《廿一歲個年，我成為左隱世富豪》－大結局: 第四十二章：背叛
「你咪問過我，如果你有一日再唔係烽火聯盟既人，我會唔會考慮你既？」
「我而家就答你。」
「我會。」
「真係？」
「係，醫生唔講大話。」
「哈，當我小朋友？」
「係啊，小朋友。」欣婷突然起手搣我塊面，唔係痛，而係面紅，怕羞既面紅。
「哎呀！搣我！」我開始追住佢，同佢係海旁追逐，好青春，好浪漫，因為，我地都只係廿幾歲。
「好攰啊，唔玩啦。」欣婷停低，然後挨左係海旁欄杆。
「好啦，唔玩啦。」我講完就順手搣左欣婷一下。
「好痛...」欣婷掩住塊面，明明都無用力，都唔知係咪扮野。
「好痛啊，衰人...」好似真係痛喎，有啲白裡透紅既感覺。
「睇過。」我哄緊欣婷塊面，再用手輕撫佢塊面。
「無啊，無事，我睇完都無咩。」
「你係醫生咩而家。」佢望住我講。
「唔係，但係我係魔術師。」
「哇？點解...」就係頭先我摸佢塊面既時候，一下，就將頸鏈戴左係佢條頸到，哈，呢招，我都學左好耐。
「送比你。」
「多謝...做咩無端端送野比我？」從頭先望住我講野，而家就只係不斷摸住個吊墜，低下頭同我講野。
「條頸鏈靚，咪買比你囉。」
「咩理由黎架！」欣婷一向上望，我差啲就錫到佢個壓頭。
「哈，因為有個女仔，佢配得起呢條咁靚既頸鏈。」
「個女仔係我心目中，就同呢條頸鍊一樣咁靚，咁耀眼，奪目。」
「個個女仔係邊個？」欣婷明知故問。
「唔知呢，好似就係戴住呢條頸鍊既人。」
「咁，你鐘唔鍾意佢？」
「我...鍾意。」點解，欣婷轉話題可以轉得咁快，咁自然...
「唔知個女仔鐘唔鍾意我呢？」我對住個海問。
「個女仔係個海到架？」
「白痴，係呢到。」我凝望住佢，身體越哄越埋，最後，我攬住左佢。
「我，都鍾意你。」
「哈，咁我地係咪要一齊架？」
「聽人講，好似要。」
「咁，我地一齊囉？」
「嗯！」欣婷好輕，好輕易就可以抱起佢，攬住佢，我都覺得好舒服，一切都好自然。
「喂啊，放低我啦。」
「好啦。」
「誠翔，我認真問你，你女朋友點？」
問題始終存在緊，我無法逃避...
「我會處理，我應承你，三日內，我就會同佢分手。」
「但係...我覺得自己好似好衰咁，拆散左你地。」
「傻啦，我自己心甘情願，何況佢都有新男朋友啦。」
「下？」
「睇下。」
我將Chole跟踪藍心同阿明既相影低，拖手，錫，攬，仲上埋藍心屋企，呢一切我都知道。
「你...唔會傷心咩。」
「無謂去為唔會為自己傷心既人而傷心。」
「哇，句野咁難明既。」
「慢慢細味下啦。」
「你諗住點同佢講？」
「無啊，照直講。」
「嗯。」
「你凍唔凍？」
「少少啦。」
我將頸巾圈係佢條頸到，呢一條當然唔係藍心個條，佢個條，我已經擺左係佢架車到。
「叮叮叮。」
「做咩？」
「藍心執晒啲野走啊，去邊到啊佢？」阿妹問我。
「無，我同佢分左手，我亦再唔係烽火聯盟既人，所以，由得佢。」
「下...阿哥...」
「唔緊要，阿哥有個新女朋友，幾靚既，不過最緊要夠蠢，我就最鍾意。」係隔黎聽住既欣婷睥住我。
「同埋人哋做醫生架，好似天使下凡咁，當佢著住件白色長袍，我都覺得佢好似天使。」
「得啦，下次帶返屋企過目下啦，最緊要就係你真係要鍾意人啊。」
「知道啦，長氣。」
收線後，欣婷繼續凝望住我。
「做咩？我塊面有咩？」
「有，唔好郁，有污糟野。」
「下，邊到？」
「都話唔好郁。」欣婷逐漸哄落我塊面到，我亦唔敢望住佢，當我合埋眼。
