[旅行鬼故事系列] [陳生返黎啦] 澳門旅遊之陰魂不散的傳教士: （九）
餐廳內，店員都亂作一團，因為他們發現，老闆娘竟然暈倒在辦公室內！
「老闆，老闆！你無事呀嘛？」店員A嘗試喚醒老闆娘，而老闆娘亦慢慢開始清醒過來。
「咦？點解，我會訓咗喺地下嘅？發生咩事？」老闆娘像剛從宿醉中清醒過來，對眼前的景像感到陌生。
「老闆，頭先你同上層D客人傾完偈，落返黎之後就暈咗啦！」店員A解釋。
「我同客人傾偈？唔得，我個頭好痛！我淨係記得返到嚟鋪頭之後，介紹咗D酒俾佢地，之後我就無咗記憶啦！」老闆娘痛苦地按著額頭。
「老闆你不如休息下先啦，我倒杯水俾你飲！」店員B離開了辦公室。
「係呢，果班小朋友去左邊呀？」老闆娘說。
「頭先聽到佢地好似去左大三巴果邊影相！」店員A說。
「大三巴？點會咁……希望佢地無事啦！」老闆娘按著頭說。
或許，老闆娘早一點清醒，便能阻止子鋒他們去大三巴。
又或許，子鋒他們多留一會兒，便會放棄去大三巴的想法！
只是，一切也只是假設而已！
大概，命運就是要他們經歷這一切吧！
「哇！子鋒你睇下，呢度就係老闆娘講嘅玫瑰聖母堂啦！夜晚原來咁靚架喎！」阿奶拉著我到聖母堂前自拍，剛才在她身上出現的違和感，仿佛全不見了！
「係……係喎，真係好靚喎！」我看著這聖母堂，本應是漂亮而神聖的地方，不知為甚麼，竟給我一種不寒而慄的感覺！
「唔知仲有無開呢？」阿奶走到入口處，想嘗試推開大門，結果當然是推不動！
「咁夜咩都閂左啦，你想睇嘅話，我地呢兩日抽時間再過黎啦！」我走到她身旁說。
「唯有係咁啦！咦……呀！！！！」阿奶無奈地回應，只見她抬頭看著我時，忽然臉色一變，然後大叫起來！
「做……做咩呀？無野呀嘛？」我即時抱著她，用手輕撫她的背，使她冷靜下來。
「上……上面……」她用顫抖的聲音說，右手則指向聖母堂的上方！
我懷著不安的心情抬頭觀看，卻看不見任何怪異的東西！
「上面無野喎？你頭先睇到D咩呀？」我安慰她。
「無野？」她慢慢抬頭察看，臉上由害怕的神色，轉變為難以置信的神色。
「無……無理由架，頭先我明明見到……」她慢慢鎮定下來，口中則喃喃自語著。
這時，其他人也來到我們身旁。
「做咩呀，發生咩事呀？」冰冰問。
「係咪子鋒非禮你呀？」雷少在這時問這種問題，立即被冰冰重重的打了一拳。
「無……無呀……應該係晏晝唔舒服，搞到有D攰者！」阿奶說。
「咁不如早D返酒店休息啦！」我緊張的說。
「唔駛，都嚟到啦，梗係去埋大三巴影相先啦！我無事喎！」阿奶偷瞄了聖母堂的上方，像要再次肯定甚麼似的！
「咁好啦，如果你真係太攰就要出聲呀！我地仲有兩日時間架！」我對阿奶說。
「得啦！好，我地去大三巴繼續影相！」阿奶說。
我們離開聖母堂時，在聖母堂最上方的十字架上，正站著一個身穿傳教士服裝的物體監視著我們的行動！
我和天賜同時回頭察看聖母堂，但那傳教士早已消失不見，我和天賜就這樣帶著一絲的不安來到大三巴前面的梯階！
雖然時間已經不早，但這個地方仍然還有不少遊客在拍照。
「估唔到仲有咁多人影相呀，我地行近D去影相囉！」阿奶拉著我走上梯階。
「唔好走咁快呀，小心D呀！」我對阿奶說。
然後，我們在梯階上拍了好幾張照，我便提議離開這裏了，畢竟有種不安的感覺，不斷纏繞在我心裏揮之不去！
「唔好啦，都嚟到，梗係上去睇埋大三巴啦！」阿奶拒絕離開。
「其實都無咩好睇啦，咪又係一堵牆！」我只想快點離開。
