啦！見你個人都有幾分正氣，同埋又好似識D嘢，即管話你知我係邊個啦！我就係鄭觀應！」他不知從哪裏變了把扇子出來，在他面前搧著。
「咩......咩官燕呀？」我注視著他的扇子，沒有注意到他的自我介紹！
「係鄭！觀！應！你呢D死仔包一D尊師重道都唔識嘅，連自我介紹都無，都唔知你闖入嚟做乜！」鄭先生不滿地說。
「咩......咩呀！我叫陳子鋒，你叫我子鋒得啦！你話你係鄭觀應，點解個名好似咁鬼熟嘅？」我在腦海搜尋著在哪裏聽說過這個名字，好像阿詩有提過，又好像剛剛也看過似的！
「你連參觀緊邊個間屋都唔知？明明大門口已經有介紹過我！唉，算啦，咁你究竟走入嚟做乜嘢呀？」鄭先生被我打敗了似的，像完全沒有想過有人會不認識他似的！
「哦！我記得啦，頭先有睇過下關於你嘅資料，你就係呢間大宅嘅原主人！你仲同孫中山先生喺呢度議政嘅！」我仿然大悟地說。
「總算你有少少用，咁都唔記得真係唔會放過你！」他兇狠的看著我。
「好啦，咁我記住咗你係邊個啦！咁你可以講點解要捉我入嚟啦？」我無奈的說。
「你個細路真係無耳性架喎！應該係我問你點解入到嚟喎！」他看著我說。
我們對望了一會，然後大慨了解到現在的情況了。
「你嘅意思係，你無捉我入嚟，而係我自己唔知點樣入咗嚟？」我用疑惑的眼神看著他。
他微微的點了點頭：「其實由你踏入呢間屋開始，我已經覺得你有少少奇怪，估唔到你仲會穿過咗設置喺文昌廳嘅結界，入到嚟呢到！」
我嘗試回想剛剛的情況，我應該沒有做到些甚麼啊！
而且我也好好控制著自己的靈力，應該不會無緣無故走進別人的結界才對！
這時，天命叔的說話又在我腦海中出現：「唔好咁輕易相信靈體，佢地最鍾意呃人！」
我立刻回復了警戒心，小心的看著眼前的他。
「你唔駛咁緊張，我無呃你！再者我死咗都八十幾年啦，呢度都無出現過鬧鬼傳聞，所以你放心，我唔會自己搵嘢嚟煩嘅！再者，呢個結界，本來就係為咗保護大宅而做，根本唔係特登捉你入嚟！」他氣定神閒地解釋，的確，他身上連丁點邪氣也感受不到，大慨是值得相信的吧！
「就當你講嘅都係真啦，我又真係無做過任何嘢喎，正常應該唔會入到嚟先啱架？」我說出我的想法。
「咁......會唔會係你身上有D咩嘢破咗個結界呀？」他也不明白箇中原因。
「無理由呀，我又無帶D咩符喺身！一係呢條繩囉，用嚟保平安驅走啲遊魂野鬼！再唔係就呢張，我偷我師傅嘅九字護身法嘅符咒，但我無輸入靈力應該唔會有反應先啱架？」我把可疑的物品都拿出來。
「唔係！唔係呢D，雖然呢D都係神聖之物，但唔會自己突然破咗我嘅結界！而且，我感覺到果樣嘢仲喺你身上面，你諗唔到係咩嘅話，不如將你袋入面嘅嘢拎晒出嚟俾我睇啦！」他指著我的褲袋說。
「咁呀......唉，是旦啦！」我也想弄清楚這件事，於是把身上的東西都一一拿出來，連剛剛君姐給我的心經也一併拿了出來。
「係......係佢啦！你係邊度得嚟架？」只見他指著的，竟是剛剛君姐給我，像書信一般的東西。
「吓？呢樣，你唔係呃我呀？呢樣係我啱啱喺媽閣廟果邊，撞到一個叫君姐嘅人俾我架喎！」我聳了聳肩說。
「君姐？媽閣廟？咁樣，我明啦，你打開個信封先啦！」他說。