欣婷就錫左落我到。好舒服，好浪漫既一吻，好似從來都無人會錫我塊面，偏偏係欣婷，鍾意啲咁細緻既野，果然係醫生。
「欣婷，多謝你，成為我真正既天使。」我地坐係海旁既座位到，單手攬住欣婷條腰。
「多謝你自己，你改變左你自己，我先會接受你。」
「如果無你既出現，我相信，我都唔會改變到。」
「所以，我要一直係你身邊，做你既天使，環繞住你，保護住你。」
「哈，保護我？雖然你係醫生，但係就唔夠我大力囉！」我捉住欣婷對手，等佢無得反抗。
「做咩啊你！變態佬！」
「望住我。」
「唔望！」
「放開我先。」
「望住我。」我再講多次，欣婷先肯直望住我，塊面依然白裡透紅，好可愛。
「我，要保護你，唔會令你受到任何傷害，即使係一條頭髮，我都會好好咁保護。」
「嗯。」我放開欣婷對手，然後錫左落欣婷個嘴到。
「點解，我地咁遲先認識既？」欣婷問我。
「我地能夠相遇，已經好幸運。」仲記得，係第一次見到欣婷同佢男朋友一齊食野，大膽到不斷望住我，無視佢男朋友。
「你估，我地會唔會死係呢個時代？」
「唔會，因為我係唔會比你死。」
「咁老死呢，你阻止唔到。」
「唯有我地白頭偕老囉。」
「嘻嘻。」的確，同欣婷一齊，減少左好少煩惱，可能係佢既可愛，佢既蠢，又或者我已經唔再係烽火聯盟既一員。
「藍心？等陣去公司樓下，我有野同你講。」
「好。」
「我諗，你都知咩事，我地分手啦，祝你幸福。」我諗住講完，就轉頭走，點知藍心叫停我。
「你知道我...」
「嗯，你地幸福，唔好令穎心傷心。」
「自己大個，識得處理。」講到自己好似好有經驗咁...其實，我都只係個背叛既人。
「咁...我地有緣再見啦。」
「嗯，呢到係之後既人工，有咩需要，打比我啦。」
「多謝你。」我將無寫銀碼既支票比藍心。
「欣婷？你返左醫院？」
「係啊，今日雖然好少人，但係都有人要做手術。」
「今晚，得唔得閒？」
「得啊，做完手術就可以走。」
「咁我六點黎接你啦。」
「嗯。」
好耐都無試過下廚，不如，就等欣婷試下我手勢。
「喂？阿火？你地舖頭有無開門？」
「哦，好好，唔該。」
係香港已經有好多舖頭已經唔做生意，甚至好多都係烽火聯盟去營運，不過，價錢，食物質素都好合理，就同之前無咩分別。
「你好，陳希。」一個年約四五十歲既女人。
「你好，你地就係烽火聯盟既人？」
「係，我係代表銀河集團。」
「我係代表晴希集團。」
「嗯，請坐。」兩人去左空化集團公司，見既，就係總裁。
「你地黎，係想啟動我地公司既秘密武器？」
「係。」
「唔好意思，我唔會咁做。」
「咳咳，聽聞，你有個仔。」陳希立即望住奇月。
「係咪？」
「係...」陳希即刻緊張起黎。
「佢，好似叫，王，成，翔。」
「你地想點！」
「唔好傷害佢...」
「我地絕對唔會傷害佢，只要，你肯用你地公司最後既武器去幫我地。」
「走啊！我唔想再見到你啊，你呢個垃圾女人！」誠翔老豆一巴摑落陳希到。
「媽...」而誠翔，只係可以係到喊，咩都幫唔到手。
「誠翔，你乖，聽爸爸話，大個要努力做人，比心機，賺多啲錢，比自己一個幸福既生活。」
「走啊，你同我走！錢又無，係到阻住晒。」
「老豆...唔好趕走阿媽啦...」我跪係地下，拉住阿爸褲腳係到喊。
「你都係啊，大個同我揾多啲錢啊！」老豆就一腳踢開左我，而阿媽已經比佢趕走左，直到而家，母子，都未曾見過面。
（故事即將進入尾聲，情節亦會越黎越緊湊，所以希望大家投票，將你想要既結局話比我知，又或者可以揀Happy Ending定係Sad End）（投票將會係一月十號截至）