[愛情無限loop] 就係咁，我做左女神一年既備胎: ３２３　餐廳內的約定

去到阿琪爸爸所講既餐廳，如果唔係佢話比我知，我係度住左咁耐都唔知有一間咁既野，阿琪爸爸一早就到左，我行到去佢所坐既位置度，「世伯你好。」

阿琪爸爸見到我後，就話：「坐啦。」而當我一坐低後，佢第一句說話係，「節哀順變。」

而我就向佢點一點頭，「你有心拿。」係小段教我，我發生呢Ｄ情況，應該要講有心，唔應該講多謝。

呢兩句簡單既對話後，阿琪既爸爸就直入主題，「我今日叫你出黎，係有兩件事。」佢好認真咁望住我話：「我知道你好鐘意我個女，我亦知道佢有好多人鐘意，但點解佢要選擇你？」

我無諗過阿琪爸爸會問我呢個問題，呆左望住佢，而佢等左一陣都見我仲未答到佢既問題，又話：「而家答唔到唔緊要，有時有Ｄ野，要諗清諗楚先答好Ｄ，你比起我以前見過既果Ｄ男仔，都算係好果班。」



「好果班？」我問。

「我意思係答我問題無直接答，我最唔鐘意果Ｄ懶係有性格同浪漫既答案，你肯思考係好既，不過唔代表你係適合阿琪。」阿琪爸爸又話，然後遞左個餐牌比我：「陪我食個ＴＥＡ啦。」

又食野……不過要比面阿琪爸爸，我叫左個三文治餐食。

「世伯，你頭先話叫我出你係為左兩件事，咁另一件呢？」我問，而阿琪爸爸笑左笑話：「我身一件事都未同你講，頭先我只係問你野，唔算係一件事。」

……係咁架原來，「咁世伯你搵我第一件事係？」



「你係未選擇要跟我個女一齊上大陸？」佢問。

我認真咁諗左一陣，然後答佢：「與其說跟你個女上去，不如話係我選擇自己條路，我想上去係我自己既選擇，與任何人無關。」

「與任何人無關……」阿琪爸爸重覆左呢一句後又話：「但如果，我話阿琪聽日就要返上去，咁你會點呢？」

「世伯你唔好講笑啦，聽日……」我望住認真既阿琪爸爸，然後問佢：「世伯你唔係講真掛。」

「你答左我先，你會點，你而家爸爸岩岩先走，如果你走左，你媽媽會點？」呢個就係我而家最糾結既問題，如果我而家走左，屋企只係得返媽媽一個，我唔可以比媽媽失去左一個老公後，仲要無左個仔。



但係，阿琪佢……

「如果你真係要阿琪聽日返上大陸既話，我只可以話天意弄人，但就算係咁，我聽日唔上去，他朝有一日都會上去。」我答阿琪爸爸，而佢就問：「點解他朝一日仲要上去？」

「無錯，試過可能唔會自己想要既結果，到時可能會後悔，但我更加唔想我咩野都唔做而令到人生又多左一個遺憾，對於我爸爸既死，我發覺我以前無抽時間陪佢，呢一種遺憾已經好大，所以而家呢一刻，我想先陪我媽媽，等到適合既時間後，我一定會再搵返阿琪。」我好認真咁答阿琪爸爸。

阿琪爸爸有Ｄ滿意咁點一點頭，「但係，係你同阿琪分開呢段時間，我仍然會幫佢安排好多相睇既機會，你唔驚咩？」

「驚，但係阿琪一日未結婚，我都仲有機會，而且我地相方都對大家有特別既感覺，如果有朝一日我地兩個都無左呢種感覺既話，我只可以認命，但係只要呢一種感覺仲存在既話，我就唔會輕易放棄。」我仍然好認真咁答阿琪爸爸。

「你真係好傻。」阿琪爸爸話：「不過我個女都係，又細到大我管得佢好嚴，嚴到連身邊既人都會話我駛唔駛咁過火，我自己性格又鋼烈、衝動，所以令到阿琪佢都負擔左好多野，我知道佢阿媽好想自己個女早Ｄ嫁出去，係因為唔想再比阿琪生活係呢個咁崩緊既家入面，一切都只可以怪自己無好好對佢地，所以我最想安排到一個好男仔，無論性格同家底都可以比阿琪幸福既人。」

「但係，家底好都唔代表會對阿琪好。」我話。

「我知，所以而家仲搵緊。」阿琪爸爸笑住同我講：「我係想話你知，將來仲有排搵，阿琪仲會有好多相睇，所以會有好長既時間，你明唔明我講既野？」



我思考左呢一句一陣後，終於明白，「多謝你，世伯。」原來佢係想話我知我仲有時間，不過都要好好把握機會。

三文治餐到，我咬左一啖後又問：「咁世伯，第二件事呢？」

阿琪爸爸聽到我咁問後，又嘆一嘆氣，「個衰女佢又唔見左。」

「下！？」唔係掛，阿琪佢又玩消失。