《廿一歲個年，我成為左隱世富豪》－大結局: 第二十四章：日出之時

寒風越黎越大，吹到我醒左，朦朧既雙眼只能夠見到海上面反射出紅色既水面。

直到我擘大眼，睇下隻錶，只係五點半，而藍心依然訓係我大髀上，就好似睡公主咁訓得好甜。











「咦，醒啦？」

「係啊，訓左好耐？」藍心慢慢係我大髀起返身，亦被金紅色既日出吸引住。

「哇，好靚啊。」

「你都覺呢。真係好靚。」

相信係背後睇既一個畫面，就係一男一女坐住既黑影，被日出既太陽照射，個海都被染上紅色。





「不如，我地對住個日出自拍啊。」

「好啊。」

影完之後，藍心好似有野想講。

「誠翔，我仲未比份禮物你添。」

「係囉，咩黎架？」





「你合上眼先。」

「懶神秘。」

「唔好嚇親喎。」

幾秒之後，一個暖暖既吻化解左全身既冰冷，雖然有啲突然，但係我已經陶醉係入面，藍心更入侵我個口，鼻亦緩緩噴出暖氣，雙方既舌頭都進行吸吮，更加有節奏係口裡舔吻。






「誠翔，我鍾意左你。」藍心首先退後，然後再攬住我。





「我都係。」

「我覺得，你就係我人生裡面收到最好既一份聖誕禮物。」

「嘻嘻。」

我地互相攬住，攬得好實，會錫下面，錫下壓頭，但係激烈既互動，已經無再進行；不過估唔到，會係一個日出見證住我地既愛情既誕生。

「都八點幾啦，我地去食早餐啦。」




近近地，行出去見到間茶餐廳就行左入去。





「食咩啊你？」

「我飲杯熱奶茶得啦。」

「點得架，琴晚飲完咁多酒，而家唔食啲野。」其實，好似唔係幾關事，不過就聽下女朋友講啦。

「咁我要個沙爹牛麵啦。」

「乖。」

「唔該，要一個火腿通粉同沙爹牛麵，兩杯熱奶茶。」

「係呢，今日都係紅日喎，你諗住返公司？」

「哈，做我地呢行，係無紅日呢回事，日日都要返，除左你病到死，又或者要陪個女朋友咁囉...」





「咁就得啦，今日我要你陪我。」

「嗯。」




「不過，我想睇下白陸點，話晒都困左佢兩日。」

「好，我陪你去睇下。」

誠翔個心，始終離唔開公司既野，不過有上進心都係好事，只要佢仲記得我，仲愛我，就夠啦。

「喂，誠翔！白陸佢身體唔係好掂，希望你可以盡快黎到。」





「知道。」

「公司係咪有咩事？」

「係，要行啦。」

「嗯。」其實藍心都算一個體貼，順服既女仔，會鍾意我呢個凈係掛住做野，又亂黎既男仔。




「咩事，點解要咁急既？」的確係好急，我開到架車時速百幾公里。

「白陸佢有啲唔妥。」

「係呢兩日，我已經叫Chole瞞住所有人，話白陸病左，係屋企休息。」

「Chole？點解...」

「我遲啲再同你解釋。」




「副總！」我地跑入去基地，見到白陸訓係床到。

「白陸佢點？」

「佢呢兩日身體突然轉壞，我地檢查過，發現佢腎衰竭同埋血虛。」

「血虛？呢個男人真係...」

「咁醫唔醫得好？」

「好就無問題既，只怕佢再係到受折磨只會更慘。」
「凌晨三點同我掉佢去山頭。」

「知道。」




「你收到一項新信息。」

「你同我係一個鐘之內返公司。」

藍心見到我神態有啲不自然，問我咩事。

「做咩？邊個揾你。」

「我老豆，佢叫我返去。」

「咁呢到我搞掂，你返去先。」

「你唔使返屋企抖下？」

「傻佬，唔使啦，唔好唔記得，我仲係你強而有力既秘書，唔好要我做左你女朋友之後，就凈係識錫住我。」

「知啦，咁你小心啲，有咩打比我。」

我再以百幾時速返公司，啲油咁樣真係好快耗盡。

「咩事？」

「你將白陸收埋係邊？」

「我無，點解你要屈我。」

「我冤枉你？你問下自己啦！」

「我同你講，你係今日再唔揾返白陸出黎，我就動議挪去你副總裁既職位！」

「你好野！」

我轉身大聲閂門就返左辦公室。

「做咩咁嬲？」原來穎心係辦公室做緊野。

「我老豆叫我今日之內揾返白陸出黎，唔係既話，就動議挪去我副總裁既職位。」

「原來係咁。」

「係呢，阿明呢？」

「佢今朝搭左飛機去西班牙，佢話個邊有人需要佢幫手。」

「哦，咁你唔陪佢？」

「佢叫我留係到好好幫你喎。」

「咁就好啦，你幫我睇下阿怡間公司。」

「我聽日就會係會議動議你加入董事會。」

「董事會？」

「係，我需要你幫忙。」

「咁好啦。」




「我已經有齊對面班老餅既痛腳，我希望佢地聽日會乖乖地，投票比我。」




「喂，藍心？」

「做咩事？」

「將白陸立即掉到山頭，包括佢身上所有醫療用品。」

「知道。」