[旅行鬼故事系列] [陳生返黎啦] 澳門旅遊之陰魂不散的傳教士: （十七）
「都唔知佢講咩，我地走啦！」阿奶小聲的對我說，準備拉著我離開。
「點解呀，佢地又未走住，我地講聽下佢講笑話都好呀！」我實在想聽一聽他會說些甚麼，如果他是真的有能耐，錯過了不就可惜了嗎？
「你明明啱啱先同我講佢睇落似廟街D神棍架？唔好浪費時間啦，我地去買雪糕食啦！」阿奶看來很討厭這人。
「吓，咁樣……」如果就這樣離開，我會感到心有不甘的，怎做才好呢？
「小妹妹，如果你心中有疑問唔去解決，只會令你愈黎愈失去自己嘅信念！過嚟等師傅贈你地兩句啦！」那解籤人對我們說，這番說話使我對他更感興趣。
即使是阿奶，在聽到這人的說話後，也停下了腳步思考著！
看來這解籤人的說話，真的觸碰到她內心的某些東西！
「阿奶，佢都講咗咁多嘢，就當佢呃神騙鬼都好，咪當聽下笑話囉！」我遊說阿奶。
「咁……好啦！係你話要聽我先陪你架，陣間出到去你要陪我行街架！」阿奶最終也接受了，大慨她也產生了一些興趣吧！
「兩位後生仔女，坐啦！我姓黃嘅，你地叫我坤叔得啦！咦？後生仔，你始乎比起其他人，有D特別！」
坤叔這樣對我說，不會吧，難道他也是道士？
但我在他身上感覺不到任何力量，難道，他已做到收放自如的境界？
連天命叔也要苦練多年，集中精神才能隱藏起自己的力量，而且在近距離的情況，也難免給對方察覺到，畢竟力量強大之人，那份氣勢而不同於別人！
那麼，眼前這不起眼的大叔，竟是比天命叔更厲害的隱世高手？
他看我有點專注的樣子，便續說：
「雖然你有D特別，但喺我眼中都只係好普通者，唔駛咁緊張！不過，你真係要小心D，始終澳門唔係咁風平浪靜嘅地方！」
原來我在他眼中，也只是很普通而已，看來他真的很深藏不露！
我對他的說話不由得增添了幾分信任！
「不過，年輕人，雖然你有D特別，但睇嚟問題唔喺你身上，而係呢位小姐度！」坤叔看著阿奶說。
「我有咩問題呀？」阿奶問。
「你嘅問題，在於唔夠堅定，對好多嘢都有懷疑！本來懷疑都好正常，但你又對好多嘢都無信心，唔知應該點做！仲有，你係咪成日收收埋埋，唔敢將D問題同人講呀？」坤叔略帶神秘地說。
「咩……咩呀，正常人都有D野唔同人講架啦！有幾奇者！」阿奶有點緊張地說。
「係，咁係好正常！不過你要記住，你嘅問題係，你無去正視同解決你內心嘅疑難！聽我講啦，有D嘢，逃避唔係辨法架！」坤叔加重語氣的說。
「咁……我都唔知點做好……」阿奶垂下頭說。
「不如咁講啦，你想唔想解決問題先？」坤叔看著阿奶，阿奶亦微微點頭。
「咁有咩方法呀？」我忍不住問。
「後生仔，呢個問題，要呢位小姐自己親口講出嚟，我先會幫到佢！小姐，你不如試下講出嚟俾我知啦！」坤叔這樣說時，我怎麼感到有點奇怪。
「我……我……」阿奶欲言又止，看來她真的感到很糾結。
「小姐，你要誠實面對自己，我有方法幫你架！」坤叔繼續說。
「我……我都唔知自己問題出咗係邊！」阿奶無力的說。
然後，我注意到，坤叔臉上有點不知所措，雖然時間很短，但我卻注意到這細微的變化！
是錯覺嗎？還是……
「無錯啦！呢個就正正係你嘅問題啦，你根本就唔了解自己！你想唔想我幫你呀？」坤叔突然說出這樣的話，我開始注意到一些端倪，心裏有了點法。
「你幫到我咩？你講到我嘅問題喺邊？
」阿奶這樣說，也省得我再去試探他。
「小姐，天機不可洩漏！而且，呢個問題，一定要靠你自己去解決！」坤叔回復他那沉穩的語氣。
「咁，你係咪有咩方法幫到佢呀？求下你幫下手啦！」我裝作仿偟地問。
「相遇即是有緣，今日係呢度同你地見面，可能都係命運嘅安排！咁啦，既然你要我幫手，我呢度都有串佛珠，可以幫到佢穩定心神架！既然你地係有緣人，本來我係唔會將呢串佛珠俾人嘅！咁啦，你將身上嘅一D身外物俾我，等我當係將呢件法器轉讓俾你地啦！」坤叔說時，臉上露出了得意的神色，看來我猜得不錯了！
「身外物？」阿奶不解地問。
「無錯，對我地佛門中人嚟講，所有嘅錢財都係身外物！你地將所有身外物交俾我，等我返到去再幫你地嘅身外物作個法，咁小姐你好快會諗得通架啦！」他不徐不疾的把佛珠遞給阿奶。
只見阿奶看見這串佛珠，真的有點動搖！
