[愛情無限loop] 就係咁，我做左女神一年既備胎: ３３４　請勿靠近車門

見返阿琪，我好激動地企左起身後就攬住左佢，「阿琪，妳究竟去左邊啊，妳知唔知我地搵左妳成晚架拿。」

我唔知阿琪而家咩野表情，只知道佢好似笑左笑話：「你又食我豆腐。」

「無論妳講咩野，我今次一定唔會放開妳。」我抱得佢好緊。

而佢，又笑左笑話：「傻瓜。」然後，好大力咁推開左我，指住我個頭不停咁鬧我，「我好似仲嬲緊你，做咩要比你攬住我啊。」

「我……我……你嬲我Ｄ咩野啊？」我問。



「咁都唔知，突然間消失左，我狂ＳＤ　ＭＳＧ比你又唔應，你知唔知我幾擔心你架。」佢好嬲咁話。

「咁妳都失蹤無應我啦。」我無奈咁話。

「就係因為你咁做，我先咁樣做咋，等你知道唔見左人其他人會有幾咁擔心。」佢仍然好嬲咁望住我。

不過，我睇得出，佢既嬲係假扮出黎，不過，我都有錯既……「對唔住。」我講完呢三個未後，阿琪開始忍唔到笑，但佢依然要扮下野話：「我唔理，今次要食返十次自助餐先補到條數。」

「十餐！？」我扮晒嚇親咁話：「可唔可以打個七折啊。」



「咁你係唔係仲想搵多我一陣先？」阿琪好得戚咁問。

「咁緊係唔係啦。」我笑住話，然後又再一次攬住佢。

「你又做咩無啦啦攬住我啊，仲咁大力……」「阿琪，唔好再走開。」我講左呢一句後，本身仲想推開我既阿琪，都無再有意慾推開我，反而，佢雙手緊緊地抱住我話：「應該係你以後都唔好再走開。」

「嗯。」我點一點頭。

「做咩頭先同班樂隊講我係你女朋友啊？」阿琪問。



「下！？妳頭先聽到？你頭先係果度架？」今次到我放開左手問佢，阿塔同阿珍聽到都覺得好奇怪，「點解妳見到我地唔即刻話我地知。」

阿琪吱吾左幾下後，笑住話：「我走開係因為我要去廁所，所以入左商場裡面，一出返黎，就見到阿牛係度問緊樂隊野，我未企係條柱後面偷聽囉，跟住就聽到阿牛話我係佢女朋友，佢係我男朋友，一定要搵到我……」阿琪講到呢度臉紅紅咁望住我話：「你啊，都唔知個羞字點寫架，叫得咁大聲，慌死其他人聽唔到咁。」

我聽到佢咁講，自己塊面都好似紅左咁。

而阿珍聽到阿琪咁講後就問：「咁點解妳偷聽完唔出黎呢？」

「我想架，但你地見到個鼓手比左個方向後就跑得勁快，我都追唔到。」阿琪呢一句後，阿塔同阿珍就望住我話：「早知就唔駛跑啦，今晚跑得我幾辛苦啊。」

「未係，仲要比Ｄ路人當我地係傻添啊，當你就話姐，我地兩個本身唔關事都拉埋落水。」聽到佢地咁講，我真係有Ｄ唔好意思。

但係，我更加唔好意思既係，原來阿琪頭先係見到我發生既一切。

「但我有樣野唔明。」阿塔呢個時候問阿琪：「妳又會無啦啦係地鐵站出現既？」



阿琪望住我地三個笑左出黎話：「我諗你地三個搵唔到我，點都會走掛，所以我未係地鐵站等你地囉。」

「咁如果我地唔係坐地鐵，妳未白等？」阿珍問。

「唔緊要啦，唔等都等左咁耐，等下又有咩所謂。」阿琪話。

係，我等呢一刻真係等左好耐。

我地四個入左閘後，阿塔同阿珍就行係我地前面，我同阿琪就並肩而行，「你仲記唔記得我地第一次見面果陣，佢地兩個都係我地前面。」阿琪同我講。

「係啊，咁樣就一年。」我無意中，拖實左阿琪隻手，「一年，發生左好多事。」

「係啊。」阿琪微笑咁望住我，「有件好重要既事要講，節哀順變。」



「有心。」我回應阿琪。

行到落月台，好快就有車，我地四個好快咁衝入左車廂，但係估唔到……「阿牛，做兄弟既，點都會識做既。」呢一句係阿塔同阿珍一齊講。

請勿靠近車門……

阿塔同阿珍同時向後行左一步，行出左車廂外，「你地兩個獨處下啦。」「係囉，你地兩個一定有Ｄ野要好好傾下既。」

Ｐｌｅａｓｅ　ｍｉｎｄ　ｔｈｅ　ｄｏｏｒ……

「你地……」我同阿琪望住佢地兩個，見到佢地用電話對準左我同阿琪，影左張相。

ＤｏＤｏＤｏ……

門關上後，我望住門外既佢地，笑得好得戚又得意，而我電話震左一下，「影得我好醜啊。」原來，佢地將張相ＳＤ左出我地搵阿琪既ＧＲＯＵＰ入面。



呢一刻，我同阿琪講：「可以搵返妳，真係好。」

「嗯。」阿琪點一點頭，「但我地真係有Ｄ野要傾一傾。」