[愛情無限loop] 就係咁，我做左女神一年既備胎: ２６７　男神藍臣

準時去到阿琪約我去既地方，其實，都係我地兩個成日去既茶餐廳，我一入到去，已經見到阿琪一早已經係度，佢坐既地方，係果日約左能蟹坐既地方。

我行到去對面既位置坐低，好怪，我從來都未試過有咁，以往同阿琪一齊都過得好開心，但點解今日有一種好凝重既感覺。

自從果次之後，就有呢一個感覺。

我地隨便叫左ｄ野食後，有再次沉默，唔得，我係唔可以比呢一種沉默繼續落去，我一定要打破佢先得，但當我想開口講野果陣，阿琪竟然先開口話：「尋晚，我同我朋友去左飲野。」

佢突然咁講，我都唔知比咩反應佢好。



「其實我都唔係幾想去，只係我爸爸叫我一定要陪佢去玩下。」阿琪話。

「所以，妳尋日就去左果度？」我問，而阿琪點一點頭，「係啊，不過無諗過你都會去果度……」

我地靜左幾秒……「係ｗｏ，點解你會係果度架？」咦，阿琪無啦啦咁問，我又真係無諗過點答佢呢個問題。

阿琪佢突然用一個質問既眼神望住我，「我……我去係……因為……」「你話過唔會對我講大話，咩都同我講架。」點解我有一種覺得同阿琪既身份對調左咁既？

我將我去既原因講左比阿琪知，而阿琪聽完後就一副明白既樣子，「原來係幫金姐。」



「係啊。」我話：「但妳去果度無話我知。」我點都要拎返小小優勢先得。

「你都無話我知啦。」阿琪反駁，睇黎我對住阿琪都係無反擊既能力。

阿琪，突然間笑起上黎，而我都因為佢既笑，都笑起左上黎。

「係呢，妳果晚係未有見過阿塔？」我問。

「係啊，佢過黎話想請我飲野，不過果陣佢有ｄ醉，摸身摸勢，所以我未同佢嘈左幾句後就走左。」阿琪講完後問我：「點解你會知既？」



「因為我聽到你地既對話。」我話：「但當我想行出黎果陣，你地已經唔見左。」

「原來係咁。」阿琪話。

而我，就繼續問：「阿琪，其實妳會唔會同果個男人一齊架？」

「點解咁問？」阿琪反問我。

「其實個男人對妳都幾好，有照顧妳，妳其實可以……考慮下……」我究竟係度講緊咩啊，做咩無啦啦幫我既情敵講野？

阿琪聽到我咁講都呆左話：「你知唔知自己講緊咩野？」

「都……都知掛。」我答。

而阿琪只係笑左一下，「阿牛，我想搵一個我對佢有感覺既人，你知唔知？」阿琪話。



「嗯。」我點一點頭。

「我而家同你講，果個男人，我對佢無感覺，所以你唔好再提，好唔好？」阿琪好認真同我講。

「知道。」我點一點頭，「其實果個男人叫咩野名？」

阿琪笑左笑答：「佢個名？好搞笑架，佢叫做藍臣。」

「男神？」我有無聽錯呢？

「係啊，藍色既藍，君臣既臣，藍臣。」阿琪話。

如果，呢一位藍臣做咁多野都未放棄，而我所做既人其實比佢少咁多，我係未，都應該……