《再來一次，然後成為英雄》: 5.兩位偉人

回過神來，眼前出現了一座古屋，四合院的設計，紅樓金瓦，氣勢不凡。

 隨星儀步入正院，只見兩位一身古裝的老伯正在對奕。仿似走進了古代，重點是果然在他們身上看不見任何光，卻感覺到極大的氣場。

 「到左啦。」說話的老伯，身型修長，眼如雷光，而且手執羽扇，只是不知道是那一位策士。

 「都係唔夠先生你鬥。」另一位老伯，身材高大結實，氣宇軒昂，而且腰間掛著一把華麗的劍，想必是一代戰豪。」

 「我帶左佢嚟啦。你地自便啦。」然後星儀轉身離開，好像有點害怕這兩位老伯的樣子。





 然後，兩個老伯打量了我一下。

 「唔錯，唔錯，細路你叫咩名？」武將老伯說

 「晚輩姓葉，名隨心無字。叫我心仔可.......可以啦。」

 「哈哈，用返你正常嘅說話方式得啦，我叫公孫軒轅，你叫我公孫伯伯得啦。」

 另一位老伯亦開了口：「我叫莊周，你可以叫我莊伯伯。」





 我驚訝得給不了任何反應，雖然能猜到兩位老伯都非凡人，卻想不到竟然是黃帝和莊子，華夏跟道家的開山祖師。

 「哈哈，唔洗咁驚訝喎，大多數係歷史上嘅大名基本上都好似我地咁係能力者，不過係對外宣稱死亡，實則在內則活得好好，甚者改名換姓再出去發動戰爭嘅都大有人在。因為基本上有寺廟供奉嘅能力者其實都唔會老死。」黃帝說

 「咁唔知兩位叫我嚟係？」

 「係我叫你嚟嘅，你坐低再講啦。」莊周說罷拍向本來無物的地方，然後一張椅子就出現了。

 我坐了在那張椅子，夾在兩位大人物中間正面對著棋盤。





 「隨心，你想成為一個點樣嘅人？」莊子說

 我思考了一會，深呼吸了一口氣：「其實我雖然而家係一個細路，但其實我已經做左三十年人，到左而立之年，奈何都係一事無成，為五斗米折腰，為左生活已經將所有大志消磨殆盡，只求家人朋友一切安好，樂得平凡已經夠，本來應該係咁，但原來當我有機會再嚟一次，我仲有嘅嘢想要得到，想去修補，想做一次主宰自己命運嘅勝利者，原來我好討厭屈服。所以我想成為一個可以隨心而行嘅人，就好似我個名一樣。」


 「你嘅隨心係指咩？你想要嘅係咩？」莊子再問



 我想要嘅係咩......詩詩.......「一個我心愛嘅女人。」


 「哈哈，咁你為左佢可以做啲咩？」

 這一次我沉默了很久，我只是一個連表白都不敢的懦夫，其實又有何資格談及想得到她，甚至於為她能帶來甚麼，做些甚麼，我根本不配，因為我曾做的只有逃避......





 「我.......唔知道，我好懦弱，懦弱到我覺得我講咩都好都唔會做到，但係可以嘅話，我想創造一個我同佢幸福咁生活落去嘅童話世界。」


 「哈哈哈哈.......好! 合格啦，葉隨心為左佢嘅話，你願唔願意變強？」黃帝說道。

 比起上兩條問題，呢條根本唔洗考慮。

 「我願意。」我堅決地說

 「好! 我同你講，因為神話嘅派系鬥爭，第三次世界大戰大約係三年之後就會發生，如果你要變強，你好大機會會係呢三年期間比我殺死，如果你唔變強，三年之後，你身邊嘅人一定會死。所以你真係願意變強？」黃帝再說

 「如果係真嘅，當然願意，但係恕我直言，我之前身處嘅世界一直到十年後都好和平，點解呢個時空突然會世界大戰呢？」 

 「原因說等我解釋啦，你有冇聽過平行時空？」莊子說。 





 「有。」講真係呢個時空故事泛濫嘅年代，邊個會唔知啊。 

 「咁就好啦，呢個世界有無數咁多平行時空，雖然叫作平行，但實質會定期交錯成一點再分散，每次時空交錯都一定會有歷史性事件發生，我地叫果點做歷史嘅收束點，即係話第一次世界大戰一定會發生，但之後會分散成同盟國輸或者協約國輸。

  然後再到第二次世界大戰又收束一次，本來二次大戰後嘅再收束應該係大約一百年後，但因為早幾日嘅時空扭曲，收束線提早到三年之後，而你亦都突然覺醒成能力者，所以我諗你應該係事件嘅主因，就拜託左星儀幫我手睇住你同帶你嚟呢度訓練你成為收束點嘅終結者。收拾好你種嘅因。」 

 「所以，其實唔理你願唔願意，用咩方法都好，我都一定會訓練你，不過你願意就最好啦。我同黃帝會好好咁將你變成救世主架啦，心仔。不過依家已經朝早，你差唔多要返學啦，所以我送你返去先啦。我地學校見啦。」

  莊子說罷便推了我一下，回過神來我跟星儀已在學校門前而且背上背著書包。而學校亦剛好是開門時間了。 

 「連校服同毛巾都準備好，真係犀利。」我不禁概嘆。

  「唔……唔知果兩個死老嘢會用咩身份嚟學校呢?」看來星儀真的不太喜歡他們。





  「唔知呢，其實點解你係咪憎佢地，好似好有敵意咁。」我好奇問道

  「你比佢地訓練過你就明架啦。我去換衫順便沖身先。」星儀感慨地說完就走向了女更衣室 

 我們分別換好了校服後便走上了課室，果然沒有人會那麼早回來……

  徹夜未眠加上昨夜又登了一次山的我倆，不約而同的伏了在桌上沉沉的睡去。