<< 那年初夏，我們在微信釣的狗公 >> 再釣一次?: Part 8 第一章 - 母子
Part 8 第一章 - 母子
「本宮沒你們說的那麼偉大，本宮也想出去看看紫禁城外的生活，本宮不選擇出去不是不願意…而是我身不由己…」
電視傳來近排全城大熱既<<金枝肉露2>>大結局既濕勁對白，坦白講，自從TBB套<<八月十五的月光>>我就再冇追過TBB Ｄ劇集。
但係學似入面個愚妃話齋，人生在世，真係好多野都身不由己…
「哇，仔啊仔啊，你睇下個愚妃幾偉大…真係喊出黎…好彩放工返黎仲睇到個結局咋！」
對住TBB Ｄ懶感性劇集仲可以喊得出黎既依個影后級師奶就係我老媽子。
同普通師奶一樣，一邊食飯一邊睇電視就係佢唯一既樂趣，而作為孝子既我只好捨命陪媽子。
「唔好話比我講中，一陣咪又係愚妃同佢Ｄ公公係紫禁城度BBQ。」
當然，我係勁up架姐，如果個編劇真係諗到「紫禁城內BBQ」咁新穎既大團圓結局，我一定開post推爆佢。
自從老豆賣左鹹鴨蛋之後，老媽子為左湊大我就身兼父職一直打工，到左依家都差唔多到左第十五個年頭…由細到大相依為命，所以我同老媽子關係特別好，食飯果陣陪佢睇下Ｄ婆仔師奶戲就當係比家用，順便可以令我整理下思路，腦內描繪晚餐後改革世界既藍圖。
嘿嘿…講起上黎，我搵到個張無名mk妹妹相真係呃得下人，真係好向左走向右走期待班狗公會係用咩招數黎攻陷我…
於是飯後我就拿拿林衝左入房進行我邵獨藍改革依個世界既第一步。
WeChat，其實係一種IM (instant messaging)工具，同香港年青人常用line，whatapps唔同既地方就係佢個「附近的人」功能。姐係可以加埋哂Ｄ三唔識七既人做朋友，其次因為潮流所趨，WeChat成為左好多「食家」必備既工具。
名字？ 沈嘉儀
相？ 就梗係用我搵左成粒鍾既依個mk妹啦
好，程式已安，帳號已申，萬事俱備，只欠更新！
唔駛十秒，我就進入依個全新既世界！！
【歡迎你進入WeChat世界，希望你在這裹能夠結識不同的人，豐富你的人生】
冇錯，我邵獨藍(沈嘉儀) 既變革第一章已經要開始了。