[愛情無限loop] 就係咁，我做左女神一年既備胎: ２５６　的士站的時間

大家係未以為醫院呢一度就咁就完左，其實仲未，因為醫院門外截的士果下佢地兩又開戰，而我同阿琪已經累到唔想再講任何野，剩係企左係旁邊度睇。

「架的士我地截先架！」金姐向住同佢爭緊開車門既能利講。

「架的士係我睇到先啊！」能利都不甘示弱。

而兩位既男朋友，都只係企係後面旁觀同嘆氣。

最後大家都上唔到架的士，因為佢地兩個嘈到個司機要開聲鬧佢地，不過鬧交係女人天生既綁定技，如果你唔想死，你都唔好惹女人同你鬧交，而今次個的士司機仲要惹兩個，講真，我地旁邊望到都覺得幾慘下。



鬧完，無上車，大家又企左係度截的士，而金姐同能利就好似要鬥快咁，睇下邊個會截到先，不過唔知係未咁岩啦，等左好耐都無的士。

而果兩位男士，姐係能蟹同ＳＵＮＮＹ呢兩個人，就開始傾計。

「真係好對唔住。」能蟹話，其實真心未見過能蟹咁誠懇。

「傻啦，其實阿銀呢件事，你只係一個導火線，最主要既問題，係佢由細到大既生活。」ＳＵＮＮＹ講完呢句後，係佢地後面企左好耐既我同阿琪就問：「係咩野問題啊？」

「你兩條友偷聽啊。」ＳＵＮＮＹ講笑咁講，然後又回復認真既語氣話：「聽阿金話我知，其實佢對細個既阿銀管得好嚴格，因為佢想阿銀大過之後可以靠自己，事關阿金係一個失婚既人，佢老公，亦姐係阿銀既阿爸為左另外既女人離佢地而去，仲要係阿銀好細個既時候，細個既阿銀果陣只知道自己無啦啦無左個爸爸，但係唔知點解會咁，又唔敢問對佢好嚴格既媽媽，佢一直都好聽話，所有野都只會聽從媽媽既吩咐，而阿金都好保護佢個女，不過，過份既保護其實係一種傷害，當阿銀去到一個會對異性有好奇心既年紀，阿金佢就將佢既保護升級，但咁樣做，就成為計時炸彈慢慢貯存爆炸威力既因素。」



「原來阿銀有個咁樣既經歷。」能蟹話：「咁我唔明點解我係呢件事既導火線。」

「呢個就要從阿銀愛上你果一刻講起。」ＳＵＮＮＹ話：「阿金同我講，當佢個女果陣話有鐘意既人時，佢係好抗拒，因為佢怕阿銀會面對佢既結局，所以死都唔肯放手比阿銀試愛，不過人就係咁，你愈阻止，你就愈會想試，最後阿銀用左一個理由同阿金講，佢話：『我要證明呢個世界上仲有真愛，真誠係可以令一個壞男人變成好男人。』，就係呢一句話，阿銀決定將佢既所有向佢愛既男人付出，但到最後佢咩野都無，只係換得一次真心換絕情。」

ＳＵＮＮＹ慢慢講，能蟹就慢慢自責起上黎，「自少受慣保護既阿銀接受唔到呢個現實，計時炸彈就係果一刻爆發，而且，仲一發不可收拾，阿銀不停笑自己蠢，點解一直而來都要做乖乖女，點解唔好似ｄ壞人咁，使壞但可以好開心，最重要既係只會有壞人傷害人，無人可以傷害到壞人，就係由呢一刻起，佢選擇做一個壞人，要將以前既自己撤底咁改變，所以，先會有而家呢個阿銀。」

ＳＵＮＮＹ講完後，我地幾個都只係嘆氣，而終於呢個時候一架的士出現，好彩地金姐截到架的士，「ＳＵＮＮＹ！快ｄ上車！」

聽到金姐既呼喚，ＳＵＮＮＹ就講多左句，「呢件事遲ｄ先再講。」然後就同金姐上的士走左。



可能，係上天安排左呢段時間要ＳＵＮＮＹ將成件事話比我地三個知，能蟹明白所有事既來龍去脈後，就同我及阿琪講：「我仲係想幫阿銀，知道佢以前既事更加想幫佢。」

「唔止係幫阿銀。」我話：「仲有幫金姐。」

「係。」阿琪附和講。

而能利，仲係好不忿頭先架的士比金姐截左先。