[愛情無限loop] 就係咁，我做左女神一年既備胎: １４９　金姐與ＳＵＮＮＹ

唔知點解，而家每一日都好似過得好慢咁，可能，係因為不停等緊某個人既ＭＳＧ關係掛。

返工等、食飯等、做緊野果陣等、甚至係放工返到屋企，沖緊涼都會拎部電話入去，因為，我唔想錯過阿琪ＳＤ比我既ＭＳＧ。

聽阿琪講，今日阿富話要比個任務阿琪，就係陪佢去同Ｄ朋友一齊食飯。而果Ｄ朋友其實我都識，係跑步ＧＲＯＵＰ入面既人，只不過我同佢無深交。

係能蟹同阿琪既ＧＲＯＵＰ入面，佢地兩個討論緊呢件事。

能蟹：點解妳要去？
阿琪：佢因為呢件事


阿琪：煩左我三日
阿琪：晚晚ＭＳＧ我唔應佢就打電話比我
阿琪：打到我應機位置
能蟹：妳可以唔理佢架
阿琪：試過啦
阿琪：但佢好堅持打到我肯聽為止
能蟹：關機囉
能蟹：ＢＬＯＣＫ左佢電話囉
能蟹：呢Ｄ野唔駛我教啊
阿琪：但係平時都會見到佢，咁做會好尷尬


能蟹：咁無計架
能蟹：抵妳死架ＷＯ

睇黎阿琪又係衰心軟。

聽阿琪講，阿富因為想阿琪知道平時既佢係點，所以就叫佢同朋友一齊食飯，睇左會出席既人，都睇得出阿富係有備以黎，佢所請既人，都係果Ｄ會幫佢講好說話既人。

我今日成日，就係等緊阿琪食完飯後既ＭＳＧ，望住個鐘，佢可能已經好開心咁食緊野，等等……我好似未食飯ＷＯ，今日屋企入面得我一個，我又唔想煮，所以落樓下食野算。

點知我一去到餐廳，就見到金姐都係度食緊飯，而且係同另一個ＧＲＯＵＰ　ＭＥＭＢＥＲ食緊野。



金姐係遠處見到我後，就向我揮手示意叫我過去。

過到去，同佢地兩個打左聲招呼後，就講笑咁講：「你地兩個拍拖啊。」其實金姐單身左一段時間，而且佢既年齡先前都已經講左，係可以做阿琪既阿媽，而另一個就係個男ＭＥＭＢＥＲ，同金姐年齡相若。

金姐聽到後，就好尷尬笑一笑後同我講：「你唔好同其他人講我地兩個拍拖Ｄ野。」

下！？我亂講都講中啊。

「牛兄，坐啦，一齊食。」呢個男ＭＥＭＢＥＲ係我心目中都幾好，如果佢同金姐一齊，我都唔覺得係一個問題，而呢個ＭＥＭＢＥＲ，叫ＳＵＮＮＹ。

一坐得左，ＳＵＮＮＹ就問我：「仲咩今日得返一個人食飯啊？無同阿琪一齊咩？」

佢講完之後，我嘆左口氣，而金姐好似用隻腳踢左ＳＵＮＮＹ一下。



ＳＵＮＮＹ好識做咁話：「咁有時男人都想要Ｄ私人時間既。」

金姐就接住講，「我知，今日阿富約左阿琪同其他ＧＲＯＵＰ　ＭＥＭＢＥＲ食飯嘛。」金姐講完之後，我望住佢問：「點解妳會知架？

「我呢Ｄ八婆仔，想知既野一定有方法既。」金姐講完後，ＳＵＮＮＹ就問：「下？阿富同阿琪架咩？佢唔係同牛兄一齊架？」

ＳＵＮＮＹ咁問後，我又嘆左口氣。

「平時見你同阿琪食飯坐到隔住張臺都眉來眼去架ＷＯ，而且無理由係阿富啊，阿富佢有女朋友，而且阿琪都好似唔願ＳＨＯＷ佢咁。」ＳＵＮＮＹ講完後，比金姐瞪左一瞪，「知道，唔講野，食野。」

瞪完ＳＵＮＮＹ之後，金姐就問我：「係未因為阿琪既野而唔開心啊？」

我認真咁諗左諗，然後答佢：「都算係，不過我唔係因為佢同阿琪食飯而唔開心，而係佢點解唔拒絕阿富。」

金姐聽到後，就同我講：「其實情愛既野，有時簡單我黎係真係可以好簡單，只要雙方都想，就可以行埋一齊，所以你要明白，阿琪唔拒絕，係唔係佢都有少少想同阿富一齊呢？」



金姐既問題，係我腦入面不停咁轉。

「但係佢同我講左，佢同阿富係無可能架。」我話，而金姐又反問我：「咁你而家擔心Ｄ咩？」

「我……」我答唔出，但係金姐就好直接咁話：「你唔係怕阿琪同阿富一齊，亦都唔係怕阿琪會同另一Ｄ人一齊，你怕既，係你以後都會變到同阿富咁既下場。」