[愛情無限loop] 就係咁，我做左女神一年既備胎: １７２　易賞錢

今日照常同阿琪一齊去買野，但唔同既係，今日我地兩個做左一件事。

「不如我地伸請返張易賞錢卡好唔好啊，橫店我地兩個成日都黎買野？」阿琪問我，而我就點頭話好。

填完ＦＯＲＭ，好快就拎到張易賞錢卡，有一張大卡同三張細卡，阿琪拎左一張細卡走，然後掛左係個鎖匙度話：「大卡擺係你度，費事我大頭蝦唔見左。」佢係度向我傻笑緊。

而我就將大卡放落銀包度。

我地伸請完後先去買野，阿琪係後面行，而我就係後面推車，有時，阿琪會行係我旁邊撓住我隻手，又或者行勢咁揉我隻手，我見到佢咁做，就問佢：「仲咩事？」



「無啊，你咁多手毛，咁樣揉你隻手好滑。」佢笑住咁講。

同阿琪行左咁多次超級市場，唔多唔少都知道佢會買咩，佢每次會先去買生果，睇係有咩生果平，然後就會去睇菜，跟住經過冰櫃時，就會睇下有無佢媽媽鍾意食果種椰果，如果有，佢通常會買三包。

跟住就會繼續行，到冰鮮櫃果陣，會睇下Ｄ雞柳有無特價，仲有魚都係，如果有，佢先會放人架車仔度。

然後，就到飲品，佢會買左佢媽媽鍾意飲果Ｄ先，然後先睇仲有無其他特價品，之後就會睇下Ｄ罐頭，然後就到花生，佢有時先會買比佢爸爸食，因為佢怕爸爸食得多熱器。

買到咁上下就會買日用品，到最後，就到佢既至愛，零食，個為食豬好最鍾意買零食，但次次佢都會一路買，一路話佢媽媽實鬧死佢，而我就係旁邊笑佢。



仲有啊！仲有最重要既野，就係一大堆既「叮叮」，咩野係「叮叮」？就係果Ｄ微波爐點心，每次佢都買好多，因為佢阿爸會清我好快，而且佢自己都會清得好快。

到最後排隊既時候，我就會提佢有無野買漏，個大頭蝦真係可以似似都買漏野。

最後，到比錢，然後用我地剛剛伸請既易賞錢貯分。

「我將你Ｄ錢轉成分，可以慳Ｄ。」佢笑住話。

我地，就好似一對年輕既夫婦係度買緊日常用品，為生活精打細算。



每次同阿琪買野，我都覺得好開心，因為，我可以幫到佢。

就算，只係呢Ｄ微不足道既野，我已經好心滿意足。

每次買完野，推住架車返到佢屋企門口，幫佢將Ｄ野搬入屋，我都好開心，雖然我無正式踏入過佢屋企，每次都只係佢屋企門口前面。

咁樣，已經好足夠。

「一陣我地去食下午茶好唔好啊？」阿琪搬完Ｄ野食問我。

「緊係好。」我答佢。

「我仲想食雪糕啊。」阿琪露出左一副請求既扮可憐樣。

「知拿，傻豬。」呢一刻，我真係覺得，我同阿琪既關係行多左一大步。



但係，呢個情況可以維持到幾耐呢。