[旅行鬼故事系列] [陳生返黎啦] 澳門旅遊之陰魂不散的傳教士: （六）
「喂！阿奶，你地無事呀嘛？」我馬上跑到她們的房間前大叫。
然後，房門被打開了！
「子鋒，你望下，間房好大好靚呀！仲有，個浴室都好靚呀！」阿奶興奮的說。
「小雷，你都望下間房，真係好靚呀！」冰冰也興奮地說。
「你地……頭先大叫……就係因為間房太靚呀？」我洩氣地問。
「咩喎，咁人地第一次住間咁靚嘅房呀嘛！如果唔係，你以為我地做咩大嗌呀？」阿奶嘟起小嘴問。
「無……無呀，我以為你地間房有昆蟲，搞到你地大叫Ja嘛！」我隨便編了個理由！
「蟲？邊度，係邊度？」冰冰被我嚇得跳起抱著雷少。
「我以為，係我以為Ja，呢度無蟲！你放開雷少先啦，佢就黎俾你勒死啦！」我看著雷少快要窒息的臉，趕快解釋。
「好啦好啦，唔好玩啦，我地過返去果邊間房啦！」天賜在門口對我們說。
「係啦，你地快D過去啦，唔好阻住晒！頭先曬左成日，我地要沖下身啦！快D走快D走！搞掂話你地知啦！」冰冰把我和雷少推了出房！
我們重新進入那間尾房，也按照天命叔的說話，先禮貌地打了聲招呼才進去！
「哇，間房做乜鬼咁凍？」雷少說。
我和天賜也感到頗為寒冷，於是仔細觀察房間中的地方！
雷少看見我們不說話，他也不敢多言，放好東西後，便坐下來看著我們！
過了一會，我和天賜都注視著牆上的一幅畫像！
「你覺得點？」天賜問。
「應該係呢度……不過，佢好似匿埋左！點做好？」我問。
「都係要講清楚，廢事陣間得罪左佢啦！同埋呢度咁凍，都要佢幫幫手，唔好整凍呢度！」天賜說。
「咁樣……一係直接叫佢啦！唔好意思，我地係黎呢度借宿兩晚嘅，如果騷擾到你就唔好意思啦！你唔介意嘅話，不如出黎傾兩句，我會引導你，俾個地方你好好休息！」我對著牆壁，像個瘋子般對著畫像說話。
當然，我沒有得到任何回應！
「子鋒、天賜，係咪……有『好朋友』係度呀？」一旁的雷少忍不住問。
「應該係，但佢唔知匿埋左係邊，叫佢都無反應！咦？」我轉了一圈，看見那幅畫像，正好在電視機的對面！
透過電視機的倒影，我隱約看到一個非常單薄的身影，正站在畫上看著我們！
「原來係咁……天賜，麻煩你放粒壇香木係幅圖畫下面！」
待天賜把壇香放好，我口中默念三篇咒語，只見一道身影慢慢的，從電視機裏走了出來，然後停了在壇香木的前面！
看來這靈體的力量並不強，而且由於力量不強，更只能待在這房間裏，沒有辨法離開！
從他身形看來，大慨死的時候只有七至八歲左右吧！
模糊的臉形上，還能感受到一點稚氣！
「小朋友，你係咪一直住係呢度架？」我嘗試跟他溝通。
但他只是呆呆的看著那塊壇香木，絲毫沒有反應。
「你係咪想試下呢粒壇香木呀？係嘅話你答我D問題，答完我會供奉俾你架！」我再次向他詢問。
只見那模糊的身影慢慢的轉過來。
「哥哥，你係咩人黎架？點解睇到我，又唔驚我嘅？」我腦海中出現了一把帶著稚氣的聲音。
「哥哥係黎旅行架，會係呢度住兩晚，之後就會走架啦！哥哥見到你係因為我有D不可思議嘅力量，可以見到你，同俾野你食囉！」
「哥哥，咁你可唔可以帶我走呀？我唔知點解，一醒左就留左係呢個地方啦！求下你帶我走啦！」這小男孩的聲音再次在我腦內響起，我還仿佛看到這小男孩那可憐的模樣。
那一瞬間，我差點衝口而出的答應了，幸好天賜在我身旁制止了我。
「小朋友，我地唔可以亂咁帶你走架！你留得係度，者係你有野係未完成，所以先會束縛係度！你要靠自己先可以離開架！」天賜說。
「咁……咁好啦！我想要地下果粒木呀！」小男孩指著地上的木頭說。
「無問題，不過你要應承哥哥，以後都唔可以亂咁嚇人架，如果唔係你就會變得好慘架啦！同埋，哥哥會係度住兩日，我俾個地方你休息好唔好？」
天賜說完後，那小男孩便點了點頭。
「子鋒，交俾你啦！」天賜看著我，示意可以開始處理了。
我看著那小男孩，口中唸起天命叔所教的咒語，右手在小男孩的頭上圈了三圈，一道微弱的金光纏上了小男孩！
