[旅行鬼故事系列] [陳生返黎啦] 澳門旅遊之陰魂不散的傳教士: （十五）
我的腦袋已經停止運作了，面對這種怪物，我竟是如此的無力！
更遺撼的是，我竟然保護不了阿奶！
再見了，這個世界……
「咦？點解……」我已經作好死亡的準備了，但……詹姆士的手竟突然停了下來，發生甚麼事了？
我呆看著詹姆士，只見他突然在自言自語。
「大人，點解？點解要阻止我？」
「唔殺得？大人，你唔係要個女仔，就等我……」
「係！對唔住，我唔應該質疑你！」
「未係時候？個男嘅仲有用？明白！係！」
「吾將為復活撒旦而獻上所有！薩麥爾大人萬歲！瑪門大人萬歲！」
詹姆士突然背對我，向著屋內，被他倒轉的逆十字架膜拜著！
我完全不明白他為何突然有這些舉動，我現在滿腦子只有剛剛那恐怖的畫面，比起黃大一那次，這次是最接近死亡的一次了，而且，恐怖感更是以前的數倍！
詹姆士膜拜完後，便轉過頭來看著我！
「算你好彩，大人要我暫時唔好殺你！你即管好好享受死裏逃生嘅感覺啦！反正，下次見面，你就會作為祭品而死！我好期待下次同你嘅見面！不過，就咁離開都唔夠好玩，等我留個小禮物俾你啦！」
只見他伸出右手，手上的指甲慢慢變長，顏色變得漆黑！
他輕輕的在地上劃了一下，堅硬的地板竟被他劃出了一道深深的裂痕！
「為左等你記住我，就等我係你身上做個印記啦！」
他把指甲慢慢的伸向我的臉上，我實在不敢想像自己會被他弄成怎樣。
「聖櫃！」
一道雄厚的聲音在屋內徘徊著，然後一道光芒像一個箱子困著詹姆士。詹姆士就像被甚麼束縛著一樣，停止了他的動作！
「可惡！究竟係邊個？」詹姆士憤怒地咆哮著，剛剛的那道光芒像感應到他的敵意，發出了耀眼的光芒！
「呀！！！！！可惡，今日就先放過你！」只見他痛苦地叫了一聲後，他馬上跳進了身後一個不知道何時出現的黑色空間，消失不見了！
他消失後，那種壓逼感總算消失了！
我無力的跪在地上，感受著生存的美好！
同時也為自己的無能而感到洩氣！
自從認真地跟天命叔學習後，這一年來也不曾感受到如此的無力！
但當更加了解這個奇怪的世界後，才發現自己是多麼的渺小！
「少年，我地又見面啦！」一道熟悉的聲音傳來，我抬頭一看，是阿爾！他何時進來的？
「係……係你？」我雖然對他的出現有點驚訝，但天賜跟我分析過後，對他大慨有一點了解，所以也不至於那麼驚恐了！
「嚟，起身先！扶呢個女仔去坐低！」他把我和阿奶扶了起來，然後找了一張稍為沒有被血染污的椅子坐了下來。
「你等一等，我清潔返呢度先！」他安頓了我們後，把十字架變回正常的位置後，便開始在十字架前作出禱告！
只見他禱告時，四周的景像慢慢變得正常起來！
所有屍體都消失了，然後被詹姆士破壞了的天使像和沾滿血液的地方，都變回原本的模樣！
剛剛那殘存的恐懼感，也因為環境變得正常而消散了，我慢慢感到自己的身體暖和起來！
而且，我發現我的靈力突然恢復了！
我嘗試運起劍指和降伏心魔指印，發現能正常使用時，我馬上變得安心起來，但是……
「點……點解會咁？」我實在搞不懂為何又能使用了。
「好啦，既然你都恢復返力量，咁我係時候走啦！」阿爾看著我說。
「咪住！唔好走呀，究竟發生咩事？呢度究竟係咩地方？點解你又會出現？我無左嘅力量又會恢復返？」我情急地大喊出來。
