[愛情無限loop] 就係咁，我做左女神一年既備胎: ３０３　愛情有無男女之分？

金姐留左我係佢屋企食飯，熱情難卻所以我答應左佢，係佢煮野食既期間我同阿銀都傾左好多，不過佢無問我先前既記憶，只係問我關於而家一個年代同佢記憶中既年代有咩分別。

我有反問返佢，點解唔問一ｄ關於佢自己既回憶，佢微笑答返我話：「好似頭先所講一樣，我想自己去搵。」

傾既期間，一路聞到金姐煮野既味，真係好香，阿銀都話金姐煮野食好好食，今日我可以留係度食係我好彩。

我就笑笑口咁認同。

然後，門口突然有一陣搵鎖匙既聲音。



「阿女，幫我開門。」金姐係廚房大叫左出黎。

「知道。」阿銀用同樣既樣浪回答後，走左去門口果邊開門，「我開門仲快過你搵鎖匙，ＳＵＮＮＹ你手腳真係慢。」

ＳＵＮＮＹ聽到阿銀咁話佢後，笑左笑話：「妳呢個靚妹唔好以為你阿媽係我女朋友，我就唔敢教訓妳ｗｏ。」

「你敢咩？」阿銀扮到好得戚咁同ＳＵＮＮＹ講笑。

而我見到ＳＵＮＮＹ，先係呆一呆，無錯，我一早知佢同金姐而家係情侶關係，但突然係金姐屋企見到佢，真係意料之外。



ＳＵＮＮＹ入到屋，見到我係度就話：「阿牛，你黎左啊？」

我點一點頭，心諗真係巧恰，我想問意見既其中一人，除左金姐，就係ＳＵＮＮＹ。

ＳＵＮＮＹ坐低後，阿銀就好識做話：「你地兩個傾下計先，我入去幫我媽媽手。」

「妳入去幫手？咁今晚仲ｄ野仲食唔食到架？」ＳＵＮＮＹ話。

而阿銀都不甘示弱話：「係啊，我會係你食既野度落毒，你今晚唔好食啊。」然後就走左去。



我見到ＳＵＮＮＹ同阿銀既關係咁好，我都好開心，而ＳＵＮＮＹ係阿銀走左之後，就問我：「今日上黎係未有咩野事？」

「你又知？」我問佢。

「你有幾何會主動搵阿金先得架，搵得到一定係有野想問佢啦。」 ＳＵＮＮＹ果然係見慣世面。

又係一樣，我同ＳＵＮＮＹ講左阿琪既野，然後佢一臉既苦思後話：「阿牛，你覺得愛情，有無男女之分啊？」

突然間既問題，令我都唔知點答佢好。