[愛情無限loop] 就係咁，我做左女神一年既備胎: ２６８　與藍臣對話

其實阿琪所講既說話，我已經聽左不下數十次，有一種特別既感覺，係習慣左既感覺，但呢一種感覺，係好事？定壞事呢？

定係其實我對阿琪呢Ｄ舉動已經盲目。

同阿琪食完野後，阿琪都停叫我比佢加入幫阿銀既行列，但今次我拒絕左佢，因為我話左佢知ＳＵＮＮＹ同能蟹唔想有其他人知。

聽初初聽到係度扮嬲，最後見我都係咁拒絕，所以佢都放棄左。

呢一次，應該算係我第一次拒絕阿琪既請求。



食完野，同佢行左陣超級市場，我同佢好似以往咁一齊行，好耐都無試過咁，但我心中有種感覺，總覺得我同阿琪呢Ｄ時光好快就會用完咁。

呢一刻，我好珍惜咁係阿琪旁邊行緊，佢每同我講一句野，我都好細心咁聽，細心咁答，因為，我怕錯過左每一刻。

送左阿琪返去後，我都諗住返去，但係估唔到，果個藍臣出現係我面前。

「你好。」望真Ｄ，呢個男人其實外在條件唔錯，佢同我打左個招呼，我隔左幾秒先有反應，「……你好。」

「我知道你係阿琪既好朋友，有Ｄ野想同你傾下，唔知會唔會阻到你既時間？」佢好有禮貌咁同我講。



「好啊，無問題。」我答。

得意既係，我同呢一位藍臣，又去返果一間茶餐廳。

「喂，哥仔，同先先同女朋友黎完食野，而家有同另一個朋友黎？」個茶餐廳阿姐同我講，我只係笑笑口咁無答佢。

而藍臣就話：「我記得阿琪話好鐘意黎呢度食野，而且佢仲一路食，一路講你Ｄ野我知。」

「阿琪講我既野你知？」我問。



「係啊，我好耐都未見過阿琪咁，佢好開心咁講你同佢既經歷，有時又話你蠢到死，有時又話你好可靠，總之，我好耐都無見過阿琪講另一個人講得咁開心。」藍臣雖然微笑咁講，但我睇得出佢呢個微笑帶有一種落寞。

「係呢，阿琪話以前你幫過佢，你係……」我都未問完，藍臣就話：「我係幫阿琪個爸爸姐，佢好多自己既野，都係自己處理同解決，阿琪係一個好堅強既人，但係我總覺得，佢係一個要受保護既人，但係無人保護佢所以佢先要堅強起黎。」

試問有邊個人唔想人地保護，試問有邊個人想咁堅強。

「不過，阿琪總會係我面前擺出最堅強既一面，佢無同我訴過苦，只係不停多謝我幫佢，話佢以後會還返比我，但係，其實我從來都無咁諗過，我知佢知道呢一點，但係對住我，佢話一定要還。」藍臣講講下就停左停注視我。

而我就問佢：「望咩野？」

我咁問後，佢就講：「追阿琪，我做左好多野都令唔到佢對我有感覺，你可以咩？」

呢個問題，就係我而家面對最大既問題。