「仆街死神棍諗住呃我地錢，等我教訓下你先！」我手上結印，打算在他腳上施展「定身咒」，讓他摔個半死！
我還沒有動手，在我們背後，卻傳來一把雄渾的聲音。
「神棍坤！你又想係度呃人，係咪未死過呀？」只見背後站著一名大嬸，手上拿著掃帚，感覺好不威風！
「咩咩咩神棍呀！你唔好亂講喎，我見佢地好煩咁，俾D建議佢地Ja！」坤叔看見這大嬸，明顯失了方寸。
「俾建議？俾建議關串佛珠咩事呀？上次你喺媽祖閣呃神騙鬼，我地都放過咗你，你仲夠膽返嚟！你唔好走呀，我依家就去叫人嚟捉你！」大嬸霸氣地說。
「走咪走囉！我話你知，我唔係呃人，我幫人醫心病Ja！我唔係怕你拉我，我係怕你潑婦罵街Ja！」坤叔邊說邊收拾檔口上的細軟。
「我潑婦罵街？你再唔走我就潑婦俾你睇！」大嬸拿起婦帚，看來不把坤叔揍扁是不會罷手的了。
我看見坤叔落荒而逃，也放棄了用「定身咒」的念頭，放他一馬。
那大嬸慢慢的走向我們：「你地無事呀嘛？無俾佢呃呀？」
「無，無事呀！唔該晒你幫手呀，一日最衰都係佢啦！又話要聽下佢講嘢，搞到咁尷尬！係呢，我叫阿奶呀，你係？」阿奶回復了平時的樣子，看來不像有甚麼發生過似的。
「我？呢頭D人都叫我君姐嘅！唔駛客氣喎，我係呢間廟度做清潔嘅，頭先果個人無咩惡意嘅，希望唔好影響你地嚟玩嘅心情啦！」君姐對我們說。
「哦，無事呀！不過佢講D嘢都幾有紋有路，當笑話咁聽下都幾好呀！呀，係喎，我叫子鋒！」
「無影響就好啦！佢果D神棍把戲，聽人講係D咩心理學、咩身心語言學果D嘢！所以佢都幾擅長捉到D人諗野咁喎！不過你唔好睇佢依家咁呀，佢以前都真係會免費幫下人，同人傾下計解下人地D心結咁，唔知幾時開始變到呃神騙鬼，唉……」君姐歎了口氣，看來他跟那坤叔也有點因緣吧！
「哈哈，係呢，君姐你係澳門人呀？」阿奶問。
「我係呀，喺呢度住左五十幾年架啦！年中見唔少你地D情侶嚟呢度玩，不過……」君姐皺了皺眉，欲言又止的。
「不過咩呀？」我問。
「無，可能係我呢D老人家嘅錯覺者！硬係覺得小姐你有D唔開心咁者！」君姐說。
「哈哈，我有咩？君姐你唔會係坤叔D同黨卦，哈哈！」阿奶雖然笑著說，但看到她竟這樣攻擊君姐，看來是不想君姐挖她的痛處吧！
「妹妹仔，放心啦，我唔會呃你地錢嘅！君姐都係將見到嘅嘢講出嚟者，你唔想講都無所謂架！」君姐友善的看著阿奶。
「唔好誤會呀君姐，我唔係想特登話你架，不過係頭先俾果個坤叔……」阿奶忙解釋道。
「唔緊要，君姐明嘅！不過你要記住，有咩困難，發生咩事都好，信念係好重要架！唔好因為D小事，就放棄自己嘅信念！同埋，不妨依賴多D你嘅男朋友，佢……係好出色嘅人嚟！」君姐用略帶深意的眼神看著我，不知為何，被她盯著的時候，我竟感到有種溫暖的感覺包裹著全身！
「佢？我諗君姐你搞錯啦，佢只係一個蠢仔Ja！」阿奶笑著說，然後扭了扭我的耳朵。
「咩蠢呀，我都不知幾醒！人地叫你依賴我呀，聽到未呀？」我打趣的回應阿奶。
「嘔死！唔理你啦，我去搵佢地啦！君姐，頭先我咁講嘢，唔好意思呀！同埋，唔該晒你！」阿奶說完便小跳步的離開我身邊了。
「喂，等埋呀！唔好意思呀君姐，咁我都……」我還沒有說完，卻被君姐打斷了。
「小朋友，記住有力量唔好亂咁用呀，雖然你只係想小小咁懲罰坤叔，但習慣會成自然架，唔好再咁做啦！」君姐溫柔的對我說。
「吓！你？」我驚訝的說，雖然我有感到君姐身上有些特別的力量，但想不到她竟注意到我的行為！
「唔駛咁驚訝，君姐喺度幾十年，接觸唔同人多咗，加上又成日照顧媽祖，所以先會知道你想做咩者！不過，果位小姐心事重重咁，我都知無咁易解開佢嘅心結架啦，呢個你要好好咁幫佢呀！」
「君姐！你究竟……」
「唔駛問啦，我只係做掃地嘅，答唔到你D咩！見你女朋友仔真係有D運滯，呢度有道媽祖廟嘅符，雖然媽祖係守護大海嘅神，但希望都可以帶俾你女朋友好運啦！另外，呢度有本心經，真係有咩事就打開佢試下諗啦！希望你可以愉快咁享受呢次旅行啦！你D朋友等緊你啦，快D去啦！」君姐指著阿奶，示意讓我快點去找他們。
我馬上跑向他們，卻想起還沒有正式跟君姐道別！
當我回過頭來，卻不見了君姐的踪影！
澳門還真是卧虎藏龍的地方啊！
我也希望能如君姐所以，盡情享受這次旅行！