[愛情無限loop] 就係咁，我做左女神一年既備胎: ３２０　巧合既遺書

小段回左我一個ＭＳＧ，ＳＤ左個地址比我，照住個地址黎到紅磡呢一個香港殯儀業集中地，呢位小段約左我係一個食豬雜面好出名下既食店度等。

一入到去，我就見到佢，佢真係好似ＭＲ入面既主唱，「我係度啊。」估唔到把聲仲好似陳奕迅添。

我行到佢果位後住低後，佢就問我：「點稱呼你？」

「叫我阿牛。」我答。

「阿牛生，唔知你係想為邊位處理身後事？」小段問。



「我……我阿爸。」就算講左好多次，當係自己口中講比其他人知自己既親人走左，個種心情仍然好傷感。

「節哀順變。」小段講完呢句後，佢就入正題，講左好多處理身後事既方法，呢度我就唔詳細講，因為都幾複雜下。

「係呢，唔知先人有無咩野遺願？」小段問到呢度，我個腦突然一空，因為，老牛大人走得咁突然，真係咩野都無講低。

而且呢一句令我諗起老牛大人走既果一晚，阿媽幫老牛大人閉上個口果陣講左句，「你係未仲有好多野想講啊……唔駛講架拿……我地知架拿……」唔知老牛大人係未仲有野想講比我地知？

「無。」呢個係呆左幾秒後既答案，而小段聽到後，就話：「明白既，咁你拎呢ｄ計劃返去同你媽媽商量，揀好之後打比我，如果我電話唔通，可以ＳＤ　ＭＳＧ比我。」



「嗯。」我點一點頭，不過腦入面仍然係佢問我既問題。

「牛生，先人已經走左，佢地都唔想我地唔開心。」小段呢個時候同我講，而我就望住佢，見佢示意地望一望我眼前果碗無郁個既面，「我明白你而家既心情，但係，人始終都要食飯，而且如果你唔食飽，點會有氣有力幫先人既最後派對搞得好好睇睇。」

佢……講得岩，就算我點食唔落野都好，有都要有氣有力落去。

返度屋企，媽媽一個人好靜咁坐係個廳入面，眼姐姐咁望住個開住既電視，「返黎拿，點啊？」

我拎左小段比我既計劃書佢，「果個人幾好，比左幾個計劃我地揀。」



媽媽拎左果幾份計劃後，睇左一陣，直到佢睇到其中一句，「完成先人所想，係尊重的愛。」阿媽睇到呢句後，眼淚由眼角流出，「我地想咁做，但係佢走得咁突然，我地都唔知應該點。」

我行到阿媽面前幫佢擦去淚痕，「唔緊要，阿爸想點我地會知。」

「佢……想點？」阿媽好似突然諗起一ｄ野，「牛仔，你枱面係未有封信？」

「係啊。」我答佢。

「我記得你阿爹走之前，好似寫左ｄ野同入左ｄ人民幣入個信封度，我果陣問佢做咩入人民幣比你，你阿爹就話你遲ｄ要返上大陸一段時間，仔大仔世界，比你去闖下ＷＯ，跟住就入房放低左封信係你枱面。」

信……信封！？我記起老牛大人走果晚，我返到黎果陣有一個好厚既信封放左係枱面，唔通！？唔通就係老牛大人留得比我既信？

我即刻衝左入房，係枱面度搵左一陣，就搵到一封好厚既信，就係果一晚，我見到果封。

估唔到，呢封信會成為老牛大人既遺書。