[愛情無限loop] 就係咁，我做左女神一年既備胎: １７６　我既初戀

（唔好意思，因為呢排做野加班，遲左一話，今次一連更新兩話，各位朋友記得睇晒兩話啊）

我既初戀係點，每次Ｄ人咁問我，我都會答：「唔記得拿。」就算，分手只係一年前既事，我都會咁答。

不過我呢個人咁有記性，又點會唔記得，仲要係人既一生中最重要，最刻骨銘心既事。

用返先前講過既野做一個開始，兩個人係埋一齊，已經唔係一件易既事，如果要平淡咁過，仲難。

但係我同佢，就可以平淡咁過每一日，但唔知係未太過平淡，我既初戀，只維持左四年。



三年既熱戀，由第四年開始，正接變成多左衝突，唔知點解，佢既怒火可以隨時就起。

「點隨時就起法？」阿琪問我，而我就答佢：「佢可以早上開心，晏就發脾氣，然後下午茶開心，夜晚又再發脾氣，送佢返家開心，但係臨訓前再度發脾氣。」

「一日三個轉變咁勁？」阿琪問，而我就無奈點一點頭。

係啊，真係會咁，如果當一個人開始對你做咩都睇唔順眼既話，就會變成咁架拿。

頭個三年，我同佢每一日都好開心，好多趣事，就算做左Ｄ低能白痴野，就算真係做左Ｄ會激親對方既野，都只會一笑而過。



係幾時開始，佢變成咁？唔知，我只知道既係，分手打既日子，分手前九個月，每個月嘈一次，半年，每兩個星期嘈一次，三個月，每星期嘈一次。

而且，係佢單方面嘈，我每次都只可以接受佢既批評，接受佢既人生攻擊，笑我肥，笑我深近視，笑我行路成日跌親，話我係長短腳。

但佢記唔記得，我隻腳整成咁都係因為佢……

不停既漫罵，令到我開始覺得，佢係特登咁做，佢係故意要激我，我好記得有一次，同佢睇一套電影，套戲叫ＩＮＳＩＤＥ　ＯＵＴ，中文叫腦筋急轉彎，睇睇下途中，佢見到戲中藍色既角色時，係我耳邊講左句：「救我……」我嚇左一跳望住佢，果佢仲笑緊既佢。

「佢係未個腦有Ｄ事？」阿琪問我，而我又答阿琪：「我有好幾個朋友聽到我咁講後，都似妳咁講。」



於是，我搵左佢Ｄ朋友，同佢地傾過，佢Ｄ朋友都話戈能佢壓力大，叫佢放鬆Ｄ，直到有一日……

佢話佢發夢見到我追住佢，想殺死佢，我聽到後就話唔會發生呢件事，但佢一口咬定會現實生活都會係咁，話我一定會殺左佢，我果一刻只係覺得好可笑，反問返佢我愛佢，點會殺佢。

而佢既回答係話，因為我對佢太好，但佢對我太衰，所以有朝一日，我一定會忍唔住殺左佢。

呢個，係我聽到最可笑既答案，亦都成大左我地以後成日嘈同分手既導火線……

「佢應該要睇心理醫生多Ｄ　ＷＯ。」阿琪話，然後拍一拍一副落寞既我講：「佢唔珍惜你姐。」

我笑左一下，同阿琪先前既笑一樣，係一種思念，遺憾，「分手後一日，佢仲話比我聽最後既一年，係佢特登發脾氣，以為可以增進返我地既感情，根本就錯晒。」我講完後，就飲晒我手既果杯酒。

而阿琪，就一臉憐惜咁望住我。

「分手後，係朋友果邊我知，佢唔駛一個月就同另一個男仔一齊，而且係同我差唔多既男仔一齊……」雖然過左都一段時間，但係從自己把口講出黎，仲有少少心痛既感覺，「所以，我決定送最後一份禮物，去祝福佢同佢以後既情人。」



「你做左Ｄ咩？」阿琪問，然後我就好認真咁望住佢答：「我要做一個仆街，我要係佢面前做一個仆街，我要同佢講要拎返同佢開聯名戶口既錢，果Ｄ係我應份拎既，因為佢無貯過，但係因為我要做個仆街，所以我話如果佢唔合作我就會告佢。」

我深呼吸一口氣，然後繼續：「我要做個仆街，所以煩佢朋友，令到佢Ｄ朋友都覺得我人仆街，唔會再叫佢同我復合。」

阿琪用食指放係我雙唇上面，示意我唔好講，但我都係要講落去：「因為我想佢徹底咁忘記我，去完全搵佢既所愛，就好似我最後見到佢係社交平台上既一句話，『沒有最好，只有更好』，我就係因為想佢搵到個更好，所以先要係佢面野做一個仆街。」

講完呢返話後，我笑，呢一笑帶住諷刺，帶住不切寶際，而阿琪，仲係一臉既憐惜。

我望住而家既阿琪，同佢講：「所以，妳搵朋友假扮男朋友呃妳初戀情人，我好明白，因為我同妳都一樣，情願自己受苦，都唔想自己曾經愛過既人錯過下一個愛既機會。」

我從新將酒倒入我地兩個既酒杯，「呢個，就係我先前無同妳講過既初戀。」我對阿琪話。

而阿琪，微笑左一下，「咁我頭先講你知既事，都未同你講過架。」我聽到佢咁講，都微笑左一下。



「為我地既初戀飲杯。」我舉起杯。

「好，呢一杯過後，就忘記佢。」我同阿琪手中既杯交碰，就好似，為我地兩人各個初戀，正式畫上了句號。