「吓？唔得架，佢話我有咩事先可以打開嚟睇架！依家又唔係有咩特別嘢，打開咗咪好蝕囉！」我說。
「咁佢有無講明係幾時先用得呀？同埋有無話打開咗用一次就無效呀？」
「咁……咁又無！」又好像真的沒有規定這心經只能使用一次。
「同埋，佢話有咩事就可以打開嚟讀呀嘛！咁依家都算係有事啦係咪，你都唔知點解入咗嚟！」
「你......你又好似講得啱嘅！」聽起來也頗有幾分道理。
「你打開睇下先啦，如果我無估錯，我應該知道點解你會入咗嚟！」他用看破了的眼神看著我。
「咁......好啦，我就打開睇下啦！」
當我打開了信封，把內裏的紙張拿出來時，我真的感到非常驚訝！
「點解......點解會咩都無寫架？君姐又話係心經嘅？」我奇怪的道。
「唔係咩都無寫，而係寫俾我睇，所以你睇唔到都正常！」他認真定看著這張白紙。
「吓？唔係卦，佢又知我會嚟呢度，又會知我會入咗嚟結界嘅？」
「我咪講咗囉，呢個結界無我邀請嘅話，根本入唔到嚟！你手上呢封係類似邀請信嘅嘢，所以你咪可以走入嚟囉！你俾張紙我，等我睇清楚D！」他拿了我手上的信紙，我就像觀看著一個瘋子，在讀無字天書一樣。
「原來係咁！你同你女朋友好似有D麻煩事纏身喎！」
「吓？你又知？」
「封信寫架嘛！唉，真係麻煩，無啦啦要我幫你地！算啦，見你份人無咩點，我就照君姐所求，幫下你地啦！」
他手上的紙扇，被他稍為晃動後，變成了一支毛筆！
只見他在紙上豪邁的動了數次，毛筆便變回紙扇了！
而原本白色的紙張，我看見有些微弱的金光散發開來，是錯覺嗎？
「好！搞掂啦！嗱，入返落信封之後就真係唔好再隨便拎出嚟啦！個信封有特別作用，用嚟保存靈力嘅！所以，當你或你朋友真係遇到危險，先好拎出嚟用呀！照住上面寫嘅字讀，應該足以救你地一命！」他把紙放回信封後，爽快的交還給我。
「吓？哦！咁者係點呀？你點解要幫我？你同君姐究竟係咩人？」我百思不得其解。
「我咪鄭觀應囉，無D記性！幫你係因為君姐要求，至於佢係咩人，我只可以答你，佢係第一個入咗嚟結界，完成咗上聯嘅人！」他好像陷入了回憶模式。
「咁......多謝晒你啦！係呢，咁我應該點樣離開呢度呀？」反正再想也不會對事情有影響，我還是乖乖的離開好了。
「點離開？咪就咁行出去囉！」他奇說。
「吓？」
「呀，唔好意思，當咗你係君姐佢地添！其實當你完成左上聯，結界就會打開返出入口，你穿過呢個圓形月門就會出到去架啦！」
「哦，原來係咁！咁好啦，我都要去搵返我D朋友啦，呢個......唔該晒你！」我舉起了手上的信封跟他道謝！
「得啦，既然你係君姐嘅有緣人，我無理由唔幫嘅！不過唔駛再多謝我啦，睇嚟我地應該都唔會再見面！不過，如果你又有機會見到君姐嘅話，叫佢得閒就過多D嚟啦，佢好耐無過嚟啦！」
我聽完他的說話後，便穿過圓形月門！
然後便能聽到四周的說話聲，而我也看到阿奶他們就站在我旁！
「子鋒，仲望，快D行啦！」阿奶對我說。
「哦！好啦，我過嚟啦！」我說。
這奇妙的大宅竟住著原本的主人，難怪感覺像有甚麼在守護著這裏了！
然後，我們參觀完後，便出發到下環街市！
希望剛剛鄭先生幫我完成的心經，真的能幫到我吧！
不過，最好不會再有奇怪的事情發生吧！