[愛情無限loop] 就係咁，我做左女神一年既備胎: ２２８　阿琪暈倒

「唔好再諗咁多拿，快Ｄ追出去睇下追唔追到佢地啦。」我同咁多人講後，就已經衝左去樓梯行落樓，而佢地都緊隨其後。

一落到樓，我左右望一望睇下見唔見到佢地兩個既身影，但無奈我搵唔到佢地。

不過人多果然好辦事，我睇唔到姐，唔代表其他人都見唔到，「佢地係果邊啊。」阿珍指住左某個方向後就追左上去，而我地望一望佢所指既方向，果然見到Ｂ男扶住左呂晨而且準備緊上的士。

我地姆個係果條大斜路唔理會唔會跌親，出盡全力跑落去，所有人見到我地幾個都停左係度望住我地，諗緊我地係度做咩。

而幫得最前既阿珍最後都只可以目送Ｂ男同呂晨上左的士，而呢個時候我趕到，伸手截停左架的士後就叫佢地：「快Ｄ上車！」



我、阿琪、阿珍、能蟹同七三廿一剛剛好五個人可以上一架的士，一上到的士上面，我就同個司機講：「跟住前面果架的士得架拿。」

的士司機見到我個樣咁急，就用左個懷疑既樣望住我問：「跟住前面架的士？你地想做Ｄ咩先？」

我聽到個司機咁問，有少少火起，但係比能蟹制止左然後佢用另一個方法同司機講：「前面係我地既朋友黎既，佢地架車唔夠坐，所以我地要坐另一架，但又唔知個目的地係邊，所以未要跟住佢地架車囉。」

司機聽到能蟹咁講後就話：「哦，明晒，咁你地坐隱啦。」

我地跟坐Ｂ男同呂晨架的士，心情當然好擔心啦，想打比呂晨，但係呂晨又無拎到電話。



架的士開左無幾耐就停低左，我地見到Ｂ男扶左呂晨落車後，我地亦都好快咁比左錢落車。

落左車既距離咁短，我地一定可以捉得住Ｂ男，更何況我地跑開步，Ｂ男點走到。

我係最遲落車果個，因為我要比錢，而能蟹同七三廿一一落車就一支箭衝左上去，扶住呂晨既Ｂ男又點會走到，只可以企係度比佢地兩個捉住，而阿琪同阿珍都趕左上去，幫手睇住呂晨，而我就係最後先趕到，望住已經比能蟹同七三廿一制服左既Ｂ男。

「你個變態佬！究竟你對我朋友做左Ｄ咩野黎！點解佢咁既！」能蟹好惡咁問，但係Ｂ男不為所動，而且係度笑。

「仲要裝埋Ｄ仆街ＡＰＰＳ睇住咁多人既蹤！拾拾識到你呢ｄ人真係慘！」七三廿一話，Ｂ男仍然一貫既態度。



而我就慢慢行到Ｂ男面前望實佢，而佢見到我後就話：「我認得你，你就係上次打我果個人。」佢講完之後笑得好陰森，而佢仲用咁樣既表情望住阿琪，「我地認得佢地兩個，其中一個仲唔止見過一次添。」

我聽到Ｂ男咁講後，真係忍到手握成拳，「點解你要咁做？」我問佢，而Ｂ男就話：「Ｄ女人係咁賤，唔玩既話都對唔住自己……」

佢呢一句未講完，我就一拳咁打左過去，呢一拳直中佢既鼻，令到佢鼻血直流。

但可能因為我用力過度以及佢向後既力好大，七三廿一唔留神甩左手，而Ｂ男就用好快既動作起左身然後行到阿琪既面前，我見到咁當然即刻衝過去啦。

不過……始終唔夠快……我只見佢係阿琪既面前揚一揚，阿琪對眼眨左幾下就開始暈低，而我可以做既就只係好用力一腳踢開左Ｂ男，然後扶住阿琪：「阿琪！妳無事嘛！」

能蟹同七三廿一見到咁，都行左過黎望一望阿琪有無事，然後佢地本來想追Ｂ男之際，已經發現Ｂ男已經走左，而且仲拎走埋佢既手機。