《再來一次，然後成為英雄》: 6.夢

「你唔好去啦，我真係好驚你有事呀」星儀躺在我枕邊哀求著

 「放心啦，我唔會有事。」我輕輕的抱著了她，撫摸著她的髮端。這份體溫，這份香味，這一份情，不經不覺已經二百年了嗎?

 「咁你比我陪你去啦……我真係好驚呀……」星儀抱緊了我，十分的用力，用力到可以感覺到那微微隆起的小腹，這傻妹頭為什麼總是能如此的惹人憐愛呢……

 「今次唔可以呀，你有左BB呀嘛。」今次絕不能心軟，為了我們的將來……

 「咁你唔好走啦，就當係為左肚入面嘅BB」星儀抱得更緊了。





 「就係為左我地嘅小未來，我一定要去結束呢場無謂嘅戰爭，打左一百年啦，係時侯要完啦。」我推開了星儀，離開了溫暖的被窩，穿上了我的戰袍，喚出了寶刀天冥。

 只穿著一件輕紗的星儀從背後輕輕的環抱著我，挨在我的背上。

 我轉過身來，替她披上了一件披肩，然後擁了她入懷。

 「係我走之前，我想幫BB改左名先，就叫做……」

 「我唔聽！要改等你返嚟先改……」星儀抽泣著說。





其實我很怕我會回不了來，儘管我統一了東方，被尊為羅剎劍宗，但我要面對的卻是貨真價實的神……

 「聽我講啦，乖啦。唔理係仔定女都好個名我都改做樂平，我地經歷太多動盪啦，我真係唔想下一代再要活係戰火之中，我不求子女好似我地咁做英雄做豪傑，因為英雄二字絕非輕鬆，豪傑二字實在太重，我想嘅只係子女可以樂得平凡，就夠啦。」

 星儀沒有說話，只是點了一下頭。

 於是我準備轉身離去，在我別過面的一瞬間，她拉著了我。回頭就是一個深深的吻，

 這一吻是情深﹑是不依﹑是恐懼亦﹑是祝福，亦仿佛是她用舌尖作最後的挽留。





 可是，既已背上英傑之名，這一趟就不得不走……我離開了，就在出門的一刻，淚終於還是流了下來，但願我真能回來吧……

 鐘聲輕輕的將我由夢中喚醒，好像發了一個很長的夢……可是記得只有夢的最後我跟星儀接吻了……