[愛情無限loop] 就係咁，我做左女神一年既備胎: ３１１　菜老闆既說話

我究竟……做緊ｄ咩野……

「阿牛你鍾唔鍾意食呢樣架？」

「阿牛你平時鍾意玩ｄ咩架？」

「阿牛聽晚我約你去睇戲好唔好啊？」

點解……點解有咁多女仔會為住我問咁多野既……突然間咁樣，我真係係適應唔到，而且……跑ＧＲＯＵＰ果班男ＭＥＭＢＥＲ，個個都對我目露兇光咁。



呢一種目露兇光好熟識，就好似以前呂晨或者阿琪同我講野果陣，佢地都咁樣望我，但係今次，果種壓力係大好多，大到，好似有種想殺左我既感覺。

如果呢個時候，佢地係度一定會笑緊，我講既佢地，當然就係ＪＵＤＹ佢地，而阿琪如果見到我咁，唔知會點呢？

跑完既呢一餐飯，我第一次食得咁唔自在，回想起以前，阿琪都成日比ｄ狗公不停問野，而家既我開始明白佢既感受，其實有時，唔係一個你在意既人問你好多私人既問題，果一種感覺，只會覺得煩厭。

食完，好似無食咁，唔怪得每次阿琪食完呢一餐飯，都會同我佢仲好肚餓。

原來，佢講既係真。



係我走果陣，又係一陣既騷動，因為，果ｄ女仔爭住要我陪佢地返屋企……不過今次好彩，菜老闆竟然幫我打圓場話：「阿牛今日約左我有ｄ野要傾，所以第日先送你地返去啦。」

佢講完呢一句，都無理班女仔既同意，就拉走左我，而我就咁樣同佢一直行，「唔該你啊菜老闆。」

「傻啦，見你比咁多人圍，唔救你點得ｗｏ，唔好睇我平時咁鍾意係旁邊睇戲食花生啊，適時我都會識做既。」菜老闆話：「你呢，呢排阿琪都好少出黎跑，佢無野嘛。」

聽到菜老闆咁問，我都嘆一嘆氣，講左少少比菜老闆知，而其中，都有講我想陪阿琪返上去既事，佢一聽到我，好驚訝望住我話：「估唔到你竟然可以做到呢一種地步。」

我聽到佢咁講，只係笑笑口咁話：「其實我都無諗過我會做到咁架，菜老闆啊，你會唔會覺得我咁做，其實好蠢。」



菜老闆拍一拍我既膀頭話：「牛仔，而家呢個年代，好少有你呢ｄ可以為愛情犧牲到咁既一個地步，但係呢知唔知咁樣既犧牲，可能得唔到你想得到既結果？」

「……我都知。」我答。

「咁你又去做？」菜老闆問。

我地而家行緊既路，係我同阿琪每次跑完步返屋企都會行既路，係呢條路上面有好多我既既回憶，而我最記得，係果一晚，我地擦肩而過既一吻。

「菜老闆，原來一個人，真係可以為左另一個人而無左自己架，就好似，我而家咁……」唔知點解，呢一刻，我好想講出我自己藏係最心底既話：「其實，我好驚，我好驚我為左阿琪犧牲左咁多，但係佢都係唔知道我既好，我好驚，我為左阿琪已經無左自己，我好驚，我搵唔返以前既自己，不過，我仲驚既係我以後搵唔返而家呢一個好愛阿琪既自己。」

我一直搵人想支持我既諗法，係因為我怕自己無左為阿琪犧牲既勇氣，但係，好多人都明白我咁樣做，都唔會有好結果。

菜老闆望住無奈既我，只係講左呢一番話：「愛情既結局，唔一定要一齊先係完美，可能，大家分道揚鑣，都會係一個完美結局。」