[愛情無限loop] 就係咁，我做左女神一年既備胎: １５１　休息

同金姐佢地食完飯後，我帶住一個疑問返屋企，「你要令佢覺得你既理所當然，慢慢變成不易得到既習慣。」

姐係點啊？又要對佢好，但又唔可以對佢好啊？定係要對佢好好，但係又唔可以比佢知道係理所當然？咁樣好似合理Ｄ，我就係不停咁諗呢個問題，諗到老牛大人返左黎都唔知。

佢企左係我既房門前，眼定定望住我，望左都有成幾分鐘，而我都眼定定望住佢，不過我係放左空係度諗野，都諗左幾分鐘。

「你個傻仔今次真係傻左，望咁耐一粒聲都唔講既。」老牛大人話。

「可能我真係傻左。」老牛大人聽到我咁答後，好出奇地望住我，我都好出奇點解自己會咁答老牛大人，只見佢慢慢行左過黎，用手摸一摸我既額頭，「無發燒ＷＯ。」天下間既父母係未都會咁既呢？見到自己仔女好似有少少病，第一時間都會摸一摸佢地既額頭，好似摸完就知道佢有咩病咁。



我撥開天老牛大人隻手，「我無事啊，只不過有Ｄ野諗唔通姐。」

「點解自己生得咁樣衰？」佢問，我都無佢咁好氣。

「『你要令佢覺得你既理所當然，慢慢變成不易得到既習慣。』老牛大人你點睇呢一句啊？」我將金姐所講既野同老牛大人講，然後老牛大人就話：「不動而動，以退為進。」

嘩！我真係好佩服老牛大人可以將金將呢兩個成二十三個字既句字，縮到得返八個字，但其實你講完之後，我都唔知點解。

「姐係話，叫你條ＯＮ９仔未一味剩係識得哄人，要令到人地想你哄佢啊。」老牛大人講完之後，我都唔係好明，於是佢又好似平時咁打左我個頭一下，然後就話：「姐係，你主動讚佢靚，佢會開心，但如果係佢問你佢靚唔靚後你先讚佢的話，佢開心之餘，仲表達佢只係想你讚佢，明唔明啊？」



聽到老牛大人呢個舉例，我開始明明地。

「就好似我同你娘親以前都係咁架，一開始我好主動架，但又係聽到一個人叫我唔好將哄佢呢樣野變成理所當然後，我先知道對佢好係重要，但最重要果一點，係佢要知道你對佢好，仲要佢習慣左，無左會唔舒服。」老牛大人講完後，我就話：「咁都好攻心計ＷＯ。」

「都係架，咁追女仔係講心，咁姐係要攻心啦，當然攻心計架拿。」老牛大人呢一句又好有道理。

「有人話，男人就好似紙鳶咁，要時不時拉緊，時不時放鬆下先留得佢住，我就話ＯＮ撚９，根本唔單止係男人，係愛情上面，被愛果一方就真係紙鳶拿，你鬆得滯可能會被風帶走，你緊得滯又會斷，所以要記住，拿掐最適合既鬆緊度，慢慢咁將愛情昇華。」老牛大人講完呢句後，就走左出房。

唔通，真係好似老牛大人咁講，要阿琪知道我既好？要佢習慣我既好？我拎左部電話出黎，見到阿琪既ＭＳＧ，不過唔知那來既勇氣，我將電話校左做震機，今晚，我決定要好好休息下。