[旅行鬼故事系列] [陳生返黎啦] 澳門旅遊之陰魂不散的傳教士: （十八）
君姐給我的心經，與其說是一本經書，倒不如說這只是一張便條！
因為它其實只是一個信封，裏面只有一張紙而已！
我把信封收好後，便趕快和他們會合。
「好啦，咁我地下一站去邊呀？」我看著阿詩。
「我地去鄭家大屋，果邊D屋好靚架，中西合壁嘅風格，好適合去影相，之後……」阿詩的說話被冰冰打斷。
「之後就去食香蕉仔！」冰冰興奮地說。
「咩香蕉仔呀？去超市買咪有囉，唔駛特登嚟澳門食呀？」我不解地問。
「你唔知就唔好亂講啦，香蕉仔好似雞蛋仔咁，甜品嚟架！我地尋晚已經傾好晒今日會點架啦，你地幾個男人跟住我地行就得架啦！」阿奶邊扭我的耳朵邊對我們說。
這樣也好，我也樂得清靜！
而且看得出來，阿詩選的地方都很適合拍照，應該是想跟天賜多留一點回憶吧！
「唔好講咁多啦，我地點樣過去呀？」雷少問。
三名女士轉過頭來看著我們：「行過去囉！」
在這大熱天下，我們冒熱炎熱的天氣慢慢向前走。
在途中，我把君姐交給我的符，偷偷的把符放進阿奶的袋子裏。
希望真的能保護到她吧！
來到鄭家大屋前，發現這裏給我的感覺一點也不古舊！
細問下才知道這裏已經經過翻新，所以不會給人一種非常古舊的感覺！
當你仔細觀賞時，會發現整個大宅充滿著文人的氣息！
而且其建築風格富有中國古建築的特色，雖然個人對建築沒有特別的偏好，但這建築給我的感覺是非常舒適的！
「呢度真係幾靚！」我打從心底發出讚歎！
「死仔包，估唔到你都會覺得靚呀！我以為阿詩今次嘅澳門世界文化遺產之旅會悶死你添！」天賜拍了拍我的肩膊說。
「係喎，你唔講都唔覺，除咗食嘢之外，我地去親都係世界文化遺產喎！咦？唔係，咪住算，咩叫估唔到我都覺得靚呀？我呢D擺明就文人雅士，呢D咁有文學氣息嘅嘢梗係啱我睇啦！」我裝出學識淵博的樣子，卻被阿奶在一旁取笑。
「真係識你咁耐都唔知你係文人雅士囉！借問聲你平時睇開D咩文學作品咁呢？」阿奶問。
「好話啦，莎士比亞其實係我鄰居嚟，佢成日過嚟同我切磋文學嘅！另外中國四大名著呀，香港文學大師嘅至尊級作品，小弟都拜讀過不少！」
「香港文學大師嘅作品？」阿奶和天賜同時看著我。
「好話啦！講出嚟真係嚇死你地，我由細到大已經成日喺圖書館借佢啲書嚟睇，佢嘅作品我基本上睇過晒！」我抬頭看著遼闊的天空，回憶起那文學作品的美。
「咁者係邊位作家咁巴閉呢？」阿奶以不太相信的語氣詢問，天賜則擺出一臉不屑的神情，哼！
「你地聽住啦！佢叫王澤！」我氣定神閒的說。
「王澤？未聽過喎！佢寫咩架？散文？詩詞歌賦？定係D長篇小說？」阿奶顯然不忿氣我竟然知道一些作家，而她是不知道的！
天賜則已在一旁偷偷的笑了起來，看來他已猜到了！
「佢唔係寫呢D架，佢嘅作品好有深度架，唔係一般嘅作品可以比較！」我繼續說。
天賜聽到後，再也忍不住笑了出來，使其他人也轉過頭來看著我。
「天賜你笑咩呀？你係咪知道子鋒講果個作家係咩人呀，好出名架？子鋒你好快D話俾我知果個人有D咩咁出名啦！」阿奶扭著我的耳朵怒道。
「哈哈哈哈！阿奶你聽完應該會好嬲，我諗我都係行開D先啦！子鋒你慢慢啦！」說完後，天賜便把其他人帶離現場，看著他們在笑的樣子，大慨是在談論我吧！
「得得得，我講，你放手先，甩啦甩啦！」阿奶勉強鬆開了她的手，等待著我答案！
「咁你聽住啦，王澤真係好出名架，而我都真係幾乎睇晒佢嘅作品！佢最出名，基本上所有香港人都會識嘅作品，個名就叫做『老夫子』！」我神氣的說出答案。