「細聲D，你唔想整醒你女朋友嘅話！呢個空間都仲有D時間，既然你已經同呢件事扯上關係，我就同你好好講下啦！首先，你覺得呢度係咩地方？」
「呢度……應該係我發嘅夢卦！雖然有好多奇怪嘅地方，俾傳教士襲擊，阿奶出現喺呢度，都唔似一個正常嘅夢！再加上，你嘅出現，有意識地幫我同介入頭先發生嘅事，我就唔再肯定，呢個究竟係夢境，定係其他空間！」我真的感到一頭霧水。
「睇嚟你真係好亂，第一次發現用唔到力量果種感覺係咪好無助？」
「係……自從我學識咗運用靈力之後，都未試過咁無助！」我低下頭來，回想起剛才那種無力感，心裏的恐懼油然而生。
「你依家再試下用唔用到！」
我雖然不明所以，但也乖乖的照著去做，結果……
「點解……點解會咁？無理由架，頭先明明仲好地地！」一時間我急得失了方寸，大喊了出來。
「冷靜D先！你依家再試下！」阿爾右手按著我的肩膊，一陣暖意傳遍我的身體，使我冷靜下來。
我馬上照他的說話去嘗試！
「奇怪，點解又會用得返，我唔明？」我一臉不解的看著阿爾。
「雖然你嘅力量唔穩定，但以人類嚟講都算係好強！頭先果隻邪靈應該唔會係你嘅對手！等我由頭開始解釋你聽啦！呢度，的確係夢境，但唔係你嘅夢境，而係呢個女仔嘅夢境！」阿爾指著阿奶說。
「阿奶嘅夢境？咁……點解我又會出現喺呢度？」我驚訝的問。
「你仲記唔記得，係氹仔果邊我同你講過，要呢個女仔唔好懷疑佢嘅信仰，如果唔係就會好危險！就好似今次咁，雖然呢度係佢嘅夢境，但其實係俾魔鬼入侵佢嘅意識，所創造出嚟嘅畫面！佢地企圖透過呢個夢，將呢個女仔嘅靈魂進一步暗黑化，如果佢嘅靈魂徹底墮落，就再無辨法救佢！」
「吓，但點解要搞阿奶？」
「呢個同佢嘅出身有關，但呢個我唔方便講太多！由於佢嘅出身，而之後又選擇左侍奉神，所以喺佢懷疑佢嘅信仰開始，就俾魔鬼睇中咗！今次同你嚟澳門，係一個契機，一個令佢完全放棄信仰，投靠魔鬼嘅契機！」
「咁關我咩事？」
「梗係關你事啦，你係佢男朋友嘛！佢失去信仰唔係呢排嘅事，魔鬼已經俾左好多誘惑佢，令佢嘅信仰之心減低咗好多！但因為佢嘅性格樂觀，再傷心都好，都只係懷疑神，未至於完全捨棄信仰！魔鬼知道我地發現咗佢地做梗嘅野，所以佢地選擇咗唔再等待！佢地希望強行令你女朋友捨棄神！」
「捨棄神？」
「無錯！頭先嘅畫面，的確係以前發生過嘅現實！魔鬼想透過呢D畫面，打擊你女朋友嘅信念！而且，魔鬼如果製造出殺死你嘅場面，相信可以令佢嘅所有負面情緒爆發，主動去投靠佢地！如果真係出現咁嘅情況，到時魔鬼嘅力量就會增加，而我地今次嘅行動就會失敗！」
我愈聽愈感到頭昏腦脹，完全消化不過來！
只知道我的生命嚴重受到威脅！
而阿奶亦會因為我而失去自我！
這兩件事也不是我想看見的，但……我又有何能力去對抗他們……
不對啊，既然阿爾今次出手救我，即是說他可以幫我們吧！有救了！
「阿爾！咁之後應該點做？你係咪會幫我地？」
「我係唔可以出手嘅！」阿爾搖了搖頭。
「吓？點解？」我驚訝地問。
「你冷靜D先！事到如今，相信你都知道我係咩人，而對付你地嘅，又係D咩事物！雖然我地係有力量，但不論係天使，定係魔鬼，都唔可以隨便出手！今次我之所以救你，係因為呢個夢境入面，只可以顯示既有嘅現實，如果你受咗傷甚至死亡，就等於破壞咗呢個夢境！所以我要去到最後先可以出手幫你地！」
