[旅行鬼故事系列] [陳生返黎啦] 澳門旅遊之陰魂不散的傳教士: （八）
「係講之前，你地知唔知道澳門嘅歷史背景？」老闆娘坐了在我們旁邊，手上拿著一杯Sangria，跟我們說話。
「大慨知道澳門曾經俾葡萄牙統治過澳門，所以好多建築、飲食文化呢D，都受到葡萄牙嘅影響！」阿詩回答。
「你講嘅都無錯！不過我想講嘅係，澳門嘅宗教歷史背景！距離依家大約四百年前，天主教第一次有神父踏足澳門呢個地方，原本都無咩事嘅！去到17至18世紀，中國禮儀之爭發生，主要係因為天主教同中國傳統禮儀嘅一D衝突所引起嘅事件黎！最重要嘅，果陣直接影響到天主教係澳門嘅發展，有傳除左當時嘅葡萄牙首相下令驅逐同打擊天主教之外，亦有眾多嘅傳教士被逼害至死！呢種逼害嘅情況一直持續，直到1835年果陣，大三巴，即係果陣嘅耶穌會會院被徹底催毁，而果陣大量傳教士亦被殺死！」說到這裏，老闆娘喝了一口Sangria，像要緩和沉重的心情，才能繼續告訴我們大三巴的傳聞。
「傳聞話，當時嘅傳教士一早預計會遭受到逼害，所以係大三巴下面起左一個防空洞去避難！聽講防空洞入面嘅糧食，足以令佢地生存一個月！但係當時嘅民眾都殺紅了眼，知道了防空洞的傳聞後，他們日以繼夜的在大三巴附近巡邏，還不時焚燒可疑的地方，利用濃煙把那些傳教士的地方完全封殺掉！雖然最後都無人發現防空洞，但都無發現果D匿埋左嘅傳教士！究竟佢地係已經逃走左，定係已經活活被困死係防空洞入面，呢層就真係無人知啦！」
「點解……會咁……」阿奶聽到後，忍不住泛起了淚光，我在一旁輕撫她的背部，以安撫她的心情。
「或者佢地已經走晒，防空洞只不過係用黎呃果D人，轉移視線用嘅呢！」冰冰嘗試解釋。
「如果之後無發生D奇怪事，相信大部份人都會好似你咁諗！」老闆娘又喝了一口酒，喘了口氣，便繼續說出大三巴的傳聞。
「自從大三巴俾市民破壞左之後，傳教士嘅活動幾乎全面停止！僅餘嘅傳教士將主教堂搬到玫瑰堂之後，幾乎沒有任何活動！之後嘅幾十年，經常會傳出大三巴果邊，傳黎一D奇怪嘅聲音！而且，有一次，有幾個人見到有個傳教士係大三巴果度出現，佢地諗住上去教訓佢，點知去到佢面前，發現傳教士嘅臉孔係紫黑色嘅同埋毫無生氣！感覺好似中毒而死嘅樣，佢地幾個嚇到暈左之後，果個傳教士就消失左！」
「吓？唔係咁猛呀？」雷少驚訝的說。
「係囉，佢地唔係信天主教嘅咩？就算真係死左，唔係應該回歸主嘅懷抱咩？」冰冰問。
「可能……佢地係臨死嘅時候，對佢地所信嘅神產生左懷疑，所以先上唔到天堂！」意想不到的是，這竟然是阿奶作出回應！
眾人大概也沒有想到，阿奶竟會說出這些話！
我則坐在她旁邊，思考著她的說話。
「呢位妹妹講嘅可能都係事實！等我講埋之後發生嘅事你地知啦！其實，大三巴之後久唔久都會出現D撞鬼嘅傳聞，而且都係夜晚發生嘅！最誇張果次，係有差唔多十個人一齊見到D傳教士係大三巴度徘徊！就咁樣其實都無咩事嘅，最多唔接近大三巴者！但去到1926年，澳門重新批準天主教喺澳門活動，傳教士嘅活動又開始活躍，而且市民嘅接受程度亦愈黎愈好，亦都無咁仇視西方宗教！就係一切都好順利嘅情況下，竟然發生左一件好嚴重嘅意外！」
「意外？」我們齊聲問道。
「其實都唔知係唔係意外！就係某一日，傳教士完成左當日嘅活動之後，其中一住傳教士自己走左去大三巴，但第二日，竟然俾人發現，佢死左係大三巴前面！而且，臉色亦是呈現紫黑色，就同以前撞鬼嘅模樣完全一樣！」老闆娘把手中的Sangria一飲而盡，像是要壓抑她緊張的情緒！
「之後，不時都會發現有傳教士死係大三巴附近，死嘅模樣完全一樣，而死因全部不明！而某一次，天主教嚟左一位資深嘅神父，佢了解左成件事情之後，覺得好唔妥，結果佢邀請左幾位神父嚟到澳門，一齊去左大三巴進行調查！而呢幾位神父去左調查之後，就神秘失踪左幾日！一星期後，佢地突然現身，出現喺玫瑰堂！」老闆娘順勢拿起酒杯，才醒覺酒杯早已是空的了，她交待了侍應，讓侍應把新的酒拿給她！
「果幾位神父，究竟發生左咩事？唔會係驅魔唔成反被驅卦？」我說。
「你講得無錯，事實就係咁！果幾位神父其實係想去驅魔嘅，不過佢地返到嚟之後，出現左好大嘅轉變！或者我先講下佢地消失左幾日，究竟去左邊啦！根據佢地嘅敍述，佢地果晚出發去調查之後，突然之間感覺到地板有晃動嘅感覺！之後眼前一黑，佢地就去左一個好大嘅空間！而果個空間，就好似一個秘密嘅教堂一樣，十字架，聖經，耶穌像等等一應俱全！但恐怖嘅係，果個空間入面，除左呢D教堂野之外，佢地發現左好多人骨！」
