[愛情無限loop] 就係咁，我做左女神一年既備胎: ３３３　再一次去諾士佛臺

「阿牛，起身，你唔可以咁樣……」阿塔對住已經好頹廢住係度既我。

但我，呢一刻真係唔想郁。

「阿牛，你要振作Ｄ啊……」阿珍好擔心咁同我講。

我繼續望住眼前呢一隊樂隊，佢地就唱緊，唔知……唔知阿琪坐係呢個位果陣，聽緊Ｄ咩野歌呢？

「阿牛，呂晨佢地問緊我地點啊……」阿珍話。



等等！？我頭先諗緊Ｄ野，好似有Ｄ好重要既ＭＳＧ我自己都遺漏左……唔知阿琪係係呢個位果陣，聽緊Ｄ咩野歌……係ＷＯ！如果阿琪頭先係坐係呢度，好有可能呢隊樂隊會見到阿琪架ＷＯ。

我一支箭咁衝向隊樂隊果度，阿塔同阿珍都比我呢個動作嚇左一跳。

「唔該你地有無見到呢個女仔啊？」我拎返手機果張相問佢地。

「……先生，呢張相咁暗，我唔係睇得幾清楚入面果個人係咩野樣。」個樂隊主唱同我講，而我就再搵一張阿琪影既相比佢睇，「呢個女仔。」

「阿牛，你做咩無啦啦咁問人啊，嚇親人架。」阿珍行到我旁邊話：「唔好意思，我地而家搵緊一個朋友。」



個主唱望一望佢班團友，班團友見到張相都話無留意，除左個鼓手，「呢個女仔好似頭先坐係我地對面聽左好耐歌……」「佢而家去左邊！！！」我行到個鼓手前面問。

「等等先，呢個女仔係你邊個？」個鼓手問。

「佢……佢係……」阿琪係我邊個呢……我係阿琪既……「個女仔係我女朋友！我係阿琪既男朋友！佢而家唔見左我一定要搵返佢架！！！」

我竟然講左呢句野，我自己都估唔到我有勇氣咁講。

個鼓手聽到我咁講後，笑左一下話：「頭先個女仔走左去果邊。」佢用鼓棍指左個方向比我。



「多謝你啊！恩公！」我見到個方向就即刻跑左過去。

「……又跑。」阿珍苦叫。

「跑啦，我覺得今次真係可以搵返阿琪。」阿塔話。

本來我已經對呢個希望感到失望，但而家呢一刻，我面對既係另一樣野，奇跡。

我向住一個方向不停咁跑，無目的地咁跑，跑到幾時想停低？唔知，可能，係無氣就會停低，又有可能，係見到阿琪就會停低。

「阿琪！妳係邊啊！」我一邊跑，用我僅有既氣力去叫，旁人見到我以為我係個傻佬，無錯，有邊個為左愛情唔會整到自己變成一個傻佬。

但係，到最終，我都只係無力地企左係一個好擴既地方……呢個地方，無阿琪

「仲咩停低啊？」從後趕上黎既阿塔同阿珍問。



我望住個夜空，唔通，奇跡無降臨到。

失望後，只有更失望，我地三個行返去地鐵站既路上，我就成個行屍走肉咁，如果唔係有阿塔同阿珍係我前面開路，我諗我唔會理前面有咩，都只會向前行。

直到，去到地鐵站。

「地鐵應該就關門，我地行快Ｄ……啦。」阿珍講講下，望住無啦啦蹲低既我。

我唔甘心，我唔甘心搵唔到阿琪。

「阿牛，你唔好咁啦。」阿珍話，而旁邊既阿塔都咐和：「係囉，我地可以由第一個地方再搵過架。」

我搖頭……都無用既，就算我點努力都好，都唔會有結果架啦。



失望感既驅使下，我抱膝喊緊，點解？點解已經帶走左老牛大人？而家仲要唔比返阿琪我？係未真係要將我所有既野收晒先覺得我今次先上好一課？

我已經決定左之後既野啦，點解唔比返一Ｄ我想要既野比我？

「喂，阿牛……」係阿塔叫我，但我而家咩人都唔想理。

「阿牛……」今次係阿珍，但我真係唔想理其他人。

然而，突然有人好細力踢左我一下，呢一人係我正前方，我淚眼見到呢個人對鞋，好似係邊度見過咁既？

我擦一擦淚眼，從下而慢慢向上望，直到，我見到佢既臉蛋，佢果對好吸引我既眼睛，微笑咁同我講：「我其實想去諾士佛臺，不過唔知點去，你可唔可以再帶我去啊？」

係阿琪！！！

我同阿琪第一次相遇既地方，佢又係問我呢個問題，阿塔阿珍都在場，估唔到今次搵返阿琪既地方，都係一樣。