[旅行鬼故事系列] [陳生返黎啦] 澳門旅遊之陰魂不散的傳教士: （十六）
「阿奶，我一定要保護你！」
「喂，醒呀！起身啦！發夢就唔好講埋D肉麻野啦！」雷少在我一旁，一臉厭惡的看著我！
我被他的聲音弄得清醒過來！
「呢度係？阿奶呢？仲有阿爾去咗邊？」我不自覺的把剛才的夢當成真實，還在尋找阿奶和阿爾的身影。
「你講乜鬼呀？呀奶咪係隔離房囉！快D起身啦，八點半啦，九點要落去食早餐架！陣間俾人打唔關我事呀！」雷少繼續催促我。
「早餐？呀，係喎，我地喺酒店喎！」我總算稍為清醒過來，把夢境和現實分開來。
「子鋒，我用完浴室啦！你快D起身刷呀洗面啦！佢地應該起晒身架啦！」天賜神清氣爽的對我說。
「咦？點解你仲遲過雷少起身嘅？」我感到奇怪，天賜竟然剛剛才流洗好？
「你都傻傻地嘅！係天賜叫醒我架，佢晨咁早同阿詩出咗去偷情，返到嚟先叫醒我地！見你叫極都唔醒，佢咪入去沖多次涼囉！唔好問啦，快D起身！」雷少在我背後伸了一腳，把我送進浴室裏。
我快速的洗了個熱水浴，使自己清醒過來！
我回想著阿爾對我說的話，我決定致電給天命叔，看看能不能得到一些建議。
洗好澡後，只見兩人已換好衣服，在等候著我。
「女仔果邊仲爭阿奶未得，原來佢同你都係咁上下時間醒，佢係咪近得你多，所以個人都懶左？」雷少笑說。
我當然知道阿奶遲了起來的原因，因為她和我是同一時間脫離夢境的！
「可能係啦！咁佢地者係無咁快得啦！」根據我的經驗，阿奶起床後少說也要半小時才能準備好。
「係呀，佢地話搞掂打俾我地！」雷少說。
「咁樣……天賜，有D野想你幫手！」我嚴肅的看著天賜。
「你講啦，咩事？」天賜也猜到不是甚麼好事吧！
「你咪話識呢間酒店D職員嘅，我想借佢地電話打俾天命叔！」
「你搵我老豆？不過佢今日出去做嘢，可能唔係道壇！咁啦，我陣間叫職員打去道壇試下搵佢啦！如果真係無人，我叫佢地打老豆手機啦！不過佢經常唔聽電話，部電話同Call機無乜分別，不過可以留口訊俾佢等佢覆嘅！」天賜也沒有詢問原因，便想方法解決我的問題。
「唔該晒你呀！如果真係搵佢唔到，你幫我留個口訊俾佢：『子鋒問有咩方法可以對抗魔鬼，今晚會再打俾你傾』！今晚返到嚟又要麻煩你幫手啦，天賜！」
「傻啦，好小事者！陣間落去食早餐，我會去搵職員幫手架啦！尋晚又發生咗咩事？」天賜皺著眉問。
「尋晚講起就一匹布咁長！等我講重點啦！尋晚我同阿奶都俾D魔鬼帶左入同一個夢境，果D魔鬼睇中咗阿奶，要奪走佢嘅靈魂！而我將會成為祭品！尋晚好彩阿爾出現救返我地，如果依家都唔知會點！佢建議我搵師傅傾下，所以我先想打俾佢！」我簡略地說明。
他們二人都看著我，樣子很是擔心！
「不如我地今日唔好周圍去，搞掂晒D野先啦！」雷少提議。
「係囉，再唔係返香港搵我老豆都得架！」天賜說。
「唔得！首先，佢地已經鎖定咗阿奶做目標，如果真係就咁走，會發生咩事真係無人知！而且，阿奶根本唔記得尋晚發嘅夢，無啦啦走佢實唔肯！仲有……」說到這裏，我停了一下，看著天賜。
「其實你真係唔駛擔心我同阿詩喎，今次旅行唔成，咪下一次再去囉！反正我同佢大把時間，之後再周圍去都得！而且，我相信阿詩知道依家呢個情況，佢都會好贊成你地離開澳門或者係一個安全地方暫避！」天賜一臉不要緊的樣子，但我真的不想破壞天賜離港讀書前的旅行回憶！
