[旅行鬼故事系列] [陳生返黎啦] 澳門旅遊之陰魂不散的傳教士: （七）
「喂！係咪阿奶呀？」我拿起電話便說。
只是，我得不到任何回應，那一刻，從電裏只傳來一陣陣風的聲音，給人很空洞的聲音！
若勉強要形容，就是你進入了一個山洞裏，然後致電給別人時，故意不發聲！
然後山洞裏的空氣流動時，所產生的聲音，便是我聽到的模樣了！
「喂？喂？」我再嘗試呼叫，但都得不到任何回應！
可能是電話線路問題吧，於是，我便準備掛上電話！
但是，電話那頭傳來一把陌生的聲音！
「走！快D離開呢度，如果唔係會死架！」我聽到後，嚇了一跳，電話隨即被我拋下，跌在地上。
「子鋒，做咩事呀？」天賜走了過來，拿起電話。
「你……聽唔聽到電話入面講咩呀？」我指著那電話說。
「無呀，咪嘟嘟聲囉？你聽到D咩呀？」天賜緊張的問。
「我……我……」我是出現幻覺了嗎？
「冷靜D，究竟咩事呀？」雷少走過來，雙手放在我的肩膊，使我鎮定下來！
「我……我聽到D奇怪野……」我緊張的說。
天賜和雷少都看著我，靜待我說出聽到些甚麼。
「頭先個電話……一開始傳黎一D好空洞嘅風聲，好似山窿入面有風吹過嘅果種感覺！之後……我就聽到有人講『走！快D離開呢度，如果唔係會死架！』」
我把聽到的內容告訴他們，兩人臉色也變得陰沉起來。
「會……會唔會係搭錯線Ja？」雷少推測。
「我都有諗過，但……搭錯咩線先會講呢D說話？」我接受不了這個解釋。
「我想知，果句說話，你覺得……係咪講俾你聽？」天賜問。
「吓？你咁講……我真係唔肯定喎，點解你咁問？」我思考了一會才回答他。
「首先我排除晒所有搭錯線或者一D技術上嘅出錯，始終係你撞到呢D野，用返靈異角度諗會容易D！咁好啦，如果係一D衝住你而嚟嘅靈異事件，咁應該會直接叫你走，或者更加語帶威嚇！但頭先果句說話，感覺上唔係同你講，亦唔係咩威嚇，反而似係真係遇到D危險，所以講頭先句野！你諗返頭先聽到呢句說話嘅時候，有無咩特別嘅野係漏左？」天賜分析著。
「你咁講……呀！我記得啦，一開始雖然係好空洞，但慢慢，我好似聽到一D好微弱嘅腳步聲！當果句野出現嘅時候，D腳步聲都清晰左少少，不過因為句野太大聲，唔仔細諗返真係唔多覺！」我回想剛才的情況，的確有些奇怪。
「知道係咁又點，對件事都無幫助架？」雷少問。
「又唔可以咁講！第一，如果句野唔係對我地講，咁我地就唔駛擔心太多，可以繼續係度住！第二，就要睇下呢通電話係故意，定只係偶然啦！」天賜說。
「故意？偶然？我唔明你想講咩喎？」我說。
「如果只係偶然打到黎，傳左個訊息俾你，有可能只係『好朋友』貪玩者，我地呢幾日應該都可以安心咁周圍去！但如果……係有心打俾我地，即係話，呢件事係衝住我地而黎，睇黎剩低嘅時間都唔可以掉以輕心！」天賜分析得頭頭是道，我只好心裏祈求，這只是附近的靈體所做的惡作劇了！
就在天賜分析好後，房內的電話突然又響了起來！
我們三人面面相覷，心裏都怕又是那奇怪的來電！
「等我聽！」天賜拿起電話，準備接聽！
「喂！我地準備好，可以出去啦！」電話那邊傳來冰冰的聲音。
「哦，我地都OK架啦，我同佢地過去你地果邊先啦，諗好去邊之後再出去啦！好，依家過黎！」天賜放下電話，示意我們過去她們的房間。
「做咩要特登過去呀？我地直接出去咪得囉！」雷少不解地問。
「我始終擔心佢地間房會有D咩事！所以借D意過去睇下，同埋順便等子鋒可以係果邊做少少野！」天賜看著我，像是詢問我準備好了沒有！
「我得架啦，希望呢個結界幫到手啦！」我說。
「吓？又整結界？咁佢地點入間房呀？」雷少問。
「其實唔會有影響，我只係打算係窗口整個結界，等D奇怪野入唔到去！你當係一個防護罩咁就得架啦！呢招我新學架，勁呢！」我神氣地說，但他們都沒有看著我！算了，我明白的，他們是妒忌我的才華吧！