我期待著阿奶的回應，但卻感覺不到她有甚麼行動！
但突然，我感到一陣殺氣向我襲來！
怎麼，難道是那可惡的傳教士？
下一秒，我便知道這濃厚的殺氣是來自何方了！
我的肚子硬生生吃了一拳：「你去死啦，又玩我！」
阿奶氣憤地走開後，便和其他人一起逛大宅了！
「呀！好痛呀！做咩者，咁我真係由細睇『老夫子』睇到大架嘛！」我按著肚子，希望舒緩一點痛楚。
「點呀，死得未呀？」天賜原來走了過來看我，還算他有點人性。
「未死得！邊有咁易有事！頭先你個死仔包淨係掛住笑唔幫我，無人性架！」我總算能夠站起來了。
「你自己攞嚟，關我咩事！不過，講返正經嘢先，你覺唔覺得呢度有D古怪？」天賜問。
「又有古怪？你唔好玩我啦，邊有人日日都撞鬼架？可能感覺錯咗者！」我真心的說，雖然我也感到一些奇怪的東西，但又不像有敵意！
最重要的，我不想再次打擾他和阿詩的時間了！
「你咁講......可能係啦！咁我地快D上去搵佢地啦，襯阿奶仲未嬲完，可以打多你兩拳！」天賜解除憂慮地說。
「哇，你個人咁嘅，睇住我死都有！好啦，行啦行啦！」我無奈的跟著他。
「阿奶，唔好嬲啦！我真係睇開『老夫子』架嘛！」我上前拉著阿奶。
「你睇咩我唔理你，但係你擺明有心玩我！我唔理呀，陣間你要請我食嘢呀！」阿奶鼓起臉傍說。
「好好好，食咩都得，唔好嬲啦！」我急忙說。
「好嘢！賺咗一餐，講咗無得唔算數呀！好啦，繼續行啦！」阿奶高興地說。
「哦！你扮嬲！搞錯呀，咁樣呃我餐飯！」我捉著阿奶的手說。
「咩呃呃聲咁難聽呀，你自己應承架！同埋淨係要你請食一餐咪算益你囉！再嘈請我食埋晚飯呀！哇，你睇，佢個花園幾靚喎！」阿奶拉開了話題，算了，她開心就好了！
我們就這樣逛著，然後，來到文昌廳那邊，我被一道圓形月門外的對聯吸引著！
「『現陰陽而合 借樓閣以撐天』，上聯仲爭一個字，會係咩呢？」我在對聯前思考著，也不知道過了多少時間，我認為自己怎樣也猜不透的。
「天賜呀，你覺得上聯果個應該係咩字呢？」我喊了出聲，卻得不到任何回應！
我環視四周，才發現他們不在附近！
「搞錯呀！走咗都唔嗌埋我！」我正想走穿過文昌廳回到原本的大宅，卻突然發現有一種奇怪的感覺！
我嘗試穿過這道圓形月門，但發現自己竟不能越過大門！
「頂！唔係呀，又嚟料？」雖然感到有點不安，但回想起阿爾曾提醒我，一定要有堅定的信念，才能確保自己的力量能正常使用！
「好！總之就係，心要定！」我在心中拼命安撫自己，使自己平靜下來！
「區區一個結界！看我劍指！」我右手運起劍指，我感到自己的力量比起之前要強得多，大慨是心神安定的正面影響吧！
當我的劍指觸碰到圓形月門時，便發現劍指像砍進一塊海綿體一樣！
所有的力量都如泥牛入海，被它盡數吸收掉！
「搞咩呀？點解會咁架？睇嚟都係要認真咁偷師先得，成日整埋晒D結界我都走唔到！」我看著這道門，無奈的想著。
雖然身處這個地方有點詭異，幸好我沒有感覺到任何危險的氣息！
然後，我注意到門上那副對聯，在上聯的那個缺了字的空位，隱約發出一點微弱的光芒！
「咩料呀？」我輕輕碰了碰那空缺的位置，感到有股能量積蓄在那裏！
我忽發奇想，用劍指輕輕在牆上畫了一下！
然後，牆壁被我的劍指劃出了一道裂痕，感覺就像一個「一」字！
「『現陰陽而合一』，好！寫得好！雖然有人曾提出係『合道』或者『合德』，但都係『合一』最合我意！」一把陌生的男聲從花園的位置傳來。
不會吧，這次又是甚麼人出現在結界啊？
不要總給我碰到那些難纏的靈體好嗎！