[愛情無限loop] 就係咁，我做左女神一年既備胎: ３１３　好傻的人

「我搵到阿琪。」係搵到阿琪後一個鐘後，我先打比藍臣。

「咁佢而家係邊？」藍臣聽到我既消息，好激動咁話，而我卻好冷靜同佢講：「我會帶阿琪返黎，一陣係阿琪屋企見。」我講完後，就收左線。

而企係我旁邊既阿琪聽到我講後，就好擔心咁話：「咁樣做真係好？」

我拖住阿琪隻手同佢講：「放心，我講過，以後既野，就交比我諗。」

今晚既夜空，真係好黑，黑到，一粒星都無，而我同阿琪係呢個放夜空下，慢慢行返屋企。



「你記唔記得，我地第一次見面係點架？」我問。

「我記得，係阿珍買鞋交收果日。」阿琪微笑答我。

「係啊，你果日仲話約左人飲野，但個地方唔識去。」我話。

「我不嬲都係路痴黎架啦，你啊，以後唔準笑我呢樣野。」阿琪答。

「好難唔笑架ｗｏ。」我話。



「唔理，總之你唔可以笑。」阿琪話。

「妳咁樣姐係欺負我姐。」我話。

「又係你講過，以後我可以隨便欺負你既。」阿琪話。

「其他人就唔見妳記得咁好，呢ｄ野妳就記得。」我話。

「你講既每一句話，我都記得。」阿琪話。



如果，時間可以永遠停係呢一個時候就好，就算黑夜無星都好，只要可以同阿琪一齊咁甜蜜傾計，我犧牲任何野都可以。

不過，時間始終會向前行，好快我同阿琪就行到佢屋企樓下，遠處已經見到藍臣，以及阿琪爸爸同媽媽。

阿琪爸爸一見到我地兩個拖住手，已經怒氣沖沖咁跑到我地面前，「又係你！做咩帶走阿琪！？」

「唔係佢帶走我架！」雖然上次藍臣話阿琪為左我反駁佢爸爸，但係今次，係我第一次見到阿琪咁樣做。

佢捉得我隻手好緊，我明白，因為佢以前好少反駁佢爸爸，佢而家呢一刻好緊張同好驚，而我，都捉緊左佢隻手，因為我想佢知道，上次只得佢一個人反駁爸爸，但今次唔同，有我係度同佢一齊。

佢爸爸見到阿琪咁後，就話：「就係因為你！我個女先會變得咁大膽！都係你帶壞左我個女！」

「我無。」我好認真咁同阿琪爸爸講，而阿琪本來想講野，但都比我制止左，「等我講。」我對阿琪講完呢一句後，就好認真咁望住佢爸爸話：「其實，我明白每個父母都擔心自己既仔女以後既幸福，但係佢地有無諗過，佢地所想既幸福，並唔係佢地仔女最想要既野。」

聽到我呢一句後，阿琪爸爸無言，而藍臣同阿琪既媽媽都黎到，我就繼續講：「佢地肯就範，聽你地既擺佈，係因為佢地尊重你地係佢地既父母，亦都唔想因為一ｄ小事家嘈屋閉，世伯，你知唔知阿琪為左呢一個家，已經犧牲左好多野。」



「我……我唔知！呢ｄ係我既家事！關你咩野事！」「由今日起就關我事！因為我會以結婚為前題正式追你個女！」我無諗過，我可以係阿琪面前咁有勇氣講呢一句話。

「我已經決定左，阿琪上去既話，我都會跟埋上去，阿琪去邊，我都會去邊，我唔可以擔保而家可以照顧得阿琪好好，不過我可以肯定以後可以。」我對住阿琪爸爸講。

阿琪爸爸仍然好怒氣咁話：「……你呢個死靚仔係未想死！」「世伯！唔好咁先！」藍臣衝左過黎，擋住正想打我既阿琪爸爸話：「而家阿琪都返左黎，就唔好再搞大件事。」

佢聽到後，都沉一沉氣話：「好，唔搞大，但呢個死靚仔唔好咁妙想天開，我係唔會咁易比交阿琪比佢。」

唔知點解我聽到呢一句，我無唔開心，反而，我覺得有希望咁同佢講：「唔緊要，我今次同你講，係通知你，有個好傻既人會唔理你既睇法，不停咁追求你個女。」