《執劍》外傳: 外傳－－一九六八年的千闕與少姻（六）
外傳－－一九六八年的千闕與少姻（六）
「哈哈哈。千闕，少姻，好耐無見啦。」
「斯龍！哈，的確好耐無見啦。」斯龍帶了一整隻豉油雞，帶到千闕的家中，為他們一家二口添餸。
「哈哈哈，好心你地就做返正常人。你地兩個咁樣點隱世呀？」這道豪氣的笑容聲，像是斯龍的代名詞。「唔通，少姻你煮飯都要用靈力點火咩？哈哈哈。」
少姻被笑著這句時，雙眼放空，面上像掛著兩串鮮紅的辣椒。「哈哈哈，咁都比我講中？」斯龍依然開懷地笑著，那豪壯的笑聲響得幾乎整幢唐樓都聽得清清楚楚。
看到苦笑得咬唇的少姻，千闕亦當然要站在她的旁邊支持。「咁都要有少少時間適應既，老婆，一齊慢慢黎啦。」
斯龍亦拿出一個認真的樣子說著。「係香港既高階三門者，只有千闕你一個，而中階三門者，大概只有我同你。我地強大既靈力，即使係一絲一點都好，都極容易令其他三門者察覺得到危險。如果有一日，你地兩個家族既人黎左，只要你地一用，我相信佢地都會感應得到。」
「我明白，我地會小心。」千闕露出一個自信的笑容，他相信著他與少姻，相信著彼此能夠廝守一世。他們兩個，都把自己的未來賭在對方身上。
「哈哈哈，記住啦。你地習慣香港既生活嗎？」斯龍始終擔心著二人，背棄自己的家族，自行離去。可是，生於門者大家族，豈是說走，就能走。
「開始慢慢習慣啦，但諗唔到係香港，依然有人利用制度同權力恃強凌弱。我一直以為香港係個自由開放既地方，睇黎，我錯啦。」千闕不禁慨嘆著。「不過我依然遇到好多重情重義既人，雖然大多都係一名粗漢，但至少真性情。」
少姻沒有向千闕提及過那警長，因為她不想千闕胡思亂想，擔驚受怕。在千闕心中，少姻不是一個中階三門者，而是一名溫柔女子。「不過好彩有黃婆婆同平仔，同佢地一齊談天論地，亦係一件樂事。」
「哈，斯龍，我相信你今日黎，唔係單單為左探我地咁簡單。」千闕雙眼中一片清澈，看到斯龍眉中的不妥，便知道門者界一定發生大事。
「哈哈哈，果然無野可以瞞得過你。」斯龍對此生有著這個好兄弟亦覺無憾。「九大傳說，已經逐一消失。真龍族同鳳凰族既族長竟然係同時間想退隱江湖，更平息兩族之間因你地而生既戰爭。你應該好清楚，以佢地既傲氣，根本無可能，亦即係代表住，背後有一個未知既組織可以左右傳說。打聽過後，呢個組織，好有可能就係一直身處外國既世界政府。」
「世界政府嗎？我係以前都有聽聞過呢個組織，財力大得可以左右國家決策，興波作浪。只係估唔到佢既影響力竟然可以大得滲入素來只有門者既門者界。」千闕無奈地長嘆著一口氣，心中思緒混亂。「唉，就連爺爺就不得不被逼退下嗎？能夠有辦法威脅傳說，我只係諗到一樣武器，核彈。」
「嗯，我都係咁樣諗。」作為三門者，對能量的波動極為敏感，尤其是那時在日本廣島和長崎引爆的核彈。那股巨大的能量波動，直逼高階三門者的奮力一擊，狠狠地，深深地撼動著他們的心。
「族長⋯⋯」想到這裡，少姻心中亦感不適，心中像一塊千斤重石壓著。
「既來之，則安之。」千闕一手撫摸著少姻的秀髮，以解少姻之愁。
「點都好，我總覺得，世界將會發生一輪大事。」在這時，已在門者界因豪氣萬分、說到做到和重情重義而享負盛名的斯龍，在世界各地看到不少蛛絲馬跡，可是他並非一位聰明的智者，到最後，依然想不通。「而且係最近，好多中階三門者就好似要得到某樣野而瘋狂廝殺，唉，我真係好希望係我想得太多。千闕，不如你⋯⋯」
「斯龍。」千闕一話，斯龍便知道他的意思。「如非必要，我都唔會再插手門者界。我宜家盼望既，只係同少姻享受生活。殺戮，我早已厭倦。」
「好啦。千闕，時候唔早，我唔係道食飯啦。」
「何解呢？」賢淑的少姻問道，畢竟斯龍亦見證著他們二人愛情的萌芽。
「哈哈哈，有其他門者需要我幫忙。」斯龍的豪情，千闕又豈會不清楚。他留在此處越長時間，就越容易讓千闕和少姻被人發現。「走啦，兄弟。走啦，阿嫂。」斯龍乾脆在樓頂和樓頂之間左穿右插，一瞬間便不見人影，比起搭坐的士更快。
隔日，少姻煮了一頓健康無添加而無味的飯菜給千闕作為早餐後，他便如常地出去地盤工作。到了早上九時半，少姻便走出門外，因為這是她們一眾婦女的約定時間，一起去買菜。可是在樓層中，少姻和幾名中年婦女怎等亦等不到另一名少婦，不禁惹起了一陣擔憂。
突然，少姻察覺到有數人不懷好意地走向自己的樓層。「咦？靚女，我地又再見面啦。真係有緣。」
「我唔認為呢種叫做緣份。你地上黎做咩？」少姻冷冷地說著，其餘兩名中年婦女看到那個臭名遠播的警長竟怕得躲在少姻背後。
「哈哈，我就係鍾意你咁有性格。你地等緊人？或者⋯」警長露出一個奸詐的淫笑，而其餘兩名警員都一同笑著。「你地點等，都等唔到架啦。」
少姻想起了斯龍的說話，一直按捺著自己的怒氣，為了不張露自己的氣勢而深呼吸著，可是她依然氣得咬牙切齒。「你捉左美美？」
「原來佢叫做美美，哈。咦，呀拔、呀濤，你係咪好似見過佢呀？」他背後那兩隻應聲蟲便馬上點頭和應。「咁不如，少姻，我帶你去搵佢？」
那兩名中年婦女明知這是一個陷阱，便拉扯著少姻的衣服，細細聲叫她不要前去，但一向俠義心腸的少姻又怎會棄美美不置，反正警長目標只是自己。「好。我就跟你去搵美美，希望佢一直安全。」
「唔好去呀。」「少姻，咁點得架！」「你諗真少少啦！」
「收聲！」警長一喝，害怕她們的說話會令少姻改變主意。這一喝，喝止了那兩名中年婦女的說話和動作。當他向少姻說話時，就回復那虛假的禮儀。「少姻，呢邊。」
眼中沒有一絲懼色的少姻轉身向另外兩名中年婦女微笑著，說道：「放心，我唔會有事。今日呢件事唔好話比我老公知，我唔想佢擔心。」
「少姻⋯」那兩名中年婦女心情忐忑不安，不知該怎麼辦，尤其當她們看到警長淫邪的眼神，她們便想起在那傳聞中，他曾強暴過數名女子。
當然，只是傳聞，因為根本無人起訴過他。