「咁又唔係呀咁講喎，大三巴除左係景點之外，上年仲列入左聯合國世界文化遺產！而且喺附近嘅舊城牆遺址都係世界文化遺產嚟架！最重要係，聽人講喺大三巴前面影返落去廣場度，個景係好靚架！」冰冰突然插進我們的對話，看來還是要走上去的了……
「好啦，咁我地一齊上去啦！唔好分散呀，陣間碌左落黎無人救到你地架！」天賜突然說話，並強調不要分散開來。
這樣也好，總比她們在我們不為意期間，偷偷的跑到大三巴前。
來到大三巴前面，看著這曾經的大教堂遺址，我仿佛能感受到那時教堂的氣氛了！
而阿奶來到這裏後，只見她默默走近其中一道牆壁，我趕近跑到她身旁來陪伴她！
阿奶凝視著眼前的牆壁，她忽然把眼睛閉上，然後把右手貼在牆壁上，不知道是在祈禱還是幹些甚麼。
我在她一旁觀察著她，只見她突然開始流淚！
「阿奶，你無野呀嘛？」我嚇得慌了，不知道應該怎麼反應。
「子鋒？我……我無野呀，我都唔知點解會喊架？不過當我嚟到嘅時候，我好似感受到當時傳教士嘅內心，感覺到佢地嘅熱誠，感受到佢嘅所受嘅逼害，感受到佢地變得無助！而我亦好似明白，點解佢地會懷疑佢地嘅信仰！」阿奶說話時，她的雙眼變得空洞，死死的盯著牆壁說話，明明她的人還在這裏，感覺卻隨時會消失不見似的。
我緊緊的抱著她，只見她好像有點錯愕，像猜不到我會突然抱著她！
「雖然我唔係咩教徒，亦講唔上有咩信仰！但我認為，如果一樣野係正確嘅，係應該堅持到底，唔應該隨便質疑佢嘅！雖然正確唔等於會有好嘅回報，但堅持正確嘅事到最後，總比起中間改變原則，做一D違背良心嘅事，會快樂得多！所以，我覺得果D傳教士，並無懷疑到佢地嘅信仰，反而直到最後一刻，都選擇佢地所相信嘅野！佢地應該唔會有遺撼！」
我想起了拉斐爾對我的說話，要我支持阿奶，使她的想法能堅定下來！
雖然不知道這番說話能起到多少作用，但作為她的男朋友，這點事情還是能夠做到的！
「子鋒……多謝你！」阿奶伏在我的胸前，眼淚流得比之前更誇張，我……真的有幫到她嗎？
「喂！你兩個做咩係度親熱呀，仲有其他人睇住架！過嚟一齊影相啦，都夜架啦，影埋相就走啦！」雷少對我們說。
「得啦，就過嚟！點呀，你感覺好D未？」我輕撫著她的頭說。
只見她深呼吸了一下後，輕輕的離開了我懷抱，本應流著眼淚的雙眼，不單停止了流淚，還回復了神采！
「我無事啦！好啦，我地去影相啦！」
拍好照後，我們準備離開。
「你兩個頭先做咩喺上面偷情呀？」冰冰笑說。
「無呀，邊有喎！」阿奶嘟起小嘴回應。
「扮咩嘢呀！不過下次偷情還偷情，睇下有無人呀嘛，頭先喺你地附近，有個傳教士係度架，不過隔咗一陣就唔見咗，應該係頂你地唔順！」冰冰繼續取笑我們。
「咩喎？真係有人架？」阿奶臉上泛紅。
我本應就這樣欣賞著阿奶的臉容才對，但冰冰的說話，卻把我的注意力奪去了。
我回頭看著大三巴，真的看到一個傳教士衣著的人站在那裏，而且，我還感到他露出了不悄的神情。
你別問我怎麼能看到他的神情，總之我就是有這種感覺！
我擦了擦眼睛，想再看清楚時，那人已消失不見了！
又是該死的幻覺嗎？還是說真的有些古怪的東西一直跟著我們？
「子鋒，你望咩者，都話個傳教士走左囉！唔駛驚喎，佢無偷影你地放上網喎！」冰冰以為我正在擔心被別人看到我和阿奶，但……算了，這種事也不適宜在這裏說出來！
「係……係呀，諗住如果係偷窺狂嘅話，就即刻報警做個良好旅客呀嘛！話唔定之後澳門政府會頒個獎俾我，等我以後可以免費搭船嚟澳門，幫佢地捉晒D偷窺狂！」
「算罷啦你！」冰冰和雷少同時說。
然後，我們便離開大三巴，準備回到酒店了！
總算，這奇怪的一天能結束了！
但，我們真的已經平安渡過這天了嗎？