「點都好啦，你老豆喺我地出發之前，已經同我講過實會撞嘢架啦，但佢都有講，今次我面相無之前咁衰，今次一定唔會死嘅！所以，行程繼續，唔好因為我而破壞咗你同阿詩嘅一次回憶啦！」我真心的說。
我們也沒有再多說，等到女生們都準備好後，便去吃早餐了！
而天賜則馬上替我聯絡天命叔，雖然真的找不到他，但今天晚上應該也不算太遲吧！
由於早餐的自助餐形式的，所以我跟他們分開了拿早餐。
在這個過程中，我完全是魂不附體的狀態，只是不斷想著，應該怎樣才能幫助阿奶脫離這種局面。
「喂！搞咩呀你？」阿奶突然出現在身旁。
「哇，嚇死人咩？你幾時過嚟架？你唔係喺果邊整緊多士咩？」我真的嚇了一跳。
「整完好耐啦！個個都返晒去坐低食緊啦！見你咁耐都唔返，咪出嚟睇下你搞咩囉！點知就見到你呆呆滯滯咁！講，你究竟諗緊D乜？」
「痴……痴線啦！我邊有諗D咩者，我煩緊食煙三文魚好，定係食呢D凍腸好Ja嘛！一日都係你地，咁鬼早要人起身，想唔呆都難啦！」我隨便回應她。
「咩早呀，陣間我地仲要去媽閣廟架，你快D食添呀，如果唔係，我地唔等你架！」阿奶說完便替我胡亂夾了些東西，推我回去吃早餐了。
在吃早餐期間，天賜悄悄的告訴我，找不到天命叔，但已經留了訊息給他，今晚回來後，便應該能夠找到他了！
雖然仍是很煩惱，但看著阿奶無憂無慮的表情，我便感到這一切都是值得的！
煩惱的部分就交給我吧，你只要開開心心的享受這次旅程便好了！
填飽肚子後，我們離開酒店，乘坐巴士到媽閣廟去！
車程不算太遠，大約二十分鐘便來到這裏！
甫踏進媽閣廟的範圍，我便感到一片祥和的感覺！
自從踏進澳門後，我已很久沒有這種感受了！
難得有一個地方是如此平和，我也樂得暫時拋開煩惱，來享受這短暫的時光！
「呢邊呀！我地一齊參拜啦！」冰冰對我們說。
「參拜唔係問題，但我唔拜愛情果D神架！我有阿奶架啦！」我也難得有心情說笑。
「咪講D咁肉麻嘅嘢啦！」阿奶輕輕的打了我肚子一拳。
「咪係囉，嘔心到呢！」雷少說。
「咁媽閣廟其實係祈求D咩架？」阿奶問。
「媽閣廟，其實正名係媽祖閣！都係世界文化遺產之一嚟架！澳門好似香港咁，都係靠海架嘛！以前嘅澳門好多時候都會依靠船隻做生意，媽祖就係為咗一切海上事物平安嘅神啦！」阿詩解釋。
聽了阿詩解釋後，我們六人在廟外自拍，之後便各自在附近閒逛著。
而當我和阿奶正在獨處時，看到一檔，類似在廟街擺賣的那種占卜師！
一張鋪著紅布的長桌子，有一名身穿白色衣服，戴著墨鏡的人在顧著攤檔，大慨是替求籤者解釋的解籤人。
「子鋒，你睇佢，著到咁古色古香嘅！唔知係咪有得玩D中式占卜呢？」阿奶拉著我說。
「呢D嘢你真係唔好笑！廟街果邊好多呢D人，大部份都唔準架！俾你玩都咪試，盞自己唔開心！」
我本想拉著阿奶離開，誰料她竟固執地要走近些看他。
無奈下，我只好跟著阿奶來到這個疑似占卜師的攤檔了。
來到他面前時，我們也沒有說任何話，豈料那人竟突然對我們說。
「弟弟、妹妹！唔好怪我多事，尤其係妹妹你，好似運氣比較差！仲要……撞到D污糟野！你地唔介意可以坐低一陣，聽下我講野架！」
我和阿奶在猶豫之際，他再補充了一句。
「你地小心D呀，呢一兩日係關鍵時刻嚟！如果唔好好咁做D野，你地兩個都會有危險！」
我聽到這裏，心中感到非常震驚！
眼前這個毫不起眼的男人，究竟是否有能力幫助我們呢？
希望可以吧！