[旅行鬼故事系列] [陳生返黎啦] 澳門旅遊之陰魂不散的傳教士: （十）
「記住呀，酒店有包早餐架，聽朝九點鐘落去食早餐呀！」冰冰說。
「吓！咁早？」雷少和我都面有難色。
「唔早架啦，聽日我地朝早會去媽閣廟！之後再去鄭家大屋睇下，同埋試下澳門嘅小食香蕉仔啦！」阿詩解釋。
「哦，咁好啦！聽朝等你地叫醒我啦！」我笑說。
「好，咁早D休息啦！」
我們各自回房，準備結束這一天！
但......當然不會就這樣結束了吧！
各自洗好澡後，我們當然把握機會，來個深宵夜談了吧！
「好，準備訓啦！」天賜說。
「痴線啦，十一點未夠，咁早邊訓得著呀？」我說。
「吓？咁呀，你地睇陣電視先囉，我眼訓，訓先！」天賜正想躺到床上，我和雷少當然不會放過他。
「喂，唔好扮晒野呀！起身講兩句先！」我說。
「三個男人有咩好講呀？」天賜說。
「就咁梗係無野好講啦，你地睇！」雷少打開冰箱，拿出了數罐啤酒。
「你幾時買架？點解我地完全唔知？」我問。
「你咪理啦，難得我地出嚟玩，天賜你又就嚟去外國讀書，梗係抽D時間吹下水先啦！唔好講咁多，飲杯先！」雷少把酒分給我們。
「嗱，聽朝起唔到身俾人打唔關我事呀！」天賜說。
「得啦！飲杯啦！」
我們碰杯後，馬上大口喝了一口啤酒。
「明明啤酒咁鬼苦，以前真係一D都唔識得欣賞！但唔知點解，大大下，依家又覺得果種苦味接受到，仲覺得甘甘地，幾好味添！」我說。
「人大咗就係咁架啦！你估仲係細佬果陣咩，汽水係好飲，但就係少咗D感覺！」雷少又喝了一口啤酒。
「時間真係過得好快，啱啱識你個死仔包果陣，都仲係啱啱升中一！點知轉眼間已經中學畢業！唉......真係有D唔捨得！」天賜少有的說出這種感性的說話來。
「你講起又係喎，時間過得真係好快！仲記得果陣係學校撞鬼，好在有你同你老豆，當然仲有阿詩啦，我先好好彩咁無事！」我也開始回憶起來，也感到有點感慨。
「喂，你兩個唔好無啦啦進入回憶模式先得架！我完全搭唔到嘴囉！講下其他話題啦！」雷少在一旁不滿的道。
「好，但係三個男人有咩傾？」天賜說。
「男人間嘅話題，不外乎都係果D架啦！你同阿詩......今朝究竟發生咗咩事？我見佢個樣甜到呢！」我箍著天賜的脖子，要他交待發生了甚麼事情。
「放......放手啦！透唔到氣啦！無講D咩囉！」天賜說。
「唔好扮嘢喎，我都見到阿詩好似輕鬆晒咁，你究竟做咗D咩？教下兄弟點樣冧女好喎！」雷少也咬著天賜不放。
「好講啦吓，如果唔係我依家打俾阿詩問架！」我作勢拿起房間的電話。
「唔好搞佢地啦，咁鬼夜！我無做D咩囉，我係同佢求婚Ja嘛！」天賜喝了口酒，滿不在乎地說。
「求婚？！」我和雷少同時大叫出來。
「細聲D啦！陣間俾人投訴我地呀！」天賜掩著耳朵說。
「怕咩者，隔離咪又係阿詩佢地！衰仔你幾時決定求婚架？點解我一D都唔知架？仲有，點解你花又無戒指又無都求到婚架？係咪靚仔有優惠唔駛搞咁多野呀？」我連珠爆發地問。
「你冷靜D先！求婚呢樣野，其實當我知道我將會去外國讀書果陣，已經決定左架啦！不過我都猶豫左好耐，始終我地咁後生，我又要離開佢幾年......所以就算係呢一刻，我都唔知咁做係啱定錯！」天賜少有地露出擔心的表情。
「姑且唔講啱定錯，我淨係問你一件事！你鍾唔鍾意阿詩？」我搭著他肩膊說。
「鍾意，梗係鍾意啦！其實中一第一次見佢果陣，我已經對佢有好感架啦！」