「好！你暫時住係呢度啦！」
我拿出了一個小鋁罐，把沉香木粒放進裏面，然後把這個罐子放到窗子旁！
我口中繼續默唸咒語，把那男孩引導窗子旁，房間的墮落位置，隨後把靈力灑向沉香木，讓小男孩能得到供奉！
「好，咁呢兩日你就住係呢度先啦！如果仲想要D沉香木，就同我講！唔好亂咁掂我地D野呀！」
我把手輕輕放在他頭上，作輕撫狀，雖然他的靈力太弱，我不能碰到他，但這種關心還是能傳達給他知道的。
「哥哥，多謝你呀！我以後都唔會再亂咁嚇人架啦！」說完後，他的身影就消失了。
「吁！搞掂！」我累得馬上坐在梳化上。
「跟左我老豆學道，果然勁左好多呀！」天賜笑說。
「如果唔係果D咩十年陰運，我先唔會去學埋D咁嘅野！辛苦到死！」我裝出不情願的樣子。
「喂，你兩個有無理過我感受架？我咩都睇唔到喎，究竟發生咩事？」雷少在一旁不安的說。
「哦，無咩野，係有個小朋友係度者，無惡意嘅，我帶左佢去窗邊架啦！就係你隔離Ja嘛！」我輕描淡寫地說，雷少卻馬上跳了起來，遠離那個位置。
「唔駛驚，無事嘅，子鋒佢做左野架啦！」天賜平淡地說。
「我唔係驚！我係唔想近咁多『好朋友』者！自從上次係學校搞到咁大件事，我避得嘅都會盡量避！子鋒，都話你架啦，D『好朋友』真係鍾意跟住你！」雷少無奈地說。
「痴線，我想嘅？再嘈我叫晒D『好朋友』跟你返學添呀！哈欠，好眼訓！」我坐下不久後，便感到很疲累。
「搞咩呀你？咁鬼攰嘅？」雷少說。
「係咪頭先教堂度發生左D咩事，搞到你咁攰？」天賜盯著我。
「唉……係呀！頭先去到教堂附近，已經感覺到唔係好妥！點知你地出左教堂之後，我同阿奶入左另一個空間！係入面搞左一大輪，居然有個講廣東話嘅外國人入埋個空間度，佢話自己叫拉斐爾，又話自己係咩神職人員！然後佢就用一種奇怪嘅力量破壞左成個結界！之後佢就唔見左啦！不過佢真係好勁，輕輕鬆鬆就破壞左成個結界！話唔定勁過天命叔都唔奇！」
「你話……佢叫拉斐爾？」天賜震驚地問！
「吓？係呀，你識佢架？佢一隻眼係紅色，另一隻係綠色！雖然唔似係敵人，但佢嘅力量真係好得人驚！」我回想起來，仍然感到他的力量所帶來的震撼！
「唔係識佢……只係……如果係真嘅，未免太令人難以相信！」天賜低頭沉思著，看來他真的感到難以置信。
「你覺得係咩咪講囉，我地幾個有咩係接受唔到架！」雷少說。
「係囉，再奇怪嘅野，你老豆都俾過我歎啦！諗到咩咪講囉！」我也附和說。
「可能你地好少睇聖經啦，拉斐爾，神職人員，仲要有強大嘅力量，我係度諗，會唔會係大天使拉斐爾！」天賜說完後，自己也搖了搖頭，仿佛不能相信自己的想法。
「大天使？」我和雷少都叫了出聲，然後各自搖了搖頭，不是不相信，而是不敢相信。
「你老豆話我條命易撞鬼者，搞咩仲要撞埋天使呀？」我用雙手拍打自己的臉，使自己保持清醒！
「呢個係我推測者，未必係嘅！」天賜說。
「唉……我都唔知啦！果個咩拉斐爾，仲話我對付果個係墮落嘅聖職者！而且，佢地嘅目標好似唔係我，而係阿奶！救命呀，去個旅行者，想點呀！」我掩著臉發出怒吼，實在不知道該怎樣做。
「哈哈！」天賜在我身旁忍不住笑了出來。
「搞咩呀你？我咁頭痛你仲係度笑！」我不滿的道。
「無，我諗起你之前幾次，遇到呢D野都唔怕死咁衝出去，完全唔會好似依家咁痛苦！依家關阿奶事，你反而變到咁嘅衰樣，想笑你都係俾女食住者！」天賜笑說。
「頂你個肺！」我把床上的枕頭抓起來，扔向天賜，卻不幸命中在他身邊的雷少。
然後我們便在房中吵鬧起來，過了好一會兒後，才冷靜下來。
「唔駛擔心喎，總之無論有咩事都好，都仲有我地幫手！開開心心咁玩埋呢兩日啦！」天賜對我說。
「係囉！同得你去旅行都預左撞到『好朋友』架啦！放心喎，我地一齊睇住阿奶啦！」雷少也說。
「你地……好，理得佢係鬼神魔佛呀，總之我地開開心心玩返幾日啦！」我打起精神來，忽然房中的電話響起。
應該是她們準備好了吧！
我把電話拿起，卻聽到一些奇怪的聲音！