《再來一次，然後成為英雄》: 2.昏迷
講真，星儀個外表真係好正，同MOMO有幾分神似，而且愈係同佢傾計，果種我本身識佢嘅感覺就更強。呢種親切感其實先係我相信佢嘅主因，大概呢啲就係緣份。
而隨著時間推移，已經到左第二日朝早，簡單地調左一次位，而我地係三個一行咁坐，我左面係肥仔，右邊係星儀，晨哥坐係我前面，最最最重要，我嘅女神都係坐我前面即係晨哥隔離。
簡單一講先，女神全名劉奕詩，165左右高，五官精緻，星眸皓齒，重點係彈得一手好鋼琴，所以氣質滿分，記憶中佢中學一次拖都冇拍過。
呢次調位其實真係冇得輸，正當我開心緊嘅時候，頭突然痛到我意識都失去，真的是眼前一黑。
回過神來，我已經身在醫院的病床，而且時間已經是晚上八點，頭依然在痛，但不致昏到，到底發生了什麼?
「你醒左啦?」說話的人是星儀 「伯母同你班朋友岩岩走左啦，醫生話你身體冇事，搵唔到你暈低嘅原因，不過我知。」
「咁……我點解會……」
星儀摸了一摸我的頭，頭就不再痛了，然後她說:
「放心我會解釋比你聽，因為時機已經到……其實呢個世界有兩種人，一種係普通嘅人，另一種人注定不平凡嘅人，即係偉人。兩者本質上係一樣，決定你係咩人分野係在於你體內能量有幾多，愈多能量可以換取嘅就愈多，令你更加聰明﹑好運，甚至擁有超能力。但能量水平基本上係天生，但你嘅能量水平起一夜之間由普通人變成超能力者嘅水平，甚至令時空扭曲左一剎那，所以我先要嚟睇住你，所以你嘅身體會適應唔到，然後你就會暈。」
「下……我唔明喎，咩超能力呀?」
「意思係你唔再係普通人，你嘅身體開始適應之後，你就會明呢個世界係點樣運作。你要記住，由你返嚟果刻開始，你已然注定會改變呢個世界，會擠身到世界嘅內側。你訓醒一覺大概就會明。」星儀又再摸了一摸我的頭，然後我在不知不覺中又再昏睡過去。
一覺醒來，頓覺全身充滿力量，然後一張開眼，我看到了一些奇怪的光，應該說每個人都在發光，只係顏色和強弱都各有不同。然後我想起了星儀昨夜的話………我變了超人?
在一輪擾攘後，我正式出院然後回到了學校，因為要問的事實在太多了。
當我踏進了課室，班上的人都注視著我，而在我眼中他們都散著白光，我發現大部分的人都是散著白光，少數人是其他顏色，而剛巧我的女神和摯友都不是白光，詩詩是紫光﹑晨哥是金光﹑肥仔是橙光，而我自己則是極強的鮮紅色光。但只有星儀沒有發出任何光。
「心仔你冇事呀嘛，突然暈低真係嚇死我啦」詩詩一臉愁容的說
好感動呀，女神擔心我呀!!
「冇事呀我，尋日突然有眼訓想訓陣啫，點知一訓就夜晚仲入埋醫院啦，你話笑死唔笑死~」
「仲識搞笑即係冇事啦，今日放學記得練波啦咁。」晨哥向我胸口輕輕打了一拳，心照啦。
「冇問題啦，而家老虎都打死幾隻呀」
然後我坐回我的座位，星儀放了一本薄在我的櫃筒。
「你真係冇事? 」肥仔也問了我一句
「冇事呀，醫生都話冇嘢啦，有心啦。」
講真，人大左，真係大病過，你先知，有事嘅時候會擔心你嘅人其實真係要好好珍惜。
所以今次，我唔會比呢班兄弟再各散東西!
感動過後，我打開了星儀給我的筆記，裡面的字都發著微光。
內容如下「我知你有好多問題架啦，等姐姐話你知啦……
首先，每個人身上都有能量，在超能力者的眼可以看見不同顏色的光，白光是普通人，其餘的光則是有潛力成為超能力者的人，我會稱之為種子，不同顏色反映了種子的最主要特性，紫色係魔女，金色係皇者，橙色係神官，紅色係英雄。
而覺醒成超能力者之後，就唔會比人睇到自己發光，但可以感覺到大約嘅強度所以要小心無光者，除左我XD
而能量係世界上嘅一切，對超能力者而言，世界只有兩條定律:能量守恆定律﹑同萬有引力定律。
即係只要你能量夠大，就可以凝聚到其他較弱嘅能量體，如果你係超能力者就可以將能量變成物質，甚至令種子覺醒成能力者，覺醒嘅種子或者較弱嘅能力者會變成自己眷屬，更甚者可以吞噬其他人嘅能量令自己肉體不老，或者變成單純嘅能量體由內側推動世界嘅發展。
所有神話同歷史都係基於以上幾點而演變出嚟。
冇錯! 所有神話都係真實存在，天生嘅能力者係不同時期有不同名稱:神﹑佛﹑惡魔﹑鬼魂﹑怪物﹑妖怪﹑吸血鬼﹑狼人等等都可以用嚟形容能力者，唯獨唔可以再稱為人類。而由能力者開發能力嘅種子會站係人類嘅頂層，按主人指示推動歷史巨輪運轉。世界大約就係咁運作。
但係你係特別架，因為你的能量係一夜之間由白光變成非人類水平，因為咁我先可以有一剎那睇到你身上嘅光由白變紅再變成我睇唔到，同時扭曲左時空，所以你係人類嘅同時，你都可以收自己眷屬，咁代表咩?我都唔知，只係你要知道你嘅一舉一動都可以改變世界而且你必定會遇到其他敵對能力者。」
「呢本真係唔係奇幻小說嘅序?」
「你做咩望著本空白嘅筆記自言自語呀? 你真係冇嘢呀嘛?」肥仔打破了我的沉思……
而他又真的看不見書上的字……
看來只有相信了。