敲了敲門，開門的是阿奶，她大慨是洗好澡吧，從她身上，我隱約嗅到一絲一絲的香氣，是肥皂的香氣吧！
進了房間後，我慢慢的走到窗子的位置，默默諗起咒語和結起手印！
設置好後，我便隨便說些東西，掩飾我走到窗子的目的！
「你地呢個位置好似好D喎，望出去個景好似靚D咁！」
「你講咩呀？咪又係同一個方向！快D諗下食咩好啦，你話帶我食葡撻架，我陣間要去食呀！」阿奶說。
「等我睇下時間，依家差唔多五點，我地出去食左葡撻先！之後係附近行一陣，之後就去食晚飯，我搵左幾間葡菜架啦！食完之後我地襯夜晚去大三巴行下，之後就返黎休息啦！第二日我地就去遠少少嘅媽閣廟睇下，行程大約就係咁啦！」阿詩像導遊般為我們安排好行程，還好這次旅行有她在！
「阿詩！下次我地要再同你去旅行！」我們幾人異口同聲的說，阿詩露出微笑，但沒有回應！
「你地會唔會諗多左！阿詩要去旅行都係同我去！阿詩，唔好理佢地啦，我地出去啦！」天賜把阿詩拉走了。
「唔好走呀！」
又吵鬧了一輪後，我們離開了葡京酒店，準備覓食去！
由於時間尚早，我們決定走著去議事亭前地，中途經過瑪嘉烈蛋撻店，總算滿足了阿奶吃葡撻的慾望！
然後我們又在議事亭前地附近逛了一會後，便前往福隆新街，品嘗我們期待已久的葡國菜了！
店內分為兩層，我們走了到二樓用餐！
這裏的燈光頗為昏暗，對我們這幾對年輕情侶來說，是情調非常好的餐廳！
我們吃了乳豬、葡國雞、焗鴨飯等等，吃得好不開心！
「喂，不如我地叫少少酒飲下囉！」雷少提議！
「都好喎，有咩好飲呀？」冰冰問完後，我們都把眼神投向阿詩。
「唔好意思啦，我本身無預會飲酒，所以都唔知有咩好飲！」阿詩看著我們，無可奈何的回答。
就在我們討論之際，一位高挑的女士走了過來，看她的樣子，有點葡國人的感覺！
「你地係咪想叫酒飲？」她站在我們旁邊詢問。
「哦……係呀，我地想睇下有無D澳門出嘅酒架？」雷少問。
「澳門嘅酒就無啦，不過我地鋪頭有種酒都幾易入口，男女都應該會鍾意飲架，你地要唔要試下？」她笑說。
「請問係咩酒黎架？」我問。
「Sangria，係西班牙傳統嘅果酒嚟！原料係紅酒，係入面加入一D生果，飲起嚟係甜甜地嘅，唔錯架！」她解釋。
我們互望了一下，便回答：「好啦，我地要六杯啦！」
「我地係一大壺咁嘅，你地要住一壺先啦，應該夠你地飲架啦！」
她不等我們回答，便已回到一樓，替我們下單。
大約五分鐘後，她便拿著一壺酒上來，我們每人嘗了一點後，味道真的不錯，很容易入口。
「真係好好飲呀，唔該晒你呀……哈哈，都唔知你叫咩名添？」我說。
「我叫Grace，係呢度嘅老闆娘！係呢，你地係大學生？」老闆娘說。
「佢地三個係，我地三個下年應該都會係！係呢，老闆娘你係澳門人？有無咩地方好玩可以介紹架？」我對老闆娘說。
「我係澳葡混血兒，不過出世到依家都係澳門住，都算係本土澳門人！玩嘅地方其實唔算多，不過你地想睇下D建築物嘅話，就會較多選擇！例如媽閣廟呀、媽祖文化村呢D！」
「我地聽日都會去媽閣廟呀！陣間仲會去大三巴果邊影下相添！」
我說完，注意到老闆娘眼裏閃過一絲古怪的神情，然後她沉默了數秒後，忽然對我們說。
「大三巴果邊，你地去嘅話，盡量唔好太接近會好D！如果真係想近距離望下，朝早去會適合D！」
「吓？點解咁講嘅？」阿奶問。
「無，其實都係一D澳門人嘅傳聞者，無咩特別嘅！」老闆娘支吾而對的，仿佛不想告訴我們。
「唔好啦，你咁講我仲想知喎，不如講俾我地聽下啦，我都好想知多D澳門嘅野！」阿奶立刻追問，差點忘了她對這種事既害怕，卻又掩飾不了她的好奇心去追問。
「咁……好啦，我講少少澳門嘅傳聞你地知啦！」
究竟，大三巴有甚麼奇怪傳聞呢？