「咁咪得囉！啱又好錯又好，有D嘢你唔做，係呢世都唔會知答案！最緊要係順應自己嘅心意！仲有，你記唔記得你老豆第一次見到阿詩，已經話你同佢係命中注定嘅一對！雖然你老豆成個維園阿叔咁，又成日亂講，但我都覺得你同阿詩係注定一齊嘅！最重要係，你兩個都係果種知道目標就會衝嘅人，就算你係靚仔，阿詩係靚女，都唔會有好多人頂得順你兩個嘅性格架！」
「子鋒......多謝你！你講嘅都好啱！不過......」天賜看著我的眼睛說。
「不過咩呀？我講過我唔係基架！」我被他的眼睛看得渾身不自在。
「不過你後面講性格個部份就係多餘嘅，唔該你注意下！」原來天賜看著我的眼睛是為了分散我的注意力，我的肚子吃了重重的一拳！
「不過天賜你真係勁，可以咁決斷咁求婚！嚟，飲杯，當係祝你求婚成功！」雷少說罷，我們又舉杯暢飲。
「咁雷少呢，你同冰冰點呀？有無信心同佢一齊升到大學呀？」我問。
「我就算啦，讀書真係唔啱我，我估我應該讀埋中七就出嚟做野架啦！好在冰冰唔會嫌棄我，我都決定做幾年野之後就同冰冰結婚，組織一個幸褔嘅小家庭就得啦！咁子鋒你又點呀，同阿奶進展成點呀？」雷少反客為主。
「我同佢？幾好呀，咪又係咁！」我支吾以對的。
「算罷啦你，我睇你同阿奶都無乜進展架啦！拍左幾個月拖都無乜改變咁！」雷少說。
「唉，你估我想嘅咩？我雖然英俊瀟灑加上玉樹臨風者，但拍拖呢D真係第一次！一時三刻好難適應個關係唔同咗架嘛！不過，我覺得今日嚟左澳門，同阿奶真係有D改變，我覺得我知道應該點同佢相處啦！」我充滿鬥志的說。
「咁咪好囉！」雷少說完後，又拿出了三罐啤酒，分給我們。
「不過，我想問你地，今次嚟澳門係咪都有D怪事發生咗？」雷少放下啤酒，認真地問。
我和天賜互相對望，也知道紙總是包不住火的！
「無錯，雖然你應該無咁易感覺到，但的確係有D怪事發生咗！」
我對雷少說，然後跟他說出，中午時在氹仔那邊所遇到的怪事！
「哇，你條友仔，原來晏晝發生過D咁嘅事！唔怪得阿奶好似有D奇怪咁啦！估唔到你又撞到呢D大鑊野！」雷少說。
「唔駛擔心喎，我出發之前，天命叔已經同我講左，我唔會好似上次咁危險架啦！不過，我比較擔心阿奶者！」我歎了口氣說。
「係喎，頭先喺大三巴，係咪發生咗D咩事？我隱約感覺到有D奇怪嘅氣息，但又唔肯定！」天賜問。
「果然你都感覺到！我喺玫瑰堂同大三巴都感覺到有D奇怪！而阿奶都有少少奇怪，玫瑰堂果度佢突然間大叫，之後去到大三巴又掂實大三巴，仲喊住話佢感覺到果D傳教士被逼害嘅畫面添！而最古怪係，臨走嘅時候，我真係見到有一個傳教士衣著嘅野，企左喺大三巴前面望住我地！諗起都有D心寒！」我回想起那個傳教士，真的感到有點不寒而慄！
「但......會唔會真係幻覺Ja？始終你晏晝搞左單大鑊野，攰得滯出現幻覺者......可能......或者......應該係......」雷少本想安慰我，但他說到最後，似乎也認為這是不可能的事。
「算啦，船到橋頭自然直！你聽日用手印幫阿奶保持心境澄明，應該無事嘅！同埋聽日我會叫阿詩俾定張平安符佢，應該唔會有事嘅！」天賜安慰我。
「希望無事啦！」我把手上的啤酒一喝而盡。
「好啦，早D訓啦，聽朝起唔到身俾佢地打唔關我事呀！早抖啦！」天賜說完後，把東西執拾了一下，我們便躺在床上睡著了，希望明天不會再遇到奇怪事吧！
就在我們關燈睡覺的時候，阿奶她們也準備就寢了。
當我們都徹底熟睡時，我和阿奶竟然都夢到同一個夢境，聽到同一種聲音！
原來，我和阿奶的晚上，才正式開始！