【英雄系列2】無敵光晨: 15
「哈.」陳理美輕輕一笑:「我唔知道你講緊咩1號喎..」
我冷笑一聲:「你依家唔認唔緊要...反正，我點都會將Cobra既人殺哂，包括你，陳理美~督~察~」
「你信唔信..我charge多你一條恐嚇警務人員罪丫嗱？」陳理美拉近同我既距離，雙目對望
「唔信....」我毫不懼怕佢既脅迫:「因為你要告，一早就告左我啦，駛困我響度搞大龍鳳？」
「哈...真係嚇你唔到喎..」陳理美叉起雙手
「1號你今次捉我返黎困住我，估計都係因為唔想我阻住你地既計劃，係咪？」
「...冇錯..」陳理美道:「我份人就只會為左任務先會做野，同任務無關既事，我係唔會做既..」
「砰！！」
我雙手拍枱
「咁樣...你又要殺死小蘭！？」
陳理美冷靜道
「如果你冇背叛我地Cobra、兼且打去IID告密既話，我都唔會出此下策」
「殺死最親愛既人，係我地Cobra對付叛徒既傳統」
呢一刻我緊握住拳頭，好想一拳就將呢個八婆打死！
不過依家我比佢困住，一定要冷靜！
「點呀...駁唔到啦？」陳理美問
「嘿..你字字鏗鏘，邊夠你講呀...」我飲一口咖啡:「咁你諗住困到我幾時呀？陳督察」
「等我地做好哂d正經野先啦，大約仲有2個禮拜」陳理美微笑道
「嘩，咁咪連聖誕節都冇得過！？咁無人性架你..」
「咯咯！」
一名散仔走入黎
「我咪話左唔准入黎囉，你..」陳理美皺眉道
「madam，慕容光晨既律師黎左...」
我轉頭一看，係一個身穿黑色西裝,身材瘦削既中年阿叔
「你好，我係慕容光晨既律師，林日發...我想問下，我client犯左咩事呢？」
陳理美回過神來:「慕容光晨佢涉嫌同今日下晝..」
「咁有冇片呀？！」林日發粗魯地答:「冇片就收嗲啦！你信唔信我告你非法禁錮丫嗱！」
見此情況，陳理美亦只好退一步
「慕容光晨，你可以走啦....不過，警方隨時都會搵你返黎協助調查」
陳理美企起身，響我耳仔邊講:「你唔阻住我地既任務，我係唔會殺你，但係..果兩兄弟咁憎你..你自己小心啦」
挑，駛撚驚佢地咩
「衰仔，次次都搞埋d大頭佛比我，上次就要我整假證書假record，今次就響highway殺人要我救」發叔笑道
「唔好咁啦發叔，最多下次請飲茶啦！」
發叔正正就係香港IID既高層人員，當年我老豆個殺人執照都係佢批出黎
上次潛入學校既事，正正就係發叔幫我整假證書假record，再hack入學校網delete哂其他申請
算係陳sir之外，另一個我可以信既老屎忽
今次正正就係我為左想知道Cobra底細而做既行動
先係襲擊對方運毒品既車，引出Cobra既人現身(2、4號)，再睇清楚到底邊個響警隊通風報訊既人(1號)
而響我被飛虎隊捉住之前，一早就開左gps，send左發叔，等佢響適當時候黎救我出去
發叔帶我到停車場
「話事話，今次光晨你查緊咩呀？搞到要總區塔你返黎既」
我點起煙:「普通野姐..」
「你..諗住幫你女朋友報仇呀？」
「你點知架發叔？」
「對方係Cobra，而襲擊佢地既人又係你，估唔到既都係傻仔啦」發叔坐上司機位:「我送你丫，你依家住邊呀？」
「上海街安美大廈」
發叔問:「係喎，你依家同緊咩人住呀？」
「唉，一言難盡，你一陣上黎飲杯茶囉，我介紹比你聽」
響返去既途中，我亦關心下發叔:「咁發叔你依排有咩大茶飯食緊呀？」
「唔好提啦，我手下果堆特工全部都收哂山，依家日日返去上下高登又一日」
我笑道:「咁咪既好..你都係時候退休啦」
「我退左休既話頭先點救你出黎呀，你聽比條八婆困返十幾日啦！」
「條八婆，係Cobra既人...」我望住窗外道
「唔撚係掛，條八婆好眉好貌..」
「邊有樣睇既姐..我咁靚仔夠入過Cobra啦」我笑道:「對佢黎講，要偽造一個身份空降做總督察唔係難事」
1號係Cobra入面權力最大既人，任何任務同作戰都係由佢黎計劃
同時，1號亦負責為成員製造任務用既假身份
返到偵探社
「光晨！！你冇事丫嘛！！」三人均緊張地問候我
「冇事...依家咪冇穿冇爛返到黎」我食住煙道
阿咲:「你知唔知素素好擔心你架！」
「嗯..」素素點一點頭:「我頭先好驚..光晨先生永遠唔會返黎呀..」
我望一望素素:「死o靚妹，對我有d信心啦！我咁撚好打點會死呀！」
阿南問:「係呢，呢位係..？」
「各位好..相信你地都聽講過光晨既事啦..」發叔非常聰明，已經估到佢地三個知哂我d野
「我就係當年批出殺人執照比光晨老豆既人，你地叫我發叔啦」
阿咲問:「咁發叔呀，頭先光晨到底去左邊黎？」
「我呀...頭先見到Cobra既另外3個成員」我飲住黑啤道:「佢地其中一個，就係警察部既人，仲要係總督察」
「唔係掛...」阿咲慨嘆:「咁..你諗住照樣...殺死佢地呀？」
「緊係啦，唔係我都唔駛特登跳過去架車度，引佢地三個現出真身啦」
「咁點解..光晨先生你唔同我地講呀！」
素素居然大聲咁同我講野
「呃..」我亦被佢嚇倒:「咁我驚你地擔心，唔比我去嘛...死o靚妹咁惡架..」
依家既情況大致上都已經非常清楚
不過有樣野我仲係唔明
0號呢？點解由頭到尾佢地都冇講起過佢？