「咁你者係睇住我地死者！」我激動地說。
「你冷靜D先！雖然我唔可以出手者，但你可以呀嘛！」阿爾指著我說。
「我？我邊度得，頭先你都睇到，係果隻野面前，我用唔到靈力，淨係識驚到無晒反應！仲有，我區區一個凡人，點同魔鬼鬥？」我無力的搖了搖頭，不安的感覺又再次湧現！
阿爾看著我，好像在思考著甚麼！
「你依家再次試下運起你嘅靈力！」
「想點呀，又要我試？我咪試……咦？點解……又用唔到……」
「我就係想提醒你呢點！首先，我可以同你講，你絕對有能力對付到D魔鬼！只要唔係瑪門親自出手，你應該可以應付！你之所以會用唔到力量，對付唔到佢地，只係因為你驚！喺戰鬥之前，你已經睇到果隻魔鬼係幾咁殘忍，亦都感受到佢嘅力量係幾咁強大！佢地就係咁樣，將你嘅靈魂，將你嘅意志折服！呢個係魔鬼擅長嘅招數！再加上，你俾太大壓力自己啦，你太驚保護唔到你女朋友，太驚佢會出事！所有嘅因素，加加埋埋就令到你發揮唔到自己嘅力量！」
「即係話……一切都只因為我嘅軟弱？」
「無錯！只有當你嘅心夠堅定，你先能夠發揮到力量！仲有，唔好咁睇少你自己，當你學識咗呢D力量之後，你就唔再係一個凡人！而且，單單以力量嚟計，人類經過修行，甚至有機會比我地更強，甚至成仙都係有可能！」
我驚訝得合不攏嘴。
「修行？成仙？咪玩啦，你唔係大天使咩？你都信有呢D野嘅咩？」
「梗係唔係玩啦！所為成仙，當然唔係話成為神，或者變成我地呢D天使咁啦！只係佢地都會有超脫肉身嘅能力，成為永恆嘅存在！而且，既然天使都可以墮落成為墮天使，人類超脫肉身根本唔出奇！不過呢D都唔係重點，重點係，你首先要相信自己，有足夠嘅意志，先有力量同佢地對抗！上次你對我用嘅定身咒，只係我太勁先會咁快破到，但力量上嚟講，係對我有效嘅！」
「你愈講我就愈亂！總之一句講晒，就係我就堅定嘅話，力量就唔會受到影響，而且對果D古怪野有用啦？」
「無錯！相信你自己，相信你嘅力量！呢兩日佢地會再嚟對付佢，你要寸步不離佢嘅身邊保護佢！我都會盡量喺你地身邊保護你地！」
「咁者係將個波拋俾我者！魔鬼同天使嘅鬥爭點解要搞埋我呀？」我無奈的說。
「邊係將個波拋俾你呢，個波一直都喺你度！你選擇做佢男朋友，今日仲贏到佢對你嘅信任！依家魔鬼已經認定你係祭品架啦，你想走都無計架啦！」阿爾露出一副賤笑的模樣，看起來跟天命叔的賤笑可以一比！
「咁……咁……唉，我地嚟旅行散心者！點解要咁呀！」我抱著自己的頭苦惱地說。
「你咁煩都無用，聽朝醒返，你女朋友應該會唔記得呢度發生嘅事！你同佢都仲可以開開心心咁去玩嘅！不過……自己小心D啦！我都要走啦！」
「吓？你就咁就走？咁我地點算呀，點樣先會醒返呀？」
「呢個夢係魔鬼入侵而創造出嚟，類似結界之類嘅嘢！魔鬼離開咗就唔會再有力量支撐呢個夢，好快就會消失架啦！之後你地會醒返架啦！見你咁驚，如果你真係要搵人商量，打俾你師傅傾下啦！道教嘅野我都唔係好熟，佢應該會教到你點樣堅定你嘅意志架啦！好啦，呢度都開始崩壞啦，我走啦，希望唔駛再見啦，再見嘅話應該都會幾大鑊！拜拜！」
阿爾說完後，四周景色開始變得模糊！
我看著阿奶，心裏暗暗起誓，無論甚麼事，我也要保護你！