「人骨？唔係卦？」我忍不住打斷老闆娘的說話。
「無錯，係人骨！而且唔止一副，仲有好多副！而果D人骨，都係著住一D舊式傳教士嘅服裝！佢地係入面仲經歷左好多野！佢地見到有好多傳教士祈禱嘅情形，亦都見到傳教士被逼害嘅情形！佢地知道自己係俾魔鬼侵襲，佢地合力打算驅魔！但完全起唔到作用，慢慢地，佢地開始懷疑神嘅能力！而且，去到最後一晚，他們見到一個傳教士同佢地講，點解全能嘅神唔解救佢地，點解要放棄佢地等等！總之講左好多質疑神嘅說話！只有資歷最深嘅一位神父能夠保持心智，但由於連日嘅煎熬，令到全部神父嘅身心都非常疲勞，就喺重見天日之後，佢地全部人都辭退左神父嘅職務！」老闆娘搖了搖頭，像是感到很可惜似的。
「唔做神父？咁佢地之後點？」我問。
「佢地無做神父之後，除左最資深果位神父返左鄉下之外，其它人都失左踪！再搵返佢地嘅時候，先發現原來全部都嚟左澳門，並且一齊喺大三巴前面自殺！」
「自殺？佢地應該知道神係唔允許自殺架！」阿奶激動地說。
「無錯，佢地應該好清楚自殺係不被允許嘅！但好似妹妹你頭先提到，佢地……開始懷疑自己嘅信仰！佢地死後，警方調查佢地死因時，發現左好多質疑神存在嘅文件！更加發現左，好多關於當年澳門逼害天主教嘅新聞！每個神父嘅住所，更加發現左一個奇怪嘅紋章，果個紋章，根據媒體報導，係屬於撒旦嘅紋章！」老闆娘再次把手上的酒一飲而盡，才再次說話。
「當時社會上面再次出現左好多質疑天主教嘅聲音！為左平息呢D聲音，教會派左人去搵果位隱退左嘅神父，詢問返當日究竟發生左咩事！果位神父終於講返，佢地果段時間，代入左當年俾人逼害嘅傳導士角色，感受佢地當日嘅心情！而且，就連俾人殺嘅痛楚，俾煙整到窒息，每一幕都真實咁呈現係佢地嘅身上！唯一不同，就係佢地經歷左一次之後，仍然係生存嘅！據神父所講，就喺經歷左666次死亡嘅經驗之後，一個傳導士出現，並聲稱可以拯救佢地！佢直覺上知道呢個係魔鬼嘅化身，所以無應承佢！」
「咁其他人呢？」阿奶問。
「唔清楚，因為果位神父已經好難維持意識，只能夠勉強拒絕誘惑！不過，按照之後其他人都自殺嘅情況嚟睇，佢地好大機會抵抗唔到誘惑，應承咗魔鬼嘅約定！但魔鬼點會真係拯救佢地，最終都只係想奪取佢地嘅靈魂！而隱退果位神父，喺知道左其它人自殺之後，佢覺得自己都有責任，因為喺佢帶其它神父進入大三巴，所以……最後佢都自殺埋！」
「點解……點解就唔可以真誠咁相信祂！」阿奶小聲地說了這一句，在一旁聽到的我，只能默默的待在她身邊。
「信任，比起想像中更加困難！最終，教會派出左駐守喺唔同地方嘅資深神父，喺大三巴附近進行左一次驅魔嘅儀式！有無成功驅魔就無人知啦，不過之後大三巴嘅怪事的確少左嘅！但係，有好多人都質疑，嗰次嘅驅魔，其實只係一場Show，為左消除一D質疑嘅聲音，而做嘅一場戲！而去到今時今日，亦都經常傳出，大三巴附近會見到D傳導士，又或者有人會神秘失踪，再度現身後失去信仰嘅傳聞！所以，我勸你地都係考慮清楚，盡量唔好夜晚靠近大三巴會好D！」
我們聽完後，都面面相覷，認真思考著老闆娘的說話。
「多謝你提醒，不過，唔駛擔心，我地唔會有事嘅！同埋，只要保持信仰嘅心，我相信就算真係遇到魔鬼，都唔會有事嘅！」阿奶堅定地說。
「你咁有信心係好事嚟嘅！而且，果D都只不過係傳聞者，依家都有好多人會夜晚去大三巴，我相信都無事嘅！好啦，都唔阻你地啦，希望你地喺澳門玩得開心啦！D酒，就當我請你地飲架啦！」
老闆娘說完後，我們向她道謝，之後，她便回到一樓了！
但在她離開的時候，我突然感到一股奇怪嘅邪惡氣息，在樓梯的位置傳來，我回頭一看，只見老闆娘慢慢的走下樓梯，而那種邪惡的感覺，卻已消失不見了！
「奇怪......唔通係錯覺？」我心裏雖然不安，但亦只能安慰自己是錯覺罷了！
「好啦，咁我地不如行啦，我都想去睇下夜晚嘅大三巴，應該會幾靚！」阿奶像是回復了平日的態度，但......總感覺有哪裏不對！
「好啦，依家都係八點過D，去完大三巴我地再去食糖水啦！」冰冰提議。
大家決定好後，便馬上結帳離開餐廳了！
只是，在我們離開餐廳後，發生了一件奇怪的事情！
如果我們遲點離開，說不定也不用經歷